Fiantoñoñe I 20

Fiantoñoñe I 20

Ie nibalike ty taoñe, an-tsa-piavota’o mpanjakao hialy, le nampionjone’Ioabe ty haozara’o lahindefoñeo naho nampangoakoaheñe ty tane’o ana’i Amoneo, le nimb’e Rabà mb’eo niarikatok’aze. Mbe nihenekeneke e Ierosalaime añe t’i Davide, le Ioabe ty namofoke i Rabà vaho nandrotsak’aze. Rinambe’i Davide añ’ambone’i mpanjaka’iareoy ty sabaka’e le nizoe’e t’ie nilanja talentam-bolamena raike reketse vatosoa, le naombe ami’ty añambone’i Davide vaho nakare’e ty nikopaheñe amy rovay, toe tsifotofoto. Nendese’e boak’ao ondatio le nampitromahe’e an-dasý naho lasarì-vý vaho fekoñe. Ie ty nanoe’i Davide amo fonga rova’o ana’i Amoneo. Le hene nimpoly mb’e Ierosalaime mb’eo t’i Davide naho o’ondatio. Ie añe, le nifandrapake ty aly amo nte-Pelistio e Gezere ao, naho zinevo’i Sibekay nte-Kosate henane zay t’i Sipay, ana’o joalalahio; le nampiambanèñe iereo. Nipoake indraike ty aly amo nte-Pelistio; Le zinevo’i Elkanane ana’Iaire, t’i Lakmý rahalahi’i Goliate nte Gite, i taran-defo’ey nanahake ty bodam-panenoñe. Ie nipoak’aly indraike e Gate ao, le teo t’indaty nijoala, ty fitonto’o rambom-pità’e naho rambom-pandia’eo le roapolo-efats’amby, ki-ene-ki-eneñe; ie nitariran-joalalàhy ka. Ie nisigihe’e t’Israele, le vinono’Ionatane ana’i Simeà rahalahi’i Davide. Songa tarira’ty joalalahy e Gate ao; sindre nizevoñem-pità’i Davide naho ty fità’o mpitoro’eo.

Iscriviti alla nostra newsletter

Installa Église Locale