Samoele II 18

Niahe’i Davide amy zao ondaty nindre ama’eo, vaho najado’e am’iereo ty mpifelek’arivo naho mpifehe zato. Nirahe’i Davide mb’eo, am-banem-pità’Ioabe, ty fahatelo’ondatio naho ambanem-pità’i Abisaý ana’i Tseroia rahalahi’Ioabe ty fahatelo’e vaho ambanem-pità’Itaie nte-Gate ty fahatelo’e. Le hoe i mpanjakay am’ondatio, toe hindre hionjo ama’areo ka iraho. Fe hoe ondatio: Tsy hionjo mb’eo irehe, amy te tsy hahoa’iereo te zahay ro hitriban-day añe, aa ndra te mivetrake ty vaki’ay, tsy ho haoñe’iereo; fa mañeva ty rai-ale ama’ay irehe: ie amy zao hàmake te zahay ro hampionjone’o hiakatse ty rova toy. Le hoe i mpanjakay am’iereo: Hanoeko arè ze atao’areo hahasoa. Aa le nijohañe añ’ila’ty lalambey re vaho niavotse mb’eo ki-zato’e naho ki-arivo’e ondatio. Le linili’i mpanjakay t’Ioabe naho i Abisaý vaho Itaie ami’ty hoe: Ehe ano’areo mora ty amako i ajalahiy, i Absalome. Songa jinanji’ondatio ty namantoha’i mpanjakay i mpifehe rey ty amy Absalome. Aa le niparatsake añe ondatio hiatreatre am’Israele; vaho tañ’ala’i Efraime ao i hotakotakey. Zinevoñ’añatrefa’o mpitoro’i Davideo o ana’Israeleo, le akore ty fanjamanañe amy andro zay kanao lahilahy ro’ale ty nivetrake. Fa niparaitak’amy tane iabiy i hotakotakey vaho maro ty nabotse’i alay te amy fibaray. Ie nifanojo amo mpitoro’i Davideo t’i Absalome, le niningitse amy borìke’ey t’i Absalome, naho nimb’ambane’ty tsampan-kobaiñe jabajaba mb’eo i borìkey, naho nazi’i kobaiñey ty añambone’e, naho naonjo’e añivon-dikerañey naho ty tane toy vaho nitolom-pilay mb’eo i borìke tambane’ey. Niisa’t’indaty Izay le nitalily am’Ioabe, ty hoe: Inao! nitreako niradorado ami’ty kobaiñe t’i Absalome. Le hoe t’Ioabe amy lahilahy nitalily azey: Aa ihe nahaisak’azey: akore t’ie tsy linafa’o mb’an-tane? fa ho nitolorako volafoty folo reke-piètse. Fe hoe indatiy am’Ioabe: Ndra te ho nandrambe volafoty arivo an-tañako, tsy ho nahitiko mb’amy ana-dahi’i mpanjakaiy ty tañako, fa am-pijanjiña’ay ty namantoha’i mpanjakay ama’o naho amy Abisaý vaho am’Itaie ty hoe: Mitaoa hera eo ty hitsapa i ajalahy Absalomey. Aa le ho nanoeko afero mamitak’ate ty vatako, ie tsy ietahañe amy mpanjakay, le ihe ka ho niatreatre ahy. Aa le hoe t’Ioabe: Tsy hihenekenek’ama’o atoy iraho. Le ninday ana-pale telo am-pità’e vaho natrofa’e añ’arofo’i Absalome, ie mbe niveloñe amy kobaiñey. Niarikoboñe aze amy zao ty ajalahy folo mpitàm-pikala’Ioabe, naho linafa’iareo t’i Absalome, toe navetra’iareo. Aa le pinopò’Ioabe i antsivay, vaho nibalik’ami’ty fañoridañañe Israele ondatio; nitana’Ioabe ondatio. Rinambe’iareo t’i Absalome naho navokovoko ami’ty koboñe jabajaba añ’ala ao le