Fiantoñoñe I 19

Ie añe izay le nivilasy t’i Nakase mpanjaka’o ana’i Amoneo, le nandimbe aze nifehe i ana-dahi’ey. Le hoe t’i Davide: ho tretrezeko t’i Kanone ana’i Nakase amy te nitretrezen-drae’e. Aa le nañitrifa’i Davide ìrake hañohò aze ty aman-drae’e. Aa le nimb’an-tane’o ana’i Amoneo mb’amy Kanone ao o mpitoro’i Davideo hañohò’aze, fe hoe o roandria’o ana’i Amoneo amy Kanone; Atao’o te hiasy an-drae’o hao t’i Davide, ie nañihitrifa’e mpañohò? tsy mone nimb’ama’o mb’etoy i mpitoro’e rey hijilojilo naho hitsoetsoeke vaho hitingatingañe an-tane atoy? Aa le rinambe’i Kanone i mpitoro’i Davide rey vaho niharate’e naho tinampa’e añivo o saro’eo, pak’am-piambesara’e vaho nanoe’e soike. Nimb’eo amy zao ty nitalily amy Davide i nanoañe indaty reiy. Le nirahe’e ty hifanalaka ama’e; fa loho salatse indaty rey. Le hoe i mpanjakay, Mandiñisa e Ieriko ao ampara’te mitombo o tateahe’areoo, izay vaho mimpoly. Ie napota’o ana’i Amoneo t’ie mañati-fofots’amy Davide, le nihitrife’i Kanone naho o ana’i Amoneo ty volafoty arivo hañaramà’iareo sarete naho mpiningi-tsoavala boake Arame-naharaime naho boak’e Arame-maakà vaho boak’amy Tsobà. Aa le nañeke sarete telo-ale-tsi-ro’arivo naho ty mpanjaka’i Maakà rekets’ondati’eo; le nimb’e Medebà mb’eo iereo vaho nitobe. Nifanontoñe ka o ana’i Amone boak’an-drova’eo, le nimb’eo hialy. Ie jinanji’i Davide, le nirahe’e mb’eo t’Ioabe naho ze fonga fanalolahy amy valobohokey. Niavotse o ana’i Amoneo nandahatse i aliy an-dalambei’i rovay vaho niereñereñe an-kivoke ey o mpanjaka niavio. Ie nizoe’Ioabe te niatrek’aze aolo naho amboho’i hotakotakey, le jinobo’e iaby ty fanalolahi’Israele vaho nampiatrefe’e amo nte-Arameo. Nafanto’e ho am-pità’i Abisay rahalahi’e ondaty ila’eo le sindre nilahatse hiatreke amo ana’i Amoneo. Aa hoe re, Naho loho maozatse amako o nte-Arameo le ihe ty hañolotse ahy; aa naho maozatse te ama’o ka o ana’i Amoneo le izaho ty hañolotse azo. Mahasibeha le antao tika hamente t’ie maozatse ho am’ondatin-tikañeo naho ho amo rovan’Añaharen-tikañeo; le hanoe’Iehovà ze arofoana’e hahasoa. Aa le niheo mb’eo t’Ioabe naho ondaty mpiama’eo nihotakotak’amo nte Arameo, ie nitriban-day aolo’e eo. Aa ie nioni’o ana’i Amoneo te nilay añe o nte-Arameo le nilay añatrefa’i Abisay, rahalahi’e ka vaho nimoak’an-drova ao. Aa le nimpoly mb’e Ierosalaime añe t’Ioabe. Ie nirendre’o nte-Arameo te ginio’Israele, le nañitrike ìrake, nangalake o nte-Arame alafe’i Sakaio, rekets’i Sopake mpifehe’ty valobohò’i Hadadezere ho mpiaolo. Natalily amy Davide, le natonto’e iaby t’Israele naho nitsake Iordaney mb’eo naho nivotrak’am’iereo vaho nalaha’e am’iereo i hotakotakey. Aa ie nalaha’i Davide amo nte-Arameo i aley le nifandrapaha’e. Nilay añ’atrefa’Israele o nte-Arameo; le zinevo’i Davide ty fito-arivo amo nte-Arame an-tsareteo naho ty efats-ale an-tomboke vaho vinono’e t’i Sopake mpifehe’i valobohòkey. Ie tendrek’amo mpitoro’i Haderezereo te ginio’Israele, le nifampilongo amy Davide naho nitoroñe aze vaho tsy nimete handrombake o ana’i Amoneo ka o nte-Arameo.

Unseren Newsletter abonnieren

Église Locale installieren