Iehosoa 19

Nitsatok’amy Simone ty tsapake faha-roe ho a i fifokoa’i Simoney ty amo hasavereña’eo; le añivo’ty lova’o ana’Iehodao ty lova’iareo. Aa le ty lova’iareo: i Beer-seva, naho i Sebà, naho i Moladà; naho i Hatsar-soale, naho i Balà naho i Atseme, naho i Eltolade, naho i Betole, naho i Kormà, naho i Tsiklage, naho i Bete-markabote, naho i Katsàre-sosà, naho i Bete-lebaote, vaho i Sarohene: rova folo-telo’amby rekets’o tanà’eo. I Aine, i Remone, naho i Etere vaho i Asane; rova efatse rekets’o tanà’eo, naho ze tanàñe mañohoke i rova rey pake Baal-atbeere, i Ramate’i Atimoy. Ie ty lovam-pifokoan’ana’i Simoneo ty amo hasavereña’eo. Nandivàñe amy anjara’o ana’Iehodao ty lova’o ana’i Simoneo; amy te niloho bey ama’e ty anjara’Iehoda; aa le tañivo’ty lova’iareo ao ty lova’o ana’i Simoneo. Nitsatok’amo ana’i Zeboloneo ty tsapake faha-telo ty amo hasavereña’eo, le nahatakatse i Saride ty efe’i lova’iareoy. Mionjoñe mb’amy riakey naho mb’e Maralà mb’eo i efetsey pake Dabasete vaho mitakatse i saka aolo’Iokneamey; miolake boake Saride re maniñanañe mb’amy fanjiriha’i àndroy mb’eo pak’amy efe’i Kislotabore vaho miakatse mb’e Daberate naho mañambone mb’e Iafià, boak’ao re manonjohy maniñana pake Gita-kefere naho i Eta-katsine mb’eo vaho miakatse mb’e Remone-metoare mb’e Neà añe; miary avara’e eo i efetsey pake Kanatone vaho mandoak’am-bavatane’Iiftakèle eo; mitraok’ao ty Katàte naho i Nahalàle, naho i Simrone, naho Idalà vaho i Betlekheme: rova folo-ro’amby naho o tanà’eo. Izay ty lova’o ana’i Zeboloneo ty amo hasavereña’eo, i rova rey naho o tanà’eo. Nitsatok’amy Isakhare ty tsapake fah’efetsee, ho a o ana’Isakhareo ty amo hasavereña’eo. Ty efe’iareo le pake Iizreele, naho i Kesolote naho i Soneme, naho i Kafaraime, naho i Sione, naho i Anakarate, naho i Rabite, naho i Kisione, naho i Ebetse, naho i Remete, naho i En-ganime, naho i En-kadà, vaho i Bete-pats’tsatese; mahatakatse i Tabore i efetsey naho i Sakatsome naho i Bete-semese; le mandoak’am’Iardeney i efe’iareoy; rova folo-eneñ’amby rekets’o tanà’eo. Ie ty lovam-pifokoa’o ana’Isakhareo ty amo hasavereña’eo; i rova rey rekets’o tanà’eo. Nitsatok’amy fifokoa’o ana’i Asereoy i tsapake faha-limey ty amo hasavereña’eo. Ty efe’iareo le i Kelkate, naho i Kalý, naho i Betene, naho i Aksafe, naho i Alameleke, naho i Amade, naho i Miseale, naho mitakatse i Karmele ahandrefa’e añe vaho mb’e Sikore-libnate mb’eo; miolake mb’amy fanjiriha’i àndroy re pake Bete-dagone le mahatakatse i Zebolone naho i vavatane’Iiftakèy le mañavaratse, mb’e Bete-meke, naho i Neiele vaho mandoake e Kabole am-pitàn-kavia eo, naho i Abrane, naho i Rekobe, naho i Kamone vaho i Kanà, pake Tsidone bey; miolake mb’amy Kormà amy zao i efetsey naho mb’an-drova fatratse atao Tsore; miolake mb’amy Kosà amy zao i efetsey vaho mandoak’amy riakey; boake Hebel pak’Akzibe, naho i Omà, naho i Afeke, vaho i Rehobe: rova roa-polo-ro’amby rekets’o tanà’eo. Ie ty lovam-pifokoan’ana’i Asere ty amo hasavereña’eo, i rova rey vaho o tanà’eo. Nitsatok’amo ana’i Naftalio i tsapake faha-eneñey, ho a o ana’i Naftalio ty amo hasavereña’eo. Ty efe-tane’iareo le boake Kelefe amy sarongaza’i Tsànanimey, naho i Adamý, i Nekebe, naho Iagnile, pake Lakome le mandoak’am’Iardeney miolake mañandrefa amy zao i efetsey mb’Aznote-tabore naho miranga mb’e Kokoke le mahatakatse i Zebolone atimo’e naho mitakatse i Asere ahandrefañe añe vaho am’Iehodà mb’am-panjiriha’i àndroy mb’am’Iardeney mb’eo. O rova’iareo fatratseo le i Tsidime, i Tsare, naho i Kamate, i Rakate, vaho i Kinerete, naho i Adamà naho i Ramà, naho i Katsore, naho i Kedese, naho i Edreý, naho i En-katsore, naho Irone, naho i Migdal’El, naho i Koreme, naho i Betanate vaho i Bete-semese: rova folo-sive’amby rekets’o tanà’eo. Ie ty lovam-pifokoan’ana’i Naftaliy ty amo hasavereña’eo; i rova rey rekets’o tanà’eo. Nitsatok’am-pifokoan’ana’i Dane ty tsapake faha-fito ty amo hasavereña’eo. Ty efe-tane’iareo le i Tsorà, naho i Estaole, naho Ire-semese, naho i Saal-bine, naho i Aialone, naho Ietelà, naho i Elone, naho i Timnatà, naho i Ekrone, naho i Eltekè, naho i Gibetone, naho i Baalate, naho Iehoda, naho i Bene-berake, naho i Gatrimone, naho i Me-iarkone, vaho i Rakone, rekets’i tane aolo’Iafòy. Tsy niampe ty nitakara’ty efe-tane’i Dane; aa le nionjoñe haname i Leseme o ana’i Daneo le tinava’iereo naho linafa’iareo an-dela-pibara naho nanoe’iereo fanañañe vaho nimoneñe ao; natao iereo Dane ty Leseme ty amy Dane rae’iareoy. Ie ty lova’o ana’i Dane ty amo hasavereña’eoo, i rova’e rey naho o tanà’eo. Aa ie nihenefe’iareo ty fizarañe i taney ho lova ty amo efe’eo, le tinolo’o ana’Israeleo lova añivo’iareo ao t’Iehosoa ana’i None; le natolo’iareo aze i rova nihalalie’ey ty amy tsara’Iehovà y; i Timnatserà am-bohi’i Efraime ey; le namboare’e i rovay vaho nimoneña’e. Izay o lova zinara’i Elazare mpisoroñe naho Iehosoa ana’i Noneo naho o talem-pifokoa’o ana’Israeleoo, ho lova an-tsapake e Silò añatrefa’Iehovà, an-dala’i kibohom-pamantañañey. Aa le nihenefe’iareo i zara-taney.

Iscriviti alla nostra newsletter

Installa Église Locale