Fiantoñoñe II 32

Ie añe i fitoloñañe naho figahiñañe izay, le pok’eo t’i Senakeribe mpanjaka’i Asore naname Iehodà le nañarikatoke o rova fatratseo vaho naereñere’e ty hiboroboñak’ao am-bata’e. Aa ie nioni’Iekizkia te pok’eo t’i Senakeribe, misafiry ty hialy am’Ierosalaime, le nilahatse amo roandriañeo naho amo fanalolahio ty hamempeañe o rano migoangoañe alafe’i rovaio vaho nañolots’aze iereo. Aa le maro t’indaty nivory nampizenjeñe o rano migoangoañeo naho i torahañe niranga i taney, ami’ty hoe: Aa vaho homb’etoa hao o mpanjaka’i Asoreo hañisake rano maro? Nañosi-batan-dre namboatse i nirobak’amy kijoliy naho nampitroatse fitalakesañ’abo ama’e naho i kijoly alafe’ey naho nifatrare’e ty Milo an-drova’i Davide ao vaho niranjie’e fialiañe naho aron-defo tsifotofoto. Le nampijadoña’e am’ondatio ty mpiaolo añ’aly naho nampivoria’e an-tane midañadaña an-dalambei’i rovay vaho nisaontsy fañosihañe am’iereo ami’ty hoe: Mihafatrara naho mahasibeha, ko hembañe, ko miroreke amy mpanjaka’i Asorey, ndra i valobohòke mindre ama’ey, amy te bey i aman-tikañey ta i ama’ey; fitañe nofotse ty ama’e; fe aman-tika t’Iehovà Andrianañaharentika hañolotse an-tika naho hialy amo hotakotan-tikañeo. Le nampanintsiñe ondatio ty enta’Iekizkia mpanjaka’Iehoda. Ie añe le nampihitrife’i Senakeribe mpanjaka’i Asore mb’e Ierosalaime—ie niatreatre i Lakise henane zay rekets’i valobohòn-dahin-defo’ey—mb’amy Iekizkia mpanjaka’Iehoda naho mb’e Iehoda vaho Ierosalaime mb’eo o mpitoro’eo nanao ty hoe: Hoe t’i Senakeribe mpanjaka’i Asore: Ino ty iatoa’areo kanao ifeaha’areo ty fañarikatohañe Ierosalaime. Tsy Iekizkia hao ty mamañahy anahareo, hanolora’areo vatañe hampivetrahe’ty kerè naho ty harandrano, ami’ty hoe: Iehovà Andrianañaharen-tika ty hamotsotse antika am-pità’i mpanjaka’i Asorey? Tsy Iekizkiay hao ty nañafake o tamboho’eo naho o kitreli’eo vaho nandily Iehoda naho Ierosalaime ami’ty hoe; Añatrefa’ty kitrely raike ty hitalahoa’areo, le ama’e ty hisoroña’areo? Tsy fohi’areo hao o nanoeko naho o roaeko amo hene’ondaty an-taneoo? Ia amo ‘ndrahare’o kilakila’ondatioo ty naharombake i tane’iareoy an-tañako? Ia amo fonga ‘ndrahare’o kilakila’ondaty nifongoren-droaekoo ty naharombake ondati’eo an-tañako, te haharombak’anahareo an-tañako ka t’i Andrianañahare’areo? Ie amy zao, ko apo’areo ho sigìhe’Iekizkia, ndra ho risihe’e an-tsata inoñe, ko iantofañe; fa tsy eo ze o ndraharem-pifeheañe ndra fifelehañe naharombake ondati’eo an-tañako naho am-pitàn-droaeko zao; somandrake te tsy haharombak’anahareo an-tañako t’i Andrianañahare’areo. Mbe nanovoñ-inje am’Iehovà Andrianañahare naho niatreatre i mpitoro’e Iekizkiay o mpitoro’eo. Nanokitse taratasy ka re nanigìke Iehovà Andrianañahare’Israele