Mpanjaka II 24

Nionjomb’eo tañ’andro’e t’i Nebokadnetsare, le nimpitoro’e telo taoñe t’Iehoiakime; naho nivalike vaho niola’e, vaho nirahe’Iehovà ama’e ty firimboñan-dahindefon-te-Kasdý, naho ty firimboña’o nte-Arameo naho ty firimboña’o nte-Moabeo, naho ty firimboña’o Ana’i Amoneo; nampihitrife’e am’Iehoda handrotsak’aze, ty amy tsara nafe’Iehovà añamo mpitoro’e mpitokio. Toe i lili’Iehovà y ty nivotraha’izay am’Iehoda, hanintake iareo tsy hahavazoho’e, ty amo hakeo’i Menasèo, naho o fitoloña’e iabio, naho o lio-maliñe nampiorihe’eo, fa natsafe’e lio-màliñe t’Ierosalaime, ze tsy nimetea’Iehovà hapoke. Aa naho o fitoloña’Iehoiakime ila’eo, o nanoe’e iabio, tsy fa sinokitse amy bokem-pamoliliañe o mpanjaka’Iehodaoy hao? Nitrao-piròtse aman-droae’e ao t’Iehoiakime le nandimbe aze nifehe t’Iehoiakine ana’e. Le tsy nionjo boak’an-tane’e añe ka ty mpanjaka’i Mitsraime, amy te tinava’ty mpanjaka’i Bavele ze hene hanañam-panjaka’i Mitsraime boak’an-Toraha’i Mitsraime pak’an-tSaka-Parate añe. Ni-folo-taoñe valo’amby t’Iehoiakine te niorotse nifehe, le nifeleke e Ierosalaime ao telo-volañe. I Nekostà, ana’i Elnatane, nte-Ierosalaime, ty tahinan-drene’e. Nanao haratiañe am-pivazohoa’Iehovà re manahake o fonga satan-droae’eo. Nionjomb’e Ierosalaime mb’eo henane zay o mpitoro’i Nebokadnetsare mpanjaka’i Baveleo, nañarikatoke i Rovay. Nivotrak’amy rovay t’i Nebokadnetsare mpanjaka’i Bavele ie fa nañarikatohe’o mpitoro’eo. Niavotse mb’amy mpanjaka’i Baveley t’Iehoiakine mpanjaka’Iehoda, ie naho i rene’e naho o mpitoro’eo naho o ana-dona’eo naho o mpifehe’eo; vaho ninday aze an-drohy an-taom-pifehea’e faha-valo ty mpanjaka’i Bavele. Hene nakare’e o vara añ’anjomba’Iehovà o naho o vara añ’anjomba’i mpanjakaio, le songa pinatepate’e o fanake volamena tsinene’i Selomò mpanjaka’Israele an-kivoho’Iehovà o, ty amy tsara’Iehovà y. Le nendese’e an-drohy mb’eo iaby t’Ierosalaime naho o roandria’eo naho o fanalolahi’eo, mpirohy rai-ale, vaho ze hene mpandranjy naho mpanefe, le tsy aman-konka’e naho tsy o rarake am’ondati’i taneio avao. Aa le nendese’e an-drohy mb’e Bavele mb’eo t’Iehoiakine, naho nente’e ty rene’i mpanjakay naho o valim-panjakao naho o mpifehe’eo vaho o mpiaolo amy taneio boak’Ierosalaime sikala e Bavele añe an-drohy. Le o fanalolahy iabio: fito arivo, naho o mpandranjio vaho o mpanefeo, arivo, songa naozatse nahafialy, sindre nasese’i mpanjaka’i Baveley an-drohy mb’e Bavele añe. Nanoe’i mpanjaka’i Baveley mpanjaka t’i Matanià, rahalahin-drae’i Iehoiakine handimbe aze vaho novae’e ho Tsidkià ty tahina’e. Roapolo taoñe raik’amby t’i Tsidkià te niorotse nifehe; le nifehe folo-taoñe raik’amby e Ierosalaime ao; i Hamotale, ana’Iiremeià nte-Libnà, ty tahinan-drene’e. Nanao haratiañe am-pivazohoa’Iehovà re, hambañe amy nanoe’Iehoiakime iabiy. Toe niatreatre Ierosalaime naho Iehoda ty haviñera’Iehovà ampara’te rinoa’e boak’añ’atrefa’e eo. Toe niola amy mpanjaka’i Baveley t’i Tsidkià.

Misoratra ao amin'ny gazety anay

Apetraho ny Église Locale