Sabo 85

Ry Iehovà nisohe’o ty tane’o; nafote’o ty fañondevoza’Iakobe; napo’o ty tahi’ondati’oo Fonga nakopo’o o hakeo’iareoo; Selà nasita’o iaby ty fifombo’o; niambohoa’o ty fiforoforoan-kaviñera’o. Ampolio zahay ry Andrianañaharem- pandrombahañ’anay, vaho apoho ty helo’o ama’ay. Ho viñera’o nainai’e hao zahay? Hampitoie’o an-tariratse kitro añ’afe’e hao, o helok’añ’arofo’oo? Tsy ihe hao ty hameloñe anay indraike, hirebeha’ondati’oo? Atorò anay ty fiferenaiña’o, ry Iehovà, toloro o fandrombaha’oo. Ho tsendreñeko ty ho tsarae’Iehovà Andrianañahare; fa fañanintsiñe ty taroñe’e am’ondati’eo naho amo noro’eo; le ee abey t’ie tsy hibalintoa mb’an-kadagolàñey. Toe marine’o mañeveñe ama’eo ty fandrombaha’e, hitobea’o enge’eo an-tanen-tikañ’ao. Mifañaoñe ty fiferenaiñañe naho ty hatò; mifañondroke ty havantañañe naho ty filongoañe. Mivoañe hirik’an-tane ao ty hatò, mijilo hirik’an-dikerañe añe o havantañañeo. Eka, hanjotso ty soa t’Iehovà, vaho hañomey ty voka’e ty tane’ay toy. Hiaolo Aze ty havañonañe, hañajaria’e lalañe ho liam-pandia’e.

Baiboly Tandroy

Copyright © 2023 Steve Lellelid Language: Tandroy (Malagasy, Tandroy-Mahafaly) DRAFT VERSION This translation is made available to you under the terms of the Creative Commons Attribution Share-Alike license 4 — CC-BY-SA-4.0 — CC-BY-SA-4.0

Abonner på nyhetsbrevet vårt

Hold deg oppdatert på nye profiler, arrangementer og plattformnyheter.