naho nañabiañe Aze, ami’ty hoe: Hambañe amy te tsy naharombake ondati’eo an-tañako o ndrahare’o fifeheañe an-taneoo ro tsy haharombahan’Añahare’Iekizkia an-tañako ondati’eo. Le nitazataza am-peo mafe ami’ty saontsin-te-Iehoda am’ondati’Ierosalaime ambone’i kijoliio, hampirevendreveñe naho hañembañe, handrambesa’iareo i rovay. Le nampanahafe’iareo talily amo ndraharen-kilakila-ndati’ty tane toio, o toe satam-pità’ondatio, t’i Andrianañahare’Ierosalaime. Aa le izay ty nihalalia’Iekizkia mpanjaka naho Iesaià mpitoky ana’i Amotse, an-toreo mb’an-dindiñ’añe. Nañirak’anjely amy zao t’Iehovà, nampaito o fanalolahy iabio naho o mpifeheo naho o mpifeleke an-tobem-panjaka’i Asoreo. Aa le nimpoly an-kasalaran-daharan-dre mb’an-tane’e mb’eo. Aa ie nimoak’an-trañon-drahare’e ao, le nanjevoñ’aze am-pibara o nimoak’an-kova’eo. Aa le rinomba’Iehovà t’Iekizkia naho o mpimone’Ierosalaimeo am-pità’i Senakeribe mpanjaka’i Asore naho am-pità’iareo iaby vaho nañaro iareo añ’ariary. Le maro ty ninday ravoravo mb’am’Iehovà e Ierosalaime ao naho raha fanjàka am’Iekizkia mpanjaka’Iehoda, ie nonjoneñe am-pahaisaha’o kilakila’ondatio henane zay. Natindry an-tihy fa heta’e t’Iekizkia tamy andro rezay le nihalaly amy Iehovà naho nanoiñe aze t’Iehovà vaho tinolo’e viloñe. Fe nifotetse amy hasoa nanoeñe ama’ey t’Iekizkia, fa nitoabotse ty arofo’e le nivotrak’ama’e naho am’Iehodà vaho am’Ierosalaime ty haviñerañe Aa le nirèke amy fitoaborañ’arofo’ey t’Iekizkia, ie naho o mpimone’Ierosalaimeo vaho tsy nifetsak’am’iereo ty haviñera’Iehovà tañ’andro’Iekizkia. Nanam-bara naho asiñe ra’elahy t’Iekizkia; le namboare’e fañajàñe volafoty naho volamena naho vatosoa naho fampafiriañe naho fikalañe vaho ze hene karazam-panake soa; riha ho amo nivokareñeo, ty ampemba naho divay vaho menake; naho lapalapa ho a ze hene karazan-kare naho mpirai-troke vaho mpirai-lia. Mbore nañoren-drova ho am-bata’e naho nanontoñe mpirai-lia naho mpirai-troke tsifotofoto; fa nitoloran’Añahare vara bey. Iekizkia ty nanampe ty loha-rano’i Gihone vaho nampizotsoe’e mivantañe mañandrefa’i rova’i Davidey. Le niraorao amo fitoloña’e iabio t’Iekizkia. Fe o sorotà’i Bavele niraheñe mb’ama’e mb’eo hañontane o halatsàñe nanoeñe amy taneioo, le nengan’Añahare re hitsoha’e aze haharofoana’e ze hene añ’arofo’e ao. Aa naho o fitoloña’Iekizkia naho o fatariha’eo, oniño t’ie misokitse amy aroñaro’Iesaia mpitoky ana’i Amotsey vaho amy bokem-panjaka’Iehodà naho Israeley. Le nitrao-piròtse aman-droae’e t’Iekizkia naho nalente’iareo amy talèn-kiborin’ana’i Davidey; le hene niasy aze amy havilasi’ey t’Iehodà naho o mpimone’Ierosalaimeo vaho nandimbe aze nifehe t’i Menasè ana’e.

Misoratra ao amin'ny gazety anay

Apetraho ny Église Locale