Iekezkèle 35

Iekezkèle 35

Mboe niheo amako ty tsara’Iehovà nanao ty hoe: O ana’ondatio, atrefo ty vohi-tSeire vaho itokio, ami’ty hoe: Hoe ty tsara’Iehovà Talè: Ry Vohi-tSeire, atreatrèko irehe, vaho hatorakitsiko ama’o ty tañako hampangoakoahako azo ho tane bangý. Fonga ho rotsaheko o rova’oo le ho vahiny irehe vaho ho fohi’o te izaho Iehovà; amy t’ie nitan-keloke nainai’e naho nanolotse o ana’Israeleo ami’ty haozaram-pibara amy andron-kekoheko’iareoy, amy sam-pigadoñan-kaloloañey; kanao velon-dRaho hoe t’Iehovà Talè, le hañentseñako lio, hañoridañe azo ty lio; toe niheje’o ty lio’o, vaho lio ro hañotioty azo. Le hampangoakoaheko naho ho babangoañeko t’i Seire, vaho haitoako ama’e ty miranga naho ty mimpoly. Hatsefeko zamañe o vohi’eo, an-kaboa’o ey naho am-bavatane’o ao; vaho an-tsaka’o iaby ao ty hikorovoha’o zinevom-pibarao. Hampangoakoaheko nainai’e naho tsy hatroatse ka o rova’oo; vaho ho fohi’o te Izaho Iehovà. Amy te ihe nanao ty hoe, Ho ahiko i fifelehañe roe rey naho i tane roe rey, ho tavane’ay; fe tao t’Iehovà. Aa kanao velon-dRaho hoe t’Iehovà Talè, le ho toloñeko amy haviñerañe naho amy fikirañañe nitoloña’o an-karafelahiañey, vaho ho fohi’iereo te izaho ty nizaka azo. Le ho fohi’o te Izaho Iehovà ty nahatsanoñe ty fifosa nanoe’areo amo vohi’Israeleo ami’ty hoe: Kanao nengañe bangiñe, le natolotse antika habotseke. Niebotsebotse amako am-bava irehe, vaho nampitoabore’o rehake; hene tsinanoko. Hoe ty nafè’Iehovà Talè: Toly ndra hirebeke ty tane-bey toy naho koaheko irehe, manahake ty nirebeha’o amy lovan-anjomba’Israeley, t’ie nangoakoake; izay ka ty hanoako azo; ho bangìñe ka irehe, ry Vohi-Seire, naho i Edome iaby, eka ie iabike; vaho ho fohi’iereo te Izaho Iehovà.

Misoratra ao amin'ny gazety anay

Apetraho ny Église Locale