Iekezkèle 9

Aa le napaza’e am-piarañanañañe an-tsofiko ao ty hoe, Ampombao mb’etoy o mpifehe’ty rova toio, songa minday fialiañe mpijoy am-pità’e. Le ingo te nimb’etoy ty lahilahy eneñe boak’amy lalambey ambone mitolike mañavaratsey, songa indaty ninday fialiam-panjamanañe am-pità’e, ty raike nisikin-damba leny reketse tsifan-drano-mainte añ’ila’e eo; aa le nimoak’ao iereo nijohañe marine’i kitrely torisìkey eo. Le nionjoñe boak’an-toe’e ambone’o kerobeo ty engen’Añahare’Israele naho nivotrak’an-tsarirañe eo vaho kinoi’e indaty misaroñe lamba-leny minday tsifan-drano-mainte añ’ila’eoy; le hoe t’Iehovà tama’e, Akia rangao i rovay, maneñateñà Ierosalaime, vaho tomboho alama ze ondaty miselekaiñe naho mitoreo ty amo hativañe anoeñe añivo’eo. Le hoe re amo ila’eo, am-pitsanoñako, Akia oriho re miranga amy rovay naho lafao; ko imetea’o hiheveam-pihaino, vaho ko mitretrè. Zamano ty bey naho o ajalahio naho o somondrarao, o ajajao vaho o rakembao, fe ko harineañe ze tinombok’alama; mifotora an-toeko miavak’eo. Aa le nafoto’iareo am’ondatio, amo androanavy aolo’i kivohoio. Le hoe re am’iereo, Leoro i anjombay vaho atsafo an-dolo’o zinamañeo i kiririsay; mionjona! Aa le nimb’eo iereo nampibaibay amy rovay ao. Ie amy zao, naho fa zinama’iareo ondatio, izaho avao ty eo, le nihotrak’an-tareheko iraho nipazake ty hoe, Hoke! ry Iehovà Talè! ho fonga rotsahe’o hao ty sehanga’Israele ami’ty fampidoaña’o am’Ierosalaime o haviñera’oo? Aa hoe re amako, Losotse o hakeo’anjomba’Israele naho Iehodào, naho milopolopo lio i taney vaho lifo-keloke i rovay, ie nanoe’iereo ty hoe, Naforintse’Iehovà ty tane toy, vaho tsy mahavazoho t’Iehovà. Aa naho izaho, tsy hiheve ty masoko, tsy hitretrè, fa hondrohako am’iereo o sata’iareoo. Hehek’amy zao indaty misaroñe lamba-leny reketse tsifan-drano-mainte añ’ila’eoy, namolily ty hoe, Nanoeko i namantoha’o ahiy.

Misoratra ao amin'ny gazety anay

Apetraho ny Église Locale