Sabo 91

Sabo 91

I mpimoneñe am-pipalira’i Andindimoneñeiy, ty hitoetse añ’alo’i El-Sadai ao, Hanoako ty hoe t’Iehovà: Ty fiampirako, ty rova fitsolohako, i Andrianañahare fiatoakoy. Ie ty mpañaha azo boak’am-bitsom-pamandri-boroñe ao, naho boak’amy biloka mahahomakey. Haholonkolo’e am-bolon-ela’e ao irehe, ambane’o ela’eo ty hipalira’o; fikalan-defo naho fikala-meso ty hatò’e. Tsy hahahembañ’azo ty hetraketrak’an-kaleñe, ndra ty ana-pale mihirirìñe an-tariñandroke. Ndra ty kiria mitingañe añ’ieñe ao ndra ty angorosy mamotsake naho antoandro. Arivo ty mete hikorovok’añ’ila’o eo, le rai-ale ty am-pitàn-kavana’o eo, f’ie tsy hitotok’azo. O fihaino’oo avao ro hisamba, hahaisake ty fandilovañe o lo-tserekeo. Amy te Iehovà, fitsolohako, i Andindimoneñey, ty nanoe’o fimoneñañe, Tsy hidoiñe ama’o ty hankàñe, tsy hitotofan-angorosy ty akiba’o, Fa hafanto’e ama’o o anjeli’eo, hañambeñe azo amo lia’o iabio; hañotrotroa’e am-pità’e ao, tsy mone hadasi’o ami’ty vato ty fandia’o. Ho lià’o ty liona naho ty fandrefeala; ho hitsakitsahe’o ambanem-pandia’o eo ty liona-tora’e naho i mereñey. Kanao ifahara’e koko, ho hahako, havotrako an-kaboañe ey amy te fohi’e ty añarako. Ho kanjie’e, le ho toiñeko; hindrezako te am-poheke, ho votsorako vaho ho tolorako asiñe. Heneñeko halava’havelon-dre; vaho hampahaoniñeko aze ty fandrombahako.

Abonneer op onze nieuwsbrief

Église Locale installeren