Iirmeà 26

Ie tam-baloham-pifehea’Iehoiakime ana’Iosia, mpanjaka’Iehodà, le niheo eo ty tsara’Iehovà manao ty hoe: Hoe t’Iehovà: Mijohaña an-kiririsan’anjomba’Iehovà eo vaho tseizo amo rova’Iehodà iaby miheo mb’eo hitalaho añ’anjomba’Iehovà o, ze hene entañe lilieko azo hitaroñañe; leo tsara raike tsy hapo’o. Hera hañaoñe iereo, songa hiamboho amo sata rati’eo; soa te hihahak’amy hekoheko nisafirieko hanoeñe am’iereo ty amo haloloam-pitoloña’iareooy. Le hoe ty hanoa’o: Hoe t’Iehovà: Aa naho tsy mijanjiñe ahy, hañavelo amy Hàke tinaroko añatrefa’areoy, hitsendreñe i saontsi’o mpitoky mpitoroko niraheko ama’areo, nampañampitsoeñe naho niraheñeo, fe tsy hinao’areoy; aa le hampanahafeko amy Silò ty anjomba toy, vaho hanoeko fatse amy ze kila fifeheañe an-tane atoy ty rova toy. Jinanji’o mpisoroñeo naho o mpitokio vaho ondaty iabio i tsara nisaontsie’Iirmeà añ’anjomba’Iehovà y. Ie fonga nihenefa’Iirmeà taroñe i nandilia’Iehovà aze ho saontsieñe am’ondaty iabio, le namihiñe aze o mpisoroñeo naho o mpitokio vaho ze hene ondaty, nanao ty hoe: Toe havetrake irehe. Ino ty nitokie’o amy tahina’Iehovà y ty hoe: Hanahake i Silo ty anjomba toy, vaho hangoakoake ty rova toy, tsy ho amam-pimoneñe? Le hene niropak’am’Iieremea ondaty añ’anjomba’Iehovà o. Ie nahajanjiñe i hoe zay o roandria’Iehodào, le niakatse ty anjomba’i mpanjakay vaho nimoak’añ’anjomba’Iehovà ao; niambesatse ami’ty fizilihañe amy lalam-bey vao’i anjomba’Iehovà y eo. Le nisaontsy amo roandriañeo naho amo hene’ondatio o mpisoroñeo naho o mpitokio, nanao ty hoe: Mañeva havetrake t’indaty tia; amy te nitokie’e raty ty rova toy, i jinanjin-dravembia’areoy. Le nitaroñe’Iirmeà o roandriañeo naho ze hene’ondaty eo nanao ty hoe: Nirahe’Iehovà iraho hamàtse ty anjomba toy naho ty rova toy amy tsara jinanji’areo iabiy. Avantaño arè o sata’areoo naho o fitoloña’areoo, vaho haoño ty fiarañanaña’Iehovà Andrianañahare’areo; le hihahak’amy hankàñe nitseiza’e t’Iehovà. Fa naho izaho, heheke te am-pità’areo; ano amako ze mete naho mahity am-pihaino’areo. Fe mahafohina an-katò te ie añohofa’areo loza, le ho lio-màliñe ama’areo naho an-drova atoy vaho amo mpimone’eo; fa toe nirahe’Iehovà ama’areo iraho hivolañe i hene tsara zay an-dravembia’areo ao. Aa le hoe o roandriañeo naho ze hene’ondaty amo mpisoroñeo naho amo mpitokio: Tsy mañeva ho vonoeñe ondatio; amy te nitaroñe aman-tika ami’ty tahina’Iehovà Andrianañaharen-tika. Niongak’amy zao ty ila’o androanavi’i taneio vaho nisaontsy amy fivori’ondatioy nanao ty hoe: Nitoky tañ’andro’i Kizkià mpanjaka’Iehodà t’i Mika nte-Morasete vaho nitaroñe ty hoe amy ze hene ondati’Iehodà: Hoe t’Iehovà’i Màroy: Ho rokafeñe hoe hatsake ty Tsione, naho ho kivotrivotry t’Ierosalaime, vaho hanahake o ankaboañe añ’alao ty vohi’i anjombay Nañoho-doza ama’e hao ty Kizkia mpanjaka’Iehodà naho Iehodà iaby? Te mone nañeveñe am’Iehovà nihalaly ty fañisoha’Iehovà, vaho nihahak’amy fe-hohatse nitsarae’e am’iereoy t’Iehovà? Aa kera hampivotrahan-tika hankàñe o fiaintikañeo. Teo ka t’indaty nitoky ami’ty tahina’Iehovà, i Orià ana’i Semaia, boak’e Kiriate Iearime; le nitokie’e fatse ty rova toy naho ty tane toy manahake i sinaontsi’Iirmeà abikey; fa ie nahatsanoñe o enta’eo t’Iehoiakime mpanjaka naho o fanalolahi’e iabio, naho o roandria’e iabio, le nipay hañoho doza ama’e i mpanjakay; fe nahajanjiñe izay t’i Oria le nihembañe vaho nivoratsake mb’e Mitsraime mb’eo; le nampihitrife’Iehoiakime mb’e Mitsraime mb’eo t’indaty; i Elnatane ana’i Akbore rekets’ondaty tsy ampeampeo ty nimb’e Mitsraime añe; le nendese’iereo boake Mitsraime añe t’i Orià naho nasese’iareo am’Iehoiakime mpanjaka; zinevo’e am-pibara vaho navokovoko’e an-kibori’o ana’ondatio. Fe nañimba Iirmeà ty fità’i Ahikame ana’i Safane, tsy nitolorañe am-pità’ondatio ho vonoeñe.

Iscriviti alla nostra newsletter

Installa Église Locale