Iobe 33

Ie amy zao, ry Iobe, janjiño o entakoo, tsendreño iaby o volakoo. Hehe t’ie misoka-bava; mirehake ty lela am-bavako ao. Habeo’ty havantañan-troko o volakoo, le hitaron-kilala ki’e o soñikoo. Nitsene ahiko t’i Arofon’Añahare, vaho mameloñe ahy ty kofò’i El-Sadai. Toiño iraho naho mete’o; alaharo añ’atrefako etoa; mitroara! Hehe t’ie aman’Añahare manahake azo: nitsenèñe am-bokon-dietse ka. Ehe, tsy hahafiriatsandry azo ty fihembaña’o ahy, mbore tsy havesatse ama’o te tindrieko. Toe nisaontsy am-pitsanoñako irehe, tsinendreko i fiarañanañan-dañona’oy, nanao ty hoe: Mikanitsoke iraho, tsy aman-kakeo; ki’e tsy aman-tahiñe an-troko ao. Ie mipay lengo’e haneseha’e ahy, Izaho atao’e ho rafelahi’e; Ajo’e an-dongòk’ao o tombokoo, vandroñe’e iaby o lalakoo. Hete! ambarako azo: Zao ty tsy maha-to ty azo: Jabajaba te ama’ondaty t’i Andrianañahare. Ino ty atreatre’o aze, te inao, Tsy hene volilie’e o anoe’eo? Indraike ty itsaràn’Añahare, he indroe, fe tsy haoñe’ondaty. amo nofioo, añ’aroñaron-kaleñe, naho milañake an-drotse ondatio, ie mihity an-tihy ao; zay ty anokafa’e ty ravembia’ondaty naho ampipiteha’e ao ty fanoroañe, soa te havi’e amo sata’eo t’indaty naho sebaña’e ty firengevohan-dRaolombelo, hitàn-ty tro’e tsy homb- an’tsikeokeok’ao naho ty fiai’e tsy ho mongorem-pibara. Liloveñe am-panaentaeñañe an-tihi’e eo ondatio, itoreova’e nainai’e o taola’eo, ampara te heje’e ty mahakama, vaho tsy nom-pisafoa’e ty raha mafiry. Minik’avao ty sandri’e, le tsy trea; o taola’eo tsy niisake taolo, mirikiriky henaneo. Harivoe’ty tro’e ty kibory, naho ty fiai’e o mpamonoo. Aa naho eo ty anjely hañalañalañe ho aze, raik’ami’ty arivo, hañatoà’e ty havantaña’ondaty, le ee te hiferenaiña’e, hanao ty hoe, Hahao re tsy higodañe mb’an-tsikeokeok’ao; fa nitreako ty vilin’ai’e; le hanahake ty haleme’ty nofon’ajaja ty sandri’e, Apoho himpolia’e o andron-katòra’eo. Mihalaly aman’Añahare re, le no’e, isa’e an-kafaleañe i lahara’ey, vaho ampolie’e ama’ondaty ty havañona’e. Hibekoa’e ondatio, ami’ty hoe: Nandilatse iraho, nimengoheko ty hahiti’e vaho tsy sazò ahy; toe jineba’e ty troko tsy hivariña’e mb’an-koboñ’ao, ho isa’ty fiaiko i fireandreañey. Inao, fanoen’Añahare iaby rezay, in-droe, eka in-telo amy t’indaty, hampolie’e boak’an-tsikeokeok’ao ty tro’e, hiloeloe an-kazavàn-kavelo. Mitomira ry Iobe, janjiño iraho; mianjiña le hivolañe. Ihe aman’entañe, toiño; mitaroña fa te hañatò azo iraho. Naho tsie, mitsatsiha, mianjiña, vaho hanarako hihitse.

뉴스레터 구독

Église Locale 설치