Fiantoñoñe I 10

Nialy am’Israele o nte-Pelistio; naho nitriban-day amo nte-Pelistio t’Israele vaho nitsingorotritse, zinamañe am-bohi’i Gilboa eo. Nitokoe’o nte-Pelistio t’i Saole naho o ana’eo vaho zinevo’o nte-Pelistio t’Ionatane naho i Abinadabe vaho i Malkisoà, ana’i Saole. Nanjomòtse amy Saole i hotakotakey le nitakare’o mpitàm-paleo am-pale naho nahafere aze o mpitàm-paleo. Le hoe t’i Saole amy mpitàm-pikala’ey, Apontsoaño o fibara’oo, le atrebeho amako tsy mone homb’etoy o tsy nisavareñeo hanao sarerak’ahy. Fe tsy nimete i mpitàm-pikala’ey amy t’ie nangebahebake. Aa le rinambe’i Saole i fibara’ey vaho nikorovoha’e. Ie nioni’i mpitàm-pikala’ey te nihomake t’i Saole le niforetrak’amy fibara’ey ka vaho nivetrake. Aa le nihomake t’i Saole naho i ana’e telo rey; sindre nitrao-pikoromake o añ’anjomba’eo. Ie nioni’ze hene nte-Israele am-bavatane ao te nitriban-day naho nihomake t’i Saole naho o ana’eo, le nenga’iareo o rova’eo, nilay; vaho nimb’eo o nte-Pelistio nimoneñe ama’e ao. Ie amy loak’androy naho niheo mb’eo o nte-Pelistio hampikorendake o zinamañeo, le nitendrek’amy Saole naho amo ana’e nikorovok’am-bohi’i Gilboao, naho hinoli’iereo naho nandrambe i añambone’ey naho o fikala’eo, le nampiariarie’iareo mb’an-tane’o nte-Pelistio mb’eo, ninday i taliliy mb’amo hazomanga’eo vaho mb’am’ondatio. Nanoe’iereo añ’anjomba’o ndrahare’iareoo o harao’eo vaho napitek’an-kivoho’i Dagone ao ty añambone’e. Aa ie jinanji’Iabese-Gilade ze he’e nanoe’o nte-Pelistio amy Saole, le fonga niongake o fanalolahio nandrambe ty fañova’i Saole naho ty fañova’o ana’eo le nendese’iareo mb’e Iabese mb’eo vaho nalenteke ambane’ty kobai’Iabese ao o taola’iareoo vaho nililitse fito andro. Aa le nihomake t’i Saole ty amy fiolà’e am’Iehovà y naho i tsara’Iehovà tsy nambena’ey naho i namotoaña’e jiny, hañontanea’ey, ie tsy nañontane Iehovà; le zinevo’e vaho nafote’e amy Davide ana’Iisaý i fifelehañey.

Unseren Newsletter abonnieren

Église Locale installieren