Iesaià 62

Tsy hitsin-draho ty amy Tsione, tsy hitofa ty am’Ierosalaime; ampara’te mionjom-beo am-pireandreañe ty fandrebaha’e, naho manahake ty firebarebam-pañilo ty fandrombaha’e. Ho isa’o fifeheañeo ty fandreketa’o, naho o mpanjaka iabio ty enge’o; vaho ho kanjieñe tahinañe vao irehe, ze ho toñonem-palie’Iehovà. Ie ho sabaka soa am-pità’Iehovà ka, naho banetram-panjaka an-dela-pitàn’Añahare. Tsy hatao Naforintseñe ka irehe, naho tsy ho tokaveñe ty hoe mangoakoake ka ty tane’o; fa hoe ty hatao azo: An-Kafaleako, naho ty tane’o: Manam-baly; amy te ifalea’Iehovà, vaho hanam-baly ty tane’o. Hambañe ami’ty fañengàn’ajalahy ty somondrara miehañe, ty hañengà’o ana-dahi’oo azo; vaho manahake ty firebeha’ty mpañenga amy enga-vao’ey, ty hifalean’Añahare’o ama’o. Fa nampijadoñeko ambone’kijoli’o ey ty mpijilo, ry Ierosalaime, tsy hianjiñe handro an-kaleñe iereo; ko mitofa ry mpanohiñe Iehovà o, vaho ko apo’areo t’ie hitofa, ampara’te oriza’e, eka ampara’te hanoe’e fandrengea’ty tane toy t’Ierosalaime. Fa nifanta am-pità’e havana t’Iehovà, an-tsiran-kaozara’e: T’ie tsy ho fahanako amo ampemba’oo o rafelahi’oo, naho tsy hinoman’ambahiny ka o divay nitoloñe’oo. O nanontoñe azeo ty hikama ama’e, naho handrenge Iehovà, vaho o nitimpoñe azeo ty hinoñe ama’e, an-kiririsan-toeko miavake eo. Iziliho, iziliho o lalam-beio, hajario ty lala’ondatio; ampitoabòro, ampitoaboro i tatakey, hene aveveo o vatoo, zonjò viloñe ambone’ondatio ey. Ingo fa nikoike pak’añ’olon-tane añe t’Iehovà, Ano ty hoe t’i Tsione anak’ampela: Ingo, mb’eo ty fandrombaha’o; rekets’i tambe’ey, ama’e ka ty vale-soa’e. Hatao ty hoe iereo: Ondaty masiñe, jineba’Iehovà. Ho tokaveñe ty hoe irehe: Tsinoeke; Rova tsy Naforintseñe.

Unseren Newsletter abonnieren

Église Locale installieren