Iesaià 6

Tamy taoñe nihomaha’i Oziày, le nitreako miambesatse am-piambesatse abo naho nonjoneñe t’i Talè vaho nahaatseke i anjombay ty saravi’e. Nijohañe ambone’e ey o seràfeo; songa aman’elatse eneñe, ty roe nanakoñe ty lahara’e, ty roe nanaroñe o fandia’eo vaho nitiliñe ty roe. Ie nifampikoike ty hoe: Masiñe, masiñe, masiñe, t’Iehovà’i Màroy; lifotse ty enge’e ty tane bey toy. Nampiezeñezeñe o tokonañeo i feon-koikey, vaho natsafe’ty hatoeñe i anjombay. Le hoe iraho, Hankàñe amako, rebake, fa ondaty maleo-tsoñy, vaho añivo’ondaty maleo-pivimby ty itobohako; fa nahatrea i Mpanjakay, Iehovà’i Màroy, o masokoo. Nitiliñe mb’amako amy zao ty seràfe ninday vato mirekake am-pità’e, ie rinambe’e an-tsadrò boak’amy kitreliy ao, le natoho’e ami’ty soñiko naho nanao ty hoe: Hehe, tinoho’ty raha toy o fivimbi’oo, vaho nijebañańe o tahi’oo. Tsinanoko ka ty fiarañanaña’i Talè nanao ty hoe: Ia ty hiraheko, vaho ia ty homb’eo ho anay? Le hoe iraho: Intoy iraho; iraho! Le hoe re: Akia, le saontsio am’ondaty retoañe: Toe mijanjiñe nahareo fe tsy mahafohiñe, mañente fe tsy mahaoniñe. Ampibobòho ty arofo’ondaty retoa, le ampivalagìño o ravembia’iareoo, akipeo o fihaino’iareoo; tsy mone hahaisake o fihaino’iareoo, naho hitsendreñe o ravembia’iareoo, naho hahafohiñe o arofo’iareoo, vaho himpoly ho jangañeñe. Le hoe iraho: O Talè, pak’ombia? Le hoe ty natoi’e: Ampara’te kòake o rovao tsy amam-pimoneñe, naho tsy ama’ondaty o anjombao, vaho vata’e ratraratra i taney, ie fa naveve’Iehovà añe ondatio, vaho maro ty toetse hoakoake añivo’i taney. Aa ndra te i faha-folo’ey ro sehanga’e, mbe habotseke avao; fe manahake te mbe eo ty foto’o mendoraveñeo naho o kileo t’ie firaeñe, le i tiry miavakey ty ho foto’e.

Unseren Newsletter abonnieren

Église Locale installieren