Bentatse 15

Bentatse 15

Le naheoko andindìñe ey ty viloñe tovo’e, ra’elahy naho nampañeveñe: ty anjely fito minday ty feh’ohatse fito honka’e, ie ro mahaheneke ty haviñeran’Añahare. Le nitreako ty raha hoe riake fitaratse miharo afo, le niriñariña amy riake fitaratsey o naharebake i bibiy naho i sare’ey vaho ty ia’i añara’eio, mitañe o marovanin’Añahareo, misabo i sabo’i Mosè mpitoron’Añaharey naho ty sabo’i Vik’añondriy ami’ty hoe: Foloaingitroke naho mahalatsa o sata’oo ry Talè Andrianañahare, Tsitongerèñe. To naho mahity o lala’oo, ry Mpanjaka’o noro’oo. Ia ty tsy hañeveñe ama’o, ry Talè, naho hibango ty tahina’o? Amy te Ihe avao ro masiñe. Le homb’ama’o mb’eo ze hene fifeheañe hitalaho añatrefa’o eo, fa midodea o havantaña’oo. Ie añe le naheoko te nisokafeñe i kivoho an-kiboho’i Taroñe andindìñeiy. Niakatse i anjombay amy zao i anjely fito ninday feh’ohatse fito rey; misaroñe leny mikotritriake, miloeloe naho nidian-tsikim-bolamena añ’araña, vaho natolo’ty raik’amy raha veloñe efatse rey amy anjely fito rey ty finga volamena fito pea’ty haviñera’i Andrinañahare veloñe nainai’e doniay. Le nampoe’ty hatoe’i engen’Añaharey naho i haozara’ey i kibohotsey, vaho tsy eo ty nahafizilik’amy kibohotsey ampara’te niheneke i feh’ohatse fito’i anjely fito reiy.

Abonneer op onze nieuwsbrief

Église Locale installeren