Iobe 19

Aa le hoe ty natoi’Iobe: Pak’ombia nahareo ro mbe hampiojeoje ty troko naho hampipinepinek’ahy an-tsaontsy? Im-polo ty nañonjira’areo ahiko vaho tsy mahasalats’anahareo ty mañaraty ahy. Aa naho nitò t’ie nandilatse, le midoñ’amako avao i tahiñey. Naho mivongevòngek’amako nahareo manisý ahy amo injekoo, Le mahafohina te nifotetse amako, t’i Andrianañahare vaho narikato’e amako ty harato’e. Mitoreo iraho fa nikatramoeñe fe tsy amam-pañaoñe; mikanjy, fe tsy añomean-to. Finahepahe’e ty lalako tsy handenàko, naho napo’e añ’oloñoloko ao ty ieñe. Nampikorendahe’e amako ty engeko, vaho nafaha’e an-dohako ao i sabakam-bolonahetsey. Narotsa’e mb’etia mb’atia, le fa añe iraho: ombota’e hoe hatae ty fitamàko. Nasoleba’e amako ka ty haviñera’e vaho atao’e ho rafelahi’e. Mitotoke amako o lahindefo’eo, mitoañe mb’amako le mitobe añariary i kibohokoy. Napo’e lavitse ahy o rahalahikoo, vaho fonga alik’amako o nimpiamakoo. Namorintseñe ahy o longokoo, nañaliño ahy o rañekoo. O mitobok’añ’anjombakoo, naho o anak’ampatakoo, songa manao ahy ho ambahiny, toe renetane am-pahaisaha’e. Tokaveko ty mpitoroko, fe tsy manoiñe, ndra te itoreovam-bavako. Mampangorý i valiko ty kofòko, vaho heje’ty amorin-dreneko. Manirìk’ahy o anak’ajalahio, ie miongake iraho, onjira’iareo. Malaiñ’ahy iaby o atehenakoo; tsambolitio’o nikokoakoo. Mipitek’ami’ty holiko naho ami’ty nofoko o taolakoo, vaho an-tain-tsìko avao ty nimolaoreko. Tretrezo iraho, iferenaiño, ry rañeko; fa nipaok’ahy ty fitàn’Añahare. Ino ty ampisoaña’areo ahy hoe t’ie Andrianañahare? Tsy mahaeneñ’anahareo hao o holikoo? Ee te nisokireñe o volako zao! Lonike t’ie nipatereñe am-boke ao! Ee any t’ie sokirañe an-tsantilò viñe naho firake am-bato tsy ho modo! Fa naho izaho, apotako te veloñe i Mpijebañ’ahikoy, ie hijohañe ambone’o lembokeo an-tsengaha’e añe. Le ie fa momoke ty holiko— ty mianto toy, ho treako boak’ami’ty nofoko t’i Andrianañahare; Eka, hahatrea Aze iraho; o masokoo ro hahaisak’aze fa tsy ty ila’e. Momoke o añ’ovakoo! Hera hanao ty hoe nahareo: Akore ty hampisoañan-tikañ’aze? Ino ty lengo’e ho tendreke hanesehañ’aze? Mihembaña amy fibaray; amy te minday falilovam-pibara o haviñerañeo, hahafohina’areo te eo ty zaka.

S'abonner à notre newsletter

Installer Église Locale