Mpanjaka I 10

Ie jinanji’ty mpanjaka-ampela’i Seba ty enge’i Selomò ty amy tahina’Iehovà y, le nimb’eo hamente aze an-tafatoño. Le am-pivavàrañe jabajaba ty nitotsaha’e e Ierosalaime ao, reketse rameva ninday fampafiriañe naho volamena tsifotofoto naho vatosoa; aa ie tsatoke amy Selomò, le fonga nabora’e ama’e ty arofo’e. Aa le vinale’i Selomò ontane’e iabio; tsy nietak’amy mpanjakay ty hatoi’e aze. Ie nioni’i mpanjaka ampela’i Sebay ze hene hihi’i Selomò, naho i anjomba niranjie’ey, naho ty mahakama am-pandambaña’e eo, naho ty fandaharam-piambesa’o mpitoro’eo naho ty fiatraha’o mpiatra’eo naho o siki’eo naho o mpitàm-pitovi’eo vaho o soroñe fañenga’e añ’anjomba’Iehovà o, le tsy nahakofòke. Aa le hoe re amy mpanjakay: Nitò i talily tsinanoko an-tanekoy ty amo taro’oo naho o hihi’oo. Fe tsy niantofako o saontsio ampara te nivotrak’atoy naho nitrea’o masokoo, le hehe te tsy ty vaki’e o natalily ahio; loho mandikoatse i talily tsinanokoy ty hilala’o naho ty firaoraoa’o. Haha ondati’oo naho fale o mpitoro’o mijohañe nainai’e añatrefa’o mahajanjiñe o hihi’oo. Andriañeñe t’Iehovà Andrianañahare’o te nahafale Aze ty nampipoke azo am-piambesa’Israele eo amy te nikokoa’Iehovà nainai’e donia t’Israele, ihe nanoe’e mpanjaka, hitoloña’o an-katò vaho an-kavantañañe. Le natolo’e amy mpanjakay ty volamena talenta zato-tsi-roapolo; naho fampafiriañe tsi-fotofoto vaho vatosoa; le lia’e tsy eo ka ty hamarom-pampafiriañe nitotsak’ao te amy natolo’i mpanjaka’i Sebaiy amy Selomò mpanjakay. Le ninday volamena boake Ofire naho nilogologo hatae almoge maro boake Ofire añe, vaho vatosoa, o firimbon-tsambo’i Kirameo. Niranjie’i mpanjakay amy hatae almogey, o fahañe añ’anjomba’Iehovà naho añ’anjomba’i mpanjakaio vaho o marovany miharo ty fititiha’o sakeraoo, le lia’e tsy nioniñe ampara’te henane ty hatae almoge hoe izay. Hene natolo’i Selomò mpanjaka amy mpanjaka-ampela’i Sebay ze nitea’e, ze nihalalia’e, mandikoatse ty natolo’e aze ty amo varam-panjaka’eo. Aa le nitolike re, nimpoly mb’an-tane’e añe, ie naho o mpitoro’eo. Ie amy zao, ty volamena niheo mb’amy Selomò ami’ty taoñe raike le nahatratse talenta volamena enen-jato-tsi-enem-polo-eneñ’amby, mandikoatse ze nendese’o mpivarotseo, naho o mpanao balikeo, naho boak’amy ze hene mpanjaka’o nte-Araboo, naho amo mpifeleke i taneio. Le nitsene’i Selomò mpanjaka fikalan-defoñe volamena roanjato pinepèke; sekele enen-jato ty fikalan-defoñe raike. Le nitsene’e fikalan-defoñe volamena-pinepèke telon-jato; mina telo ty volamena ami’ty fikalan-defoñe ao; vaho napo’i mpanjakay añ’anjomba’i Ala-Lebanoney irezay. Nandranjy fiambesatse jabajaba an-tsifam-biby ka i mpanjakay vaho pinepè’e ama’e ty volamena ki’e. Fanongà enen-dia ty nitroatse mb’amy fiambesatsey, le bontoly ty ambone an-dambosi’i fiambesatsey; naho fisampezam-pitàñe ty añ’ila’i fiambesatsey, vaho liona roe ty mijadoñe añ’ila’o fisampezam-pitàñeo. Liona folo-ro’amby ty nijohañe amy fanongañe enen-diay, añ’ila’e atoy naho añila’e aroy; vaho tsy eo ty nanoeñe nanahak’aze ndra am-pifeheañe aia. Songa tam-bolamena o fitovi’i Selomòo vaho hene volamena ki’e o fanak’amy anjomban’Ala-Lebanoneio, leo raike tsy nivolafoty, ie tsy natao vara tañ’andro’i Selomò. Nanañe firimboñan-tsambon-Tarsise reketse ty firimboñan-tsambo’i Kirame i mpanjakay; nivotrake eo o sambo’i Tarsiseo isa’ty telo taoñe, ninday volamena, volafoty, tsifa naho babakoto vaho remàleñe. Aa le nilikoare’i Selomò mpanjaka o mpanjaka’ty tane toy iabio ami’ty vara naho hihitse. Le hene nipay ty hiatrek’amy Selomò ty tane toy, ty hijanjiñe ty hilala napon’Añahare añ’arofo’e ao. Songa ninday ty ravoravo’e boa-taoñe ondatio, fanake volafoty naho fanake volamena naho sikiñe, naho fialiañe naho fampifiriañe, naho soavala vaho borìke. Namory sarete t’i Selomò naho mpiningi-tsoavala, arivo-tsi-efa-jato ty sarete’e naho mpiningi-tsoavala rai-ale-tsi-ro’arivo ze napo’e amo rovan-tsareteo vaho amy mpanjakay e Ierosalaime ao. Le nanoe’i mpanjakay hoe vato ty volafoty e Ierosalaime ao vaho nanoe’e hoe sakoañe am-bavatane ao o mendoraveñeo ty amo hamaro’eo. Nendeseñe boake Mitsraime naho e Kevè añe o soavala’i Selomòo; nangalak’amy Kevè ami’ty vili’e o mpanao balibali’i mpanjakaio. Le enen-jato sekelem-bolafoty ty nampiakarañe sarete boake Mitsraime añe, le zato-tsi-limampolo ty soavala; vaho am-pità’iareoo ty nahazoa’ze hene mpanjaka’o nte-Kiteo naho o mpanjaka’i Arameo.

Misoratra ao amin'ny gazety anay

Apetraho ny Église Locale