Iesaià 13

Nibekoe’Iesaià ana’i Amotse i Bavele amy nioni’ey. Ampitroaro viloñe am-bohits’abo ey, ipoñafo feo, mañelahelà fitañe, himoaha’iareo an-dalam-bein-droandriañe ao. Fa liniliko o neferakoo naho kinoiko o manjofakoo, o mahimbañe naho rototseo ty amy habosehakoy. Inay ty rehoreho am-bohitse eñe, hoe ondaty mitozantozañe! Inao ty fikoraha’ty fitontona’o fifehea’o kilakila ‘ndatio! Tehafe’Iehovà’i Màroy o valobohòkeo hihotakotake. Boak’an-tsietoitane añe iereo, boak’am-pigadoña’i likerañey añe, — Iehovà, naho o fialiam-pifombo’eo— handrotsake i tane iabiy. Mangololoiha; fa antitotse ty andro’Iehovà; toe fandrotsahañe boak’amy El-Sadai ty hivotraha’e; Hene higebañe amy zao o fitañeo, vaho songa hitranake ty arofo’ondaty. Hangebahebake iereo; hamihiñe iareo ty hativontivoñe naho ty fisintosintoñe; le hanahake ty fitsongoan-ampela ty fanaintaiña’iareo; ho veren-draha hifampitorìtotse; ho tarehe mibelabela-afo ty lahara’iareo. Inao, antitotse ty andro’Iehovà, hasarerahañe, filoroloro naho fifombo miforoforo, hampangotomomoke i taney, vaho hamongotse o lo-tsereke ama’eo. Le tsy hañomey ty hazavà’e o vasian-dikerañeo naho o fitoboroña’eo, ho maieñe i àndroy te manjirike, vaho tsy hampaviahe’i volañey ty hazavà’e. Ho liloveko ty tane toy ty amo hakeo’iareoo, o tsy vokatseo ty amo tahi’iareoo, le haziko ty firengevoha’o mpiebotsebotseo, vaho hazevoko ambane ty fireñeta’o mpamorekekeo. Hanoeko loho sarotse ta ty volamena hiringiri’e t’indaty; le ambone’ty vongam-bolamena’i Ofirey ondatio. Aa le hampiezeñezeñeko o likerañeo, naho hahifikifike tsy ho amy toe’ey ty tane toy, ty ami’ty fifombo’Iehovà’i Màroy, amy andron-kaviñera’e miloroloroy. Ho tondroke amy zay t’ie hanahake ty farasy rinoake naho ty añondry tsy amam-pamory sindre milay mb’an-tane’e mb’eo, songa himpoly mb’am’ondati’eo. Ho tomboheñe iaby ze zoeñe, vaho hene hampikorovohem-pibara ze tsinepake. Ho demodemoheñe añatrefam- pihaino’iareo o anak’ajaja’iareoo; ho kopaheñe ty anjomba’iareo, vaho ho vahorañe ty rakemba’iareo. Eka, ho troboheko am’iareo o nte-Madaio, o tsy mañaom-bolafotio; ndra volamena tsy ifalea’e. Ho trofatrofahem-pale o ajalahio; tsy ho ferenaiña’iareo ty vokan-koviñe; tsy ho tretrezem-pihaino’e o ajajao. I Bavele amy zao, i volonahe’o fifeheañeoy, i fisengea’o nte-Kasdio fanjakay: le hanahake ty fandrotsahan’Añahare i Sedome naho i Amorà. Le lia’e tsy ho amam-pimoneñe, vaho tsy hañialo ao o tariratse mifandimbeo; tsy hañoren-kivoho eo t’i nte-Arabe, tsy hamahetse goloboñe ao o mpiarakeo. Toe ho fandrea’o fanalokeo; ho àtseke ty ontsoñontsoñe o anjomba’iareoo, himoneñe ao o voron-tsatrañeo, vaho hitsinjake ao o lolo miogogoo. Hañaolo añ’anjomba-hara’iareo ao o maràmboloo naho o amboa sirasirao an-toe’iareo fanjakao; fa antitotse ty amotoañañe aze, vaho tsy haesoñe o andro’eo.

Assinar nossa newsletter

Instalar Église Locale