Fiantoñoñe I 5

O ana’i Reobeneo, tañoloñoloña’Israeleo, (toe ie ty valohan’ana’e fe nitivae’e ty fandrean-drae’e le natolotse amo ana’Iosefe, ana’Israeleo ty zom-pisamaha’e, fe tsy i zom-pisamahañey ty fiantoñoñe). Naozatse te amo rahalahi’eo t’Iehoda, le boak’ama’e ty talè; fe a Iosefe ty zon-tañoloñoloñañe. O ana’i Reobene, tañoloñoloña’Israeleo: i Kanoke naho i Palò, i Ketsrone vaho i Karmý. O ana’Ioeleo: i Semaià, ana’e t’i Goge, ana’e t’i Simý, ana’e t’i Mikà, ana’e t’i Reaia, ana’e t’i Baale, ana’e t’i Beerà nendese’i Tilgate-pilnesere mpanjaka’i Asore añe an-drohy. Ie ty nitalè’o nte-Reobeneo. O rahalahi’eo ty amo hasavereña’eo, ty fiantoño’iareo, le Ieiele, mpifehe naho i Zekarià naho i Bela ana’i Azaze, ana’i Semà, ana’Ioele nimoneñe e Aroere pake Nebò ao naho e Baale-meone; naho maniñanañe, nimoneñe pak’amy fimoahañe am-patrambe boak’an-tsaka Peratey amy te niraorao an-tane Gilade ao o añombe’iareoo. Nialy amo nte-Hagareo iereo tañ’andro’i Saole, le nihotrak’am-pità’iareo vaho nimoneñe an-kiboho’iareo nanitsike i tane atiñana’i Giladey. Nimoneñe tandrife iereo an-tane’i Basane ao pake Salkà añe o ana’i Gadeo. Ioele, mpiaolo naho i Safame, mpanonjohy naho Iaanày vaho i Safate e Basane ao. Le o longo’iareo añ’anjomban-droae’eo: i Mikaele naho i Mesolame naho i Sebà naho Iorày naho Iakane naho i Zibà vaho i Evre, fito. O ana’i Abikaileo, ana’i Korý, ana’Ioroake, ana’i Gilade, ana’i Mikaele, ana Iesisày, ana’Iakdò, ana’i Boze; i Aký, ana’i Abdiele, ana’i Goný, mpiaoloñ’anjomban-droae’iareo. Ie nimoneñe e Gilade e Basane ao, amo rova’eo naho am-piandraza’i Sarone pak’añ’efe’iareo añe. Ie ro nivolilieñe am-piantoñoñe tañ’andro’Iotame, mpanjaka’Iehodà naho tañ’andro’Iarovame, mpanjaka’Israele. Efats’ale-tsi-efats’arivo-tsi-fitonjato-tsi-enempolo ty nionjomb’añ’aly amo ana’i Reobeneo naho o nte-Gadeo naho i vakim-pifokoa’i Menasèy, songa anake nahasibeke, ondaty nahafinday fikalañe naho fibara naho nahafañòhatse fale vaho nahimbañe an-kotakotake, efats’ale-tsi-efats’arivo-tsi-fiton-jato-tsi-enempolo ty nimbañ’aly. Nialia’iareo o nte-Hagrio naho Ietore naho i Nafise vaho i Nodabe. Nimbaeñe iereo, le natolotse am-pità’iareo o nte Hagrio rekets’o mpiama’e iabio; amy te nikanjie’iareo an-kotakotak’ao t’i Andrianañahare, le vinale’e i halaliy, amy t’ie niato. Fonga tinava’iareo o añombe’eo; naho ty rameva’iareo lime-ale naho añondry roe-hetse-tsi-lime-ale naho borìke ro’arivo; naho sandriñe rai-hetse. Le maro ty nitsingoro ho mate amy te an’Andrianañahare i aliy. Le nimoneñe ao iereo nandimbe iareo pak’amy fandrohizañey. Nimoneñe amy taney o ana’i vakim-pifokoa’i Menasèio, le nihamaro boake Basane pake Baale-kermone naho e Senire vaho pak’am-bohi-Kermone añe. Le o mpiaolon’anjomban-droae’iareoo: i Efere naho Isý naho i Eliele naho i Azriele naho Iiremià naho i Hodavià vaho Iakdiele, fanalolahy, maram-bintañe songa talèn’anjomban-droae’e, f’ie niota aman’Añaharen-droae’iareo, nañarapilo mb’amo ndrahare’ondati’i tane’rinoan’Añahare aolo’iareoo. Aa le nitroboen’Añahare’Israele ty tro’i Pole mpanjaka’i Asore naho ty tro’i Tilgate-Pilnesere mpanjaka’i Asore, le nendese’iereo añe o nte-Reobeneo naho o nte-Gadeo vaho i vakim-pifokoa’o nte-Menasèoy; nenteñe mb’e Kalake naho e Kabore naho e Karà vaho mb’an-tsaka’i Gozane añe pak’androany. O ana’i Levio: i Gersone naho i Kehàte vaho i Merarý. O ana’i Kehàteo: i Amrame naho Iitsare naho i Kebrone vaho i Oziele. O ana’i Amrameo: i Aharone naho i Mosè vaho i Miriame. O ana’i Aharoneo: i Nadabe naho i Abihoo, i Elazare vaho Itamare. Nasama’i Elazare, t’i Pinekase, le nasama’i Pinekase t’i Abisoa. Nasama’i Abisoa t’i Boký le nasama’i Boký t’i Ozý. Nasama’i Ozý t’i Zerakià, le nasama’i Zerakià, t’i Meraiote. Nasama’i Meraiote t’i Amarià, le nasama’i Amarià t’i Akitobe. Nasama’i Akitobe t’i Tsadoke, le nasama’i Tsadoke t’i Akimatse. Nasama’i Akimatse t’i Azarià, le nasama’i Azarià t’Iokanane. Nasama’Iokanàne t’i Azarià (ie ty nitoloñe ho mpisoroñe amy anjomban’Añahare rinafi’i Selomò e Ierosalaimey.) Nasama’i Azarià t’i Amarià, le nasama’i Amarià t’i Akitobe. Nasama’i Akitobe t’i Tsadoke, le nasama’i Tsadoke t’i Salome. Nasama’i Salome t’i Kilkià, le nasama’i Kilkià t’i Azarià. Nasama’i Azarià t’i Seraià, le nasama’i Seraià t’Iehotsadake. Nasese an-drohy t’Iehotsadake amy nanesea’Iehovà am-pità’i Nebokadnetsare t’Iehodà naho Ierosalaime.

Iscriviti alla nostra newsletter

Installa Église Locale