Iehosoa 15

Ty anjara’i fifokoan’ana’Iehoda ty amo hasavereña’eo an-tsapake le pak’an-tane’i Edome naho ty fatrambei’i Tsine mb’amy Negeve mb’eo ho efe’e atimo. Ty efe-tane’iareo atimo, le boak’añ’olo’i Riake Siray hirik’amy fitolian-dakañe mitolike mañatimoy; le mb’e Negeve mb’eo pak’amy fitroara’i Akrabime sikal’amy Tsine naho mionjomb’ami’ty ila atimo’i Kadese-barnea an-kalo’i Ketsrone naho mionjoñe mb’e Adare vaho mitolike mb’e Karkà mb’eo, ie boak’ao le miary mb’e Atsmone vaho miakatse mb’amy oñe’i Mitsraimey, le mitakatse i riak’ahandrefañey i efe’ey. Izay ty efe’o atimo. I Riake Siray ty efe’e atiñanañe pak’am’Iardeney. Le ty efe’e avaratse boak’am-pitolian-daka’i riakey, am-binàñe’Iardeney, le mitohy mb’e Betehoglà naho miary avara’i Bete’arabà; ie boak’ao mionjomb’am-bato’i Bohane, ana’i Reobene mb’eo i efetsey. Mibalike mb’e Debire boak’am-bavatane’i Akore i efetsey le mañavaratse, mitolike mb’e Gilgale, aolo’ty fitroara’i Adomime, atimo i sakay; miary amo rano’i Ensemeseo i efetsey vaho miakatse amy rano migoangoa’i Rogeley, le mionjomb’amy vavatanen’ana’i Hinome añ’ila’i nte-Iebosiý mañatimo; izay t’Ierosalaime, naho manganike mb’an-dengom-bohitse aolo’i vavatane’i Hinomey mañandrefa ami’ty figadoña’i vavatanen-dRafày, mañavaratse; miary ambone’i vohitsey i efetsey pak’amy rano migoangoa’i Neftoà naho miakatse mb’amo rova’am-bohi’i Efroneo mb’eo; le miary Efrone i efetsey pake Baalà; ie i Kiriat-iearime. Ie amy zay miolake boake Baalà mañandrefa pak’am-bohi-Seire naho miary mb’añila’avara’i vohi’Iearimey mb’eo—i Kesalone zay, le mizotso mb’e Bete-Semese mb’eo vaho miary mb’e Timnà mb’eo. Le miary añ’ila’i Ekrone mañavaratse i efetsey; le miary mb’e Sikrone mb’eo ty efe’e naho mb’amy Baalà naho miakatse mb’e Iabnile; vaho miakatse mb’an-driak’añe i efe’ey. Ty efe’e ahandrefa, le i olon-driake jabajabay. Ie ty efe-tane’o ana’Iehodao mb’eo mb’eo ty amo hasavereña’eo. Natolo’e amy Kalebe’ana’Iefonè ty ila’o anjara’o ana’Iehodaoo, ty amy nandilia’Iehovà Iehosoay, rekets’i Kiriate-Arbà, toe rae’i Anàke t’i Arbà; ty rova atao Kebrone. Natao i Kalebe soike i ana-dahi’telo’i Anàke rey: i Sesay naho i Ahimane naho i Talmay, i ana’i Anàke rey. Ie boak’ao le nionjomb’amo mpimone’i Debireo mb’eo; natao Kiriate-sefere ty añara’i Debire taolo. Le hoe t’i Kalebe, Hatoloko amy ze manjevoñe i Kiriate-sefere vaho mahatavañe aze t’i Aksàe anak’ampelako ho vali’e. Aa le tinava’i Otniele ana’i Kenaze rahalahi’i Kalebe vaho natolo’e aze t’i Aksae anak’ampela’e ho tañanjomba’e. Ie amy zao, naho nasese ama’e i ampelay, le nosihe’e ty hihalaly tetek’aman-drae’e; aa ie nizotso amy borìke’ey, le hoe ty asa’i Kalebe ama’e: Ino o paia’oo? Hoe re: Tatao iraho, kanao tinolo’o tane atimo ao, ehe itoloro rano manganahana. Aa le natolo’e aze i Rano