Fiantoñoñe II 27

Fiantoñoñe II 27

Niroapolo taoñe lim’amby t’Iotame te niorotse nifehe, le nifehe folo-taoñe eneñ’amby e Ierosalaime ao; Ierosà, ana’i Tsadoke, ty tahinan-drene’e; le nanao ty fahiti’e am-pihaino’Iehovà, an-tsatan-drae’e Ozià iaby; f’ie tsy nimoak’an-kiboho’Iehovà ao. Fe mbe nitolon-kaloloañe avao ondatio. Namboare’e ty lalambey ambone’i anjomba’Iehovà y, le natratrañahe’e ty kijoli’i Ofele. Mbore namboare’e rova am-bohibohi’Iehoda añe naho toetse fatratse reke-pitalakesañ’abo añ’àla ao. Nialia’e i mpanjaka’o ana’i Amoneoy vaho nahareketse. Nandroroñe talenta volafoty zato ama’e amy taoñey o ana’i Amoneo naho fañaranam-bare-bolè rai-ale naho vare-hordea rai-ale. Mira amy zay ty nandroroña’o ana’i Amoneo aze amy taom-paharoe naho taom-pahateloy. Aa le nihafatratse t’Iotame, amy te nalaha’e añatrefa’Iehovà Andrianañahare’e o lia’eo. Aa naho o fitoloña’Iotame ila’eo, o ali’e iabio naho o sata’eo, oniño te sinokitse amy bokem-panjaka’Israele naho Iehodày. Roapolo taoñe lim’amby re te niorotse nifehe le nifehe folo taoñe eneñ’amby e Ierosalaime ao. Le nitrao-piròtse aman-droae’e naho nalenteke an-drova’i Davide ao vaho nandimbe aze nifehe t’i Ahkaze ana’e.

뉴스레터 구독

Église Locale 설치