Iesaià 27

Amy andro zay, le amy fibara’e mitrotrofiake ra’elahy naho maozatsey ty handilova’Iehovà i fañaneñey, toe i mereñe mibotatsakey; ty fañaneñe, i mereñe mivanditsey; vaho ho vonoe’e i fañanen-driakey. Ie tondroke i andro zay: Tetem-bahe fanjàka! Isabò! Izaho Iehovà ty miambeñe aze, tondrahako rano erike; ambenako haleñe naho handro tsy mone ho joieñe. Tsy mifombo ty an-troko ao, Ie mea’e hisatse naho fatike iraho, le ho lialiako, haharoko forototoeñe. Naho tsy izay, ee te hiatoa’e ty haozarako, hifampilongo amako; ehe t’ie hifampirañetse amako. Ho tondroke ty andro te hamahatse t’Iakobe, hibotiboty naho hitaroke t’Israele; vaho ho tsitsi-kavokarañe ty an-tarehe’ty tane toy. Linafa’e hao re manahake ty nandafa’e o nandafa azeo? He vinono re hambañe ami’ty nanjamane’e o namono azeo? Fandroahañe, faneseañe mb’eo añe ty nihotakotaha’o am’iereo; amy kofò’e mangosasàkey ty nampisitaha’e iareo amy andro’i tioke atiñanañeiy. Fa izay ty hijebañe Iakobe ty amo tahi’eo, zao ty havokarañe handopolopo ty amy nañahàñe o hakeo’eoy: te ho fonga dorodemohe’e ty vato’o kitrelio, tsy hitroatse ka o hazomangao naho o sare’i àndroio. Miereñereñe i rova soa-fikalañey, kialo koake naho naforintseñe manahake i fatrañey, ho fiandraza’o anak’añombeo, eo ty andrea’iareo, eo ty añolira’iareo o tsampa’eo. Hapekañe o tsampa’e niforejejeo; homb’eo o rakembao handrehetse aze; amy t’ie tsy ondaty mahilala, aa le tsy hiferenaiña’i Namboatse iareoy, tsy hitretreza’i Nitsene iareoy. Ho tondroke amy andro zay te hanatake boak’amy fikararaha’i Oñey pak’amy Toraha’i Mitsraimey t’Iehovà, le hatontoñe kiraikiraike nahareo, ry ana’Israeleo. Le ho popoheñe amy andro zay ty antsiva jabajaba vaho hikovovoke mb’etoa o nimotso an-tane’i Asoreo naho o nampitsirantsiràñe an-tane Mitsraimeo hitalahoa’iareo am’Iehovà amy vohi-miavake e Ierosalaimey.

Assinar nossa newsletter

Instalar Église Locale