nampitoabora’iareo ty votrem-bato folo-ay vaho songa nitriban-day mb’an-kiboho’e mb’eo t’Israele. Natroa’i Absalome, ie mbe niveloñe, ty vatolahy añ’ala-vondrom-panjaka ao ho am-bata’e, ami’ty hoe: Tsy manañe anadahy iraho hitiahiañe ty añarako; vaho nitokave’e ami’ty añara’e i vatoy; le atao ty hoe Vatolahi’i Absalome pak’androany. Aa le hoe t’i Akimatse ana’i Tsadoke: Angao hilaisako hitalily amy mpanjakay, te vinale’Iehovà fate o rafelahi’eo. Le hoe t’Ioabe ama’e: Tsy hinday talily irehe te anito, fa andro hafa ty hindesa’o talily; kanao nihomake ty ana-dahi’i mpanjakay tsy ho talilie’o te anito. Aa le hoe t’Ioabe amy nte-Kosiy: Akia, atalilio amy mpanjakay o niisa’oo. Niondrek’amy Ioabe i nte-Kosiy vaho nihitrihitry mb’eo. Le hoe t’i natovo’i Akimatse ana’i Tsadoke am’Ioabe: Ndra te ino ty hifetsake, miambane ama’o, ehe adono hañeañe i Kosiy iraho. Le hoe t’Ioabe: Ino ty hilaisa’o, anako, ihe tsy handrambe tambe amy taliliy? Ndra ino ty hizò, hoe re, Hilay iraho. Le hoe re ama’e: Milaisa. Aa le niherereake mb’amontoñe t’i Akimatse vaho nilosore’e i nte-Kosiy. Ie amy zao, niambesatse añivo’ty lalambey roe eo t’i Davide; le ie nanganike mb’an-tafon-dalambey ambone’i kijoliy mb’eo ty mpijilo naho nampiandra fihaino naho nitalake, le naheo’e te ingo ty lahilahy milay mb’eo ie raike. Nikaik’amy zao i mpijiloy, nitalily amy mpanjakay: Le hoe i mpanjakay: Kanao mirery re, minday talily am-palie. Aa le niharine mb’eo re. Nahaisake mpihitrihitry raike ka i mpijiloy: le nikaihe’e ty hoe i mpigarin-dalañey: Heheke ondaty raike ka ty mihitrike mb’etoa. Le hoe i mpanjakay: Minday talily ka re. Le hoe i mpijiloy: Ataoko ho filaisa’i Akimatse ana’i Tsadoke i miaoloy. Le hoe i mpanjakay: Ondaty mora minday talily soa izay. Nikoike t’i Akimatse, le hoe re amy mpanjakay, Tsy mañahy. Le nidrakadrakak’añatrefa’i mpanjakay re nanao ty hoe: Andriañeñe abey t’Iehovà Andrianañahare’o, i nampilesa ondaty nañonjo-haok’amy talèko mpanjakaio. Le hoe i mpanjakay: Mbe tsy mañahy hao i ajalahy Absalomey? Le hoe ty natoi’i Akimatse: Ie nañitrike o mpitoro’oo t’Ioabe, le nahatrea fivoamboan-dra’elahy iraho fa tsy apotako ty tali’e. Le hoe i mpanjakay, Misitsira mb’etoa, le mijohaña ey. Aa le niveve re, nijohañe. Ingo te niheo mb’eo amy zao i nte-Kosiy; le hoe i nte-Kosiy: Talily ho a i talèko mpanjakay; fa vinale’Iehovà fate ty azo anindroany amo nitroatse ama’o iabio. Le hoe i mpanjakay amy Kosiy: Mbe janga hao i ajalahi’Absalomey?’ Aa hoe ty natoi’i Kosy: Ee te hanahake i ajalahiy ze hene rafelahi’i talèko mpanjakay naho ze miatreatre azo hijoy.

Unseren Newsletter abonnieren

Église Locale installieren