Manganahana Amboney naho i Rano Manganahana Ambaney. Zao ty lova ty fifokoa’Iehoda ty amo hasavereña’eo. O rovam-pifokoa’o ana’Iehodao mañatimo mb’añ’efe-tane’Edome mb’eoo le i Kab-tseel naho i Eder naho Iagore naho i Kinà naho i Dimonà naho i Adadà naho i Kedese naho i Katsore naho Iitnàne; i Zife naho i Teleme naho i Bealote naho i Katsore-kadatà naho i Keriote naho i Ketsrone ze toe Katsore, i Amame naho i Semà naho i Moladà, naho i Katsar-gadà naho i Kesmone naho i Betepalete naho i Katsar-soale naho i Beersevà naho i Beziotià, i Baalà naho Iime naho i Etseme naho i Eltolade naho i Kesile naho i Kormà naho i Tsiklage naho i Madmanà naho i Sansanà naho i Lebaote naho i Silehime naho i Aine vaho i Rimone; rova roapolo-sive’amby rekets’o tanà’eo. Aa naho an-tane pisake, i Estaole naho i Tsoreà naho i Asnà, naho i Tsanoà naho i Enganime, i Tapoà naho i Ename, Iarmote naho i Adolame, i Sokò naho i Azekà, naho i Saraime naho i Aitaime naho i Gederà vaho i Gederotaime: rova folo-efats’amby rekets’o tanà’eo. I Tsenane naho i Kadasà naho i Migdal-gade naho i Dileane naho i Mitspe naho Ioktile, i Lakise naho i Bots-kate naho i Eglone naho i Kabone naho i Lamame naho i Kitlise naho i Gederote, i Bete-dagone, naho i Naamà vaho i Màkedà; rova folo-eneñ’amby rekets’o tanà’eo. I Libnà, naho i Etere naho i Asane naho Iptà, naho i Asnà naho i Netsibe, naho i Keilà naho i Akzeebe vaho i Maresà: rova sive rekets’o tanà’eo. I Ekrone, rekets’o rova’eo naho o tanà’eo. Le boak’Ekrone pak’an-driakey mañohoke i Asdode naho o tanà’e iabio. I Asdode rekets’o rova’eo naho o tanà’eo naho i Aza rekets’o rova’eo naho o tanà’eo pak’an-tsaka’i Mitsraime añe, i riake jabajabay ro efe-tane’e. Le amo vohitseo: i Samire, Iatire naho i Sokò, naho i Danà, naho i Kiriate-sanà (i Debire izay), i Anabe naho i Estemò naho i Enime, naho i Gosene naho i Kolone vaho i Gilò; rova folo-raik’amby rekets’o tanà’eo. I Arabe naho i Doma naho i Eseane, naho Ianome naho i Bete-tapoà naho i Afekà, naho i Kamotà naho i Kiriate-arbà (i Kebrone izay) vaho i Tsiore: rova sive naho o tanà’eo; i Maone, i Karmele naho i Zife naho Iotà naho Iezreele naho Iokdeame naho i Zanoàke, i Kaine, i Gibà vaho i Timnà: rova folo rekets’o tanà’eo. I Kalkole, i Bete-tsore naho i Gedore naho i Maarate naho i Betanote vaho i Eltekone: rova eneñe rekets’o tanà’eo. I Kiriabat-baale, toe Kiriate-Iearime naho i Rabà: rova roe rekets’o tanà’eo; aa naho am-patrambey añe: i Bete-arabà, i Midine, naho i Sekakà, i Nisbane, naho i rovan-tSiray, vaho i Engedý: rova eneñe rekets’o tanà’eo. Aa naho o nte-Iebosý mpimoneñe e Ierosalaime ao, tsy naharoake iareo o nte’Iehodao, fa mbe tambatse e Ierosalaime ao miharo amo ana’Iehodao pak’androany o nte-Iebosio.

Iscriviti alla nostra newsletter

Installa Église Locale