Avotse 40

Nitsara amy Mosè t’Iehovà nanao ty hoe: Atroaro ami’ty andro valoha’i volam-baloha’ey i kivohon-kibohom-pamantañañey. Apoho ao i vatam-pañinay vaho ampiavaho amy lamba fañefetsey i vatay. Aziliho ao i rairaiy le hajario ama’e o harao’eo naho endeso ao i fitàn-jiroy vaho areheto i jiro’e rey. Apoho aolo’i vatam-pañinay i kitreli-pañembohañe volamenay vaho apetaho ami’ty lala’i kivohoy i lamba-fañefe’ey. Le apoho aolo’ty lala’i kivohon-kibohom-pamantañañey i kitrely fisoroñañey. Le apoho añivo’i kibohom-pamantañañey naho i kitreliy i fanasàñey vaho ampidoaño rano; hajario ty añ’ariari’i kiririsay vaho aradoradò amy lalan-kiririsay i lamba fañefe’ey. Rambeso amy zao i mena-pañorizañey naho hene orizo i kivohoy naho ze ama’e ao vaho tokano rekets’o fana’e iabio hiavake; le orizo i kitrely fisoroñañey naho ze hene harao’e vaho tokano i kitreliy, hiavahe’i kitreliy do’e. Le orizo ka i fanasàñey naho o tombo’eo vaho ampiavaho. Endeso mb’amy lalan-kibohom-pamantañañey mb’eo t’i Aharone naho o anadahi’eo vaho ampandrò an-drano; le aombeo amy Aharone o saro miavakeo naho orizo vaho ampiavaho hitoroñ’ahy ho mpisoroñe. Ampombao mb’eo o ana’eo vaho añombeo saroñe. Orizo manahake i nañoriza’o an-drae’iareoy hitoroñ’ahy ho mpisoroñe; fa ho fisoroñañe tsy modo amo fifokoa’iareo mifandimbeo ty fañorizañe iareo. Nanoe’i Mosè irezay hambañe amy nandilia’Iehovà azey. Aa le natroatse ami’ty andro valoha’i volam-baloha’i taoñe faha-roey i kivohoy. Natroa’i Mosè i kivohoy naho najado’e an-toe’e o tombo’eo, hinalanka’e o varambañeo, nazili’e o saka’eo vaho natroa’e o anakòre’eo. Le vinela’e ambone’i kivohoy i kibohotsey naho nalafi’e ambone’izay i rakokey, amy nandilia’Iehovà amy Mosèy. Rinambe’e i fañinay le najo’e amy vatay, le nazili’e amo ravake amy vataio i baoñe rey vaho napo’e ambone’i vatay i toem-pijebañañey; le nendese’e amy kivohoy i vatay, nahanto’e i lamba fañefetsey vaho nefera’e i vatam-pañinay amy nandilia’Iehovà i Mosèy. Napo’e amy kibohom-pamantañañeio i rairaiy, avara’i kivohoy, alafe’i lamba fañefetsey, le hinajari’e hiriritse ama’e ty mofo añatrefa’Iehovà, amy nandilia’Iehovà i Mosèy. Napo’e amy kibohom-pamantañañeio i fitàn-jiroy, tandrife i rairaiy, añ’ila atimo’i kivohoy, le narehe’e i jiro rey añatrefa’Iehovà ami’ty nandilia’Iehovà i Mosè. Napo’e aolo’i lamba fañefetsey amy kibohom-pamantañañeio i kitrely volamenay le natsotse ama’e i emboke aman-kafiriañe mañitsey, amy nandilia’Iehovà amy Mosèy. Natroa’e an-dalambei’i kivohoy i lamba fañefetsey. Napo’e an-dalam-pimoahañe amy kivohoy—i kibohom-pamantañañey—i kitreli-pisoroñañey, le nañenga soroñe naho enga-mahakama ama’e, amy nandilia’Iehovà amy Mosèy. Napo’e añivo’i kibohom-pamantañañey naho i kitreliy i fanasàñey vaho nañiliña’e rano fanasàñe; hanasa’i Mosè naho i Aharone vaho o ana’eo fitàñe naho fandia; hisasa’iareo naho hizilike amy kibohom-pamantañañeio ndra hañarine i kitreliy, amy nandilia’Iehovà amy Mosèy. Vaho, natroa’e ty fahe’i kiririsa añariari’i kivohoy naho i kitreliy vaho naradorado’e i lamba fañefetse an-dalambein-kiririsaiy. Aa le nifonira’i Mosè i fitoloñañey. Nakopo’i rahoñey amy zao i kibohom-pamantañañey vaho nandifotse i kivohoy ty enge’Iehovà. Aa le tsy nimete nizilik’amy kibohom-pamantañañeio t’i Mosè amy te nivotrak’ama’e i rahoñey vaho nandifotse i kivohoy ty enge’Iehovà. Ndra mbia’mbia nionjoñe ambone’i kivohoy i rahoñey, le nionjoñe mb’amo hene fañaveloa’iareoo mb’eo o nte’Israeleo. Fa naho tsy nionjoñe i rahoñey le tsy nionjon-dia ka iereo ampara’ty andro ionjona’e. Tambone’i kivohoy ty raho’Iehovà naho antoandro, le afo ty tama’e naho haleñe aolom-pihaino ze hene anjomba’Israele amo fiavota’iareo iabio.

뉴스레터 구독

Église Locale 설치