Sabo 135

Treño t’Ià. Bangò ty tahina’Iehovà; mandrengea, ry mpitoro’Iehovà, Ry mpijohañe añ’anjomba’Iehovà, an-kiririsan’anjomban’Añahareo, Rengeo, t’Ià, amy te soa t’Iehovà; sabò i tahina’ey ty amy volonahe’ey. Amy te jinobo’Ià ho am-bata’e t’Iakobe, ho vara’e t’Israele. Fantako te ra’elahy t’Iehovà, le mandikoatse ze atao ‘ndrahare iaby t’i Talè. Manao ze satri’e t’Iehovà, an-dindiñe añe naho an-tane atoy, amy riakey vaho an-tsikeokeoke ao. Ampionjone’e hirik’añ’olon-tane añe ty mika; anoa’e helatse o orañeo vaho akare’e boak’an-driha’e ao ty tioke. Zinama’e o tañoloñoloña’i Mitsraimeo, ndra ondaty ndra biby. Nañiraha’e viloñe naho halatsàñe mb’añivo’areo ao, ihe ‘nio, ry Mitsraime, amy Parò vaho amo mpitoro’e iabio. Narotsa’e ty fifeheañe maro, binaibai’e o mpanjaka fanalolahio, i Sikone, mpanjaka’o nte Emoreo, naho i Oge, mpanjaka’i Basane, vaho o fonga fifeleha’i Kanàneo; Le natolo’e ho lova ty tane’iareo, ho lova’Israele, ondati’eo. Ry Iehovà, tsy modo ty tahina’o, ty fitiahiañ’azo ry Iehovà, le nainai’e donia. Fa homei’Iehovà to ondati’eo le ho tretreze’e o mpitoro’eo. Volafoty naho volamena o raham-pahasive’o kilakila ‘ndatioo, ty sata-pità’ondaty. Ie manam-bava, fe tsy mirehake, ama-maso, fe tsy mahatrea; aman-tsofy, fe tsy mahatsanoñe, vaho tsy mahakofòke o vava’iareoo. Ho hambañe am’iereo o mpanao iareoo, Eka, ze hene miato am’iereo. Ry anjomba’Israele, Andriaño t’Iehovà; ry akiba’i Aharone, andriaño t’Iehovà; ry kivoho’i Levio, andriaño t’Iehovà; ry mpañeveñe am’Iehovà, andriaño t’Iehovà. Andriaño boak’e Tsiône ao t’Iehovà, ry mpimoneñe e Ierosalaimeo. Treño t’Ià.

Baiboly Tandroy

Copyright © 2023 Steve Lellelid Language: Tandroy (Malagasy, Tandroy-Mahafaly) DRAFT VERSION This translation is made available to you under the terms of the Creative Commons Attribution Share-Alike license 4 — CC-BY-SA-4.0 — CC-BY-SA-4.0

Abonner på nyhetsbrevet vårt

Hold deg oppdatert på nye profiler, arrangementer og plattformnyheter.