Fiantoñoñe I 13

Aa le nisafiry amo mpifelek’arivo naho zatoo vaho amo mpifehe iabio t’i Davide. Le hoe t’i Davide amy valobohò’Israele iabiy, Aa naho mete ama’areo naho am’Iehovà Andrianañaharen-tika, antao hañitrike mb’eo mb’eo hikoike o longontika sisa amo hene tane’Israeleo, rekets’o mpisoroñe naho nte-Levý androva naho am-paripari’iareoo, hifanontoñe, hampolian-tika mb’etoa i vatan’Añaharen-tikañey, ie tsy nipaiaen-tika tañ’andro’i Saole. Le nanao ty hoe i valobohòkey, t’ie hanoeñe, fa nimete am-pihaino’ze hene ondaty. Aa le natonto’i Davide t’Israele iaby, boake Sikore e Mitsraime añe pak’am-pimoahañe e Kamate añe, hindesa’iareo boake Kiriate-Iearime ao i vatan’Añaharey. Aa le nindre am’Israele iaby t’i Davide nionjomb’e Baalà—i Kiriate-Iearime’Iehoda—mb’eo hindesa’iareo boak’ao i vatan’Añahare iambesara’Iehovà amo kerobeoy, i fikanjiañe i tahina’eiy. Le nente’iareo an-tsarete vao boak’añ’anjomba’Abinadabe ao i vatan’Añaharey; vaho ninday i saretey t’i Ozà naho i Akio. Le nifale añatrefan’Añahare an-kaliforan-kaozarañe t’i Davide naho Israele; reke-tsabo naho marovany, jejobory, fikorintsañe, fikarantsañe vaho an-trompetra. Ie nivotrak’an-tanem-pifofoha’i Kidone eo, le nahiti’i Ozà ty fità’e hikalañ’i vatay, fa ho nabalitaboa’o añombeio. Le nisolebotse amy Ozà ty haviñera’Iehovà naho zinevo’e amy te nitakare’e fitàñe i vatay vaho nihomak’añatrefan’Añahare. Tsy nahafale i Davide ty fitorotosi’Iehovà amy Ozày; aa le natao Perets’Ozà i toetsey pak’henaneo. Nahahembañe i Davide t’i Andrianañahare amy andro zay, le hoe re: Akore ty hampipoliako amako i vatan’Añaharey? Aa le tsy nendese’i Davide moly ama’e mb’an-drova’i Davide mb’eo i vatay fa nampitsile’e mb’añ’anjomba’i Ovededome nte Gate ao. Nitobok’an-kasavereña’i Ovededome añ’anjomba’e ao telo volañe i vatan’Añaharey; vaho nitahie’Iehovà ty anjomba’i Ovededome naho ze hene fanaña’e.

Unseren Newsletter abonnieren

Église Locale installieren