Iehosoa 21

Nañarine amy Elatsare mpisoroñe naho amy Iehosoa ana’i None, naho amo talèm-pifokoa’o ana’Israeleo o talen-droaen-te-Levio; le nisaontsy am’iereo e Silò an-tane Kenaàne ao ami’ty hoe: Nandilia’Iehovà am-pità’i Mosè ty hanolorañe anay rova himoneña’ay rekets’o fiandrazañe mañohok’aze ho amo hare’aio. Aa le natolo’o ana’Israeleo amo nte-Levio, boak’amo fanaña’iareoo ty amy tsara’Iehovà y, o rova retoa naho o fiandraza’eo. Aa le niboak’an-tsapake ty ho a o hasavereña’o nte-Kehàteo: Le niazo’o ana’i Aharone mpisoroñe, nte-Levio, an-tsapake, am-pifokoa’Iehodà naho am-pifokoa’i Simone, naho am-pifokoa’i Beniamine, ty rova folo-telo amby. Ty ila’o ana’i Kehàteo ro nandrambe an-tsapake boak’an-kasavereñam-pifokoa’i Efraime naho am-pifokoa’i Dane, naho amy vakim-pifokoa’i Menasèy: rova folo. Le niazo’o ana’i Gersoneo an-tsapake boak’an-kasavereñam-pifokoa’Isakhare naho boak’am-pifokoa’i Asere, naho boak’am-pifokoa’i Naftalý, vaho boak’ami’ty vakim-pifokoa’i Menasè e Basane, ty rova folo-telo’amby. Le niazo o ana’i Merarìo ty amo hasavereña’eo, an-tsapake, tam-pifokoa’i Reobene, naho tam-pifokoa’i Gade, naho tam-pifokoa’i Zebolone, ty rova folo-ro’amby. Aa le natolo’o ana’Israeleo amo nte-Levio an-tsapake i rova rey reketse ty tane fiandrazañe mañohoke iareo, ty amy lili’Iehovà am-pità’i Mosèy. Aa le natolotse boak’am-pifokoa’o ana’Iehodao naho am-pifokoa’o ana’i Simoneo o rova toñoneñe ami’ty añara’e rezao: Ho amo ana’i Aharoneo, raik’amo hasavereñan-te-Kehàte ana’i Levio; fa a’iareo i kitsapake valoha’ey, natolotse iareo ty Kiriate-Arba, (ana’i Anàke t’i Arba)—i Kebrone izay—am-bohibohi’Iehoda ao, rekets’o tane fiandrazañe mañohok’azeo. Fe natolo’iareo amy Kalebe ana’Iefonè ho fanaña’e ka o teteke naho tanà’i rovaio. Natolo’iareo amo ana’i Aharone mpisoroñeo t’i Kebrone naho o fiandraza’eo ho fitsoloham-pamono, naho i Libnà reke-piandrazañe; naho Iatire reke-piandrazañe naho i Estemoa reke-piandrazañe naho i Kolone reke-piandrazañe naho i Debire reke-piandrazañe; naho i Aine reke-piandrazañe naho Iotà reke-piandrazañe naho i Bete-semese reke-piandrazañe; rova sive boak’amy fifokoa roe rey. Naho boak’am-pifokoa’i Beniamine, i Gibone reke-piandrazañe naho i Gebà reke-piandrazañe, naho i Anatote reke-piandrazañe naho i Almone reke-piandrazañe: rova efatse. I hene rovan’ana’i Aharone mpisoroñe rey: rova folo-telo’amby reke-piandrazañe. Aa le o hasavereñan’ana’i Kehàte, nte-Levio, o ilan’ana’i Kehàteo: i rova niazo’iareo an-tsapake boak’am-pifokoa’i Efraime rey: natolotse iareo ty Sekeme am-bohibohi’i Efraime ao reke-piandrazañe ho rovam-pitsoloha’ty namono naho i Gezere reke-piandrazañe naho i Kib’tsaime reke-piandrazañe, naho i Bete-korone reke-piandrazañe: rova efatse. Le boak’am-pifokoa’i Dane, i Eltekè reke-piandrazañe, naho i Gibetone reke-piandrazañe naho i Ai’ialone reke-piandrazañe naho i Gat-rimòne reke-piandrazañe: rova efatse. Le boak’ami’ty vakim-pifokoa’i Menasè, i Tanake reke-piandrazañe, naho i Gat’rimòne reke-piandrazañe: rova roe. I hene rova’o ana’i Kehàte ila’eo le folo reke-piandrazañe. Le boak’amy vakim-pifokoa’ila’i Menasèy ka ty nanolorañe o ana’i Gersone amo hasavereña’i Levioo, i Golane e Basane ao reke-piandrazañe, ho rovam-pitsoloha’ty namono ondaty naho i Bisterà reke-piandrazañe: rova roe. Le boak’am-pifokoa’Isakhare, i Kisone reke-piandrazañe naho i Dabarè reke-piandrazañe, Iarmote reke-piandrazañe, i Enganime reke-piandrazañe, rova efatse. Le boak’am-pifokoa’i Asere: i Misale reke-piandrazañe naho i Abdone reke-piandrazañe, i Kelkate reke-piandrazañe, naho i Rekobe reke-piandrazañe: rova efatse. Le tam-pifokoa’i Naftalý, i Kedese e Galilà reke-piandrazañe ho rovam-pitsoloha’ty namono ondaty naho i Kamote’dore reke-piandrazañe naho i Kartane reke-piandrazañe: rova telo. Ze hene rova’o nte-Gersoneo ty amo hasavereña’eo: rova folo-telo’amby reke-piandrazañe. Le ho amo hasavereñan’ana’i Merario, ty sisa’amo nte-Levio: Boak’am-pifokoa’i Zebolone, Iok’neame reke-piandrazañe, naho i Kartà reke-piandrazañe, i Dimnà reke-piandrazañe, vaho i Nahalale reke-piandrazañe: rova efatse. Le boak’am-pifokoa Reobene: i Betsere reke-piandrazañe, naho Iatsà reke-piandrazañe, i Kedemote reke-piandrazañe, naho i Mefaate reke-piandrazañe: rova efatse; le tam-pifokoa’i Gade, i Ramote e Gilade ao reke-piandrazañe, ho rovam-pitsoloha’ty namono ondaty, naho i Mahanaime reke-piandrazañe, naho i Khesbone reke-piandrazañe, Iaazere reke-piandrazañe: rova efatse ty tonto’e. Aa le o rova natolotse amo ana’i Merario iabio, sisa’o nte Levio ty amo hasavereña’eo: rova folo-ro’amby ty niazo’iareo an-tsapake. Ze hene rova’o nte-Levio: rova efa-polo-valo’amby reke-piandrazañe, añivom-panaña’o ana’Israeleo ao; I rova rezay ro songa reke-piandrazañe; le izay ty ie amy fonga rova rey. Aa le hene natolo’Iehovà am’Israele i tane nifantà’e hatolotse an-droae’iareoy le nitavane’iereo vaho nimoneñañe. Le nampitofà’Iehovà o nañohoke iareoo ty amo hene nifantà’e aman-droae’iareoo; vaho leo raik’amo rafelahi’eo tsy nitroatse am’iereo, fa natolo’Iehovà am-pità’iareo ze fonga rafelahi’iareo. Tsy teo ty hasoa nipoke ze nampitama’Iehovà amy anjomba’Israeley, songa nitendreke.

Unseren Newsletter abonnieren

Église Locale installieren