Sabo 66

Sabo 66

Mipoñafa rebek’aman’Andrianañahare, ry hene tane toy! Isabò ty volonahe’i Tahina’ey, toloro engeñe mitoabotse. Anò ty hoe aman’Añahare: Ra’elahy o tolon-draha’oo! Ami’ty hajabahinan-kaozara’o ty hitsolofìña’o rafelahi’oo aolo’o eo. Hene hitalaho ama’o ty tane toy, naho hisabo fandrengeañe ama’o; ho bangoe’iereo ty tahina’o. Selà Antao hañisake o fitoloñan’Añahareo: mampañeveñe o ana’ondatio o sata’eo. Nabali’e ho tane kànkañe i riakey, nitsaham-pandia’iareo i oñey; añe ty nirebehan-tika. Manjaka an-kaozara’e nainai’e re, jilovem-pihaino’e o fifeheañeo, we te tsy hiroharoha’o mpiolao. Selà Andriaño t’i Andrianañaharen-tika ry ondatio, ipoñafo feom-pandrengeañe; Ie mitañe an-tika veloñe, naho tsy apo’e hasitse o fandian-tikañeo. Fa namente anay irehe, ry Andrianañahare, fa natrana’o hoe fitranaham-bolafoty. Nasese’o an-karato ao, vaho nampibabe’o faloviloviañe o hàto’aio. Nampiningire’o ambone’ty añambone’ay t’indaty, zahay nisibek’afo naho rano, fe naaka’o ho an-kavokarañe. Himoak’añ’anjomba’o ao raho hinday engan-koroañe; hañenefako o nifantàkoo, ze vinolan-tsoñiko vaho rineham-bavako t’ie niankoheke. Hengaeko kobatroke horañe, an-katòen’añondri-lahy, hisoroñe bania naho oselahy. Selà Mb’etoa hijanjiñe ry mpañeveñe aman’Añahare iabio, le ho talilieko o nanoe’e an-kavelokoo. Nitoreo am-bavako, le nampionjoneko an-delako. Ie mahatrea hakeo an-troko ato, le tsy hijanjiña’i Talè. Fa toe mijanjiñe ahy t’i Andrianañahare haoñe’e i feon-kalalikoy. Andriañeñe t’i Andrianañahare, amy te tsy ambohoa’e i filolofakoy, vaho tsy afaha’e amako ty fiferenaiña’e.

Misoratra ao amin'ny gazety anay

Apetraho ny Église Locale