Iobe 42

Natoi’Iobe amy zao t’Iehovà, Fantako te kila lefe’o, le tsy azo sebañeñe ze safiri’o. Hoe irehe: Ia ze o mañeta-panoroañe tsy aman-kilala zao? Toe nivolañeko ty tsy nirendreko, o raha loho mandikoatse ahy, tsy napotako. Ehe janjiño, [hoe irehe,] le hivolan-draho, hañontaneako vaho ho toiñe’o. Toe nahatsanoñe ty ama’o raho am-pijanjiñan-dravembia, fe mahatrea Azo o masokoo henaneo; Aa le hejeko ty troko vaho misoloho an-deboke naho lavenoke. Ie fa nilañone’Iehovà am’Iobe i tsara rezay, le hoe t’Iehovà amy Elifaze nte-Temane: Miforoforo ama’o naho amo rañe’o roe reo ty haboseko; amy te tsy nitaroña’areo ty hatò, manahake ty nanoem-pitoroko Iobe. Aa le andrambeso bania fito naho añondrilahy fito, le miheova mb’amy Iobe mpitoroko mb’eo naho mañengà soroñe ho anahareo; le hihalalia’Iobe mpitoroko naho ho noko i halali’ey vaho tsy hanoeko ama’areo ty mañeva i hanè’areoy; amy t’ie tsy nilañoñe ahy an-katò, manahake ty nanoe’i mpitoroko Iobey. Aa le nimb’eo t’i Elifaze nte-Temane naho i Bildade nte Sohy naho i Tsofare nte-Naamà le nanoe’iereo i tsinara’Iehovà am’iereoy; le ninò’Iehovà ty halali’Iobe. Aa le nampoli’Iehovà o vara’Iobeo, ie nihalaly ho a i rañe’e rey; vaho natolo’Iehovà am’Iobe indroe’ty nanaña’e taolo. Nomb’ama’e mb’eo amy zao o rahalahi’e iabio naho o rahavave’e iabio naho ze hene nahafohiñe aze taolo vaho nitrao-pikama ama’e añ’anjomba’e ao; nitretreze’iareo vaho nañohò aze amo fonga haoreañe nafetsa’Iehovà ama’eo; vaho songa nanolotse ty bogady ama’e naho ty bange volamena. Nitahie’Iehovà o figadoñan’andro’Iobeo mandikoatse te amy nifotora’ey; ie nanañ’añondry rai-ale tsy efats’arivo naho rameva eneñ’arivo naho katràka mpiharo-bao arivo vaho borìke-vave arivo. Nanañ’anadahy fito re naho anak’ampela telo. Natao’e Iemimae ty añara’i valoha’ey naho Keziae ty faharoe vaho Keren-Kapokee ty fahatelo. Tsy nañirinkiriñeñe amy tane iabiy ty hamozohozo’i anak’ampela’Iobe rey vaho songa tinolon-drae’e lova miharo amo ana-dahi’eo. Ie añe, mbe niveloñe zato-tsy-efapolo taoñe t’Iobe vaho niisa’e o ana’eo naho o zafe’eo pak’an-tariratse fah’efafatse. Aa le nivilasy t’Iobe, androanavy bey, lifots’andro.

뉴스레터 구독

Église Locale 설치