Iesaià 50

Iesaià 50

Hoe t’Iehovà: Aia ty takelam-panarahañe naneseako an-drene’areo? Ia amo mpampisongo amakoo ty nandetahako anahareo? Toe niletahañe ty amo tahi’areoo, vaho o fiolà’areoo ty naneseañe ty rene’areo. Akore te tsy teo ty ondaty, te izaho nimb’eo? Ie nikaike, tsy teo ty ho nanoiñe? Bory hao ty sirako tsy hahafijebañe? Aa vaho po-kaozarañe hao raho tsy haharombake? Heheke maiheko i riakey te endahako; anoeko ratraratra o sakao; mantiñe o fia’eo kanao tsy an-drano, mate’ty arandrano. Sikinako mainte o likerañeo, añombeako gony ho saroñe. Fa natolo’i Talè, Iehovà ahiko ty famele’o nanàrañeo, hampanintsiñako an-drehake o mondetseo; barakakaofe’e boa-maraiñe tsekafe’e o sofikoo hitsanoñe hoe t’ie mpioke. Fa nisokafe’i Talè, Iehovà o sofikoo, le tsy nanjehatse, tsy niamboho. Natoloko amo mpandafao ty lambosiko, naho amo mpañono-boloo ty fifiko; tsy naetako ami’ty ònjitse naho ami’ty rora ty tareheko. Hañolotse ahy t’i Talè, Iehovà, aa le tsy nisalatse; nampigañeko hoe vato-paike ty tareheko, le fantako te tsy ho meñatse; fa marine ao i Mpañatò ahikoy. Ia ty hifañotake amako? Antao songa hiongake; Ia ty rafelahiko? Angao re hitotoke amako. I Talè, Iehovà ro mpañolotse ahy; ia ka ty hamatse ahy? Fonga hihamodo hoe tsirodea; ho vazañem-pizara. Ia ama’areo ty mañeveñe am’Iehovà, naho mañorike ty feo’i mpitoro’ey? Aa ndra t’ie mañavelo añ’ieñe ie tsy aman-kazavàñe, le hiatoa’e ty tahina’Iehovà, vaho hirampia’e t’i Andrianañahare’e. O ry mpamiañe afoo, o mpisikiñe vaen-afoo, mandià amo lebaleban’afo’areoo, amo vaen’afo niviañe’areoo. zao ty hizò anahareo an-tañako t’ie handre an-anahelo.

Unseren Newsletter abonnieren

Église Locale installieren