Fiantoñoñe II 5

Aa le nifonitse iaby ty fitoloñañe nanoe’i Selomò amy anjomba’Iehovà y. Le nente’i Selomò o raha nengae’i Davide rae’eo; naho o volafotio naho o volamenao naho o fanakeo vaho napo’e amo fañajam-bara’i anjomban’Añahareio. Hene natonto’i Selomò e Ierosalaime ao amy zao o roandria’Israeleo naho o raem-pifokoañeo, o talèn’anjomban-droae’o ana’Israeleoo, hampionjone’iereo boak’an-drova’i Davide, i atao Tsioney, i vatam-pañina’Iehovà y. Le nifanontoñe amy mpanjakay amy sabadidak’i volam-pahafitoiy ze lahilahi’Israele iaby. Nimb’eo iaby o mpiaolo’Israeleo vaho nendese’o nte-Levio i vatay. Le nampionjoneñe i vatay naho i kibohom-pamantañañey naho ze hene fanake masiñe amy kibohotsey; ie nendese’o mpisoroñeo naho o nte-Levio mb’eo. Tañ’atrefa’i vatay t’i Selomò mpanjaka te nifanontoña’i valobohò’Israeley, nisoroñe añondry naho añombe tsy hay niaheñe ami’ty hatsifotofoto’e. Aa le nampizilihe’o mpisoroñeo an-toe’e eo i vatam-pañina’Iehovà y, amy toetse masi’i anjombaiy, amy toetse loho masiñey, ambane’ty ela’i kerobe rey. Amy te navela’i kerobe rey ambone’ty toe’i vatay o ela’eo vaho sinaro’i kerobe rey i vatay naho o bao’eo. Akore ty halava’i baoñe rey kanao niisake nitakatse i toetse masiñey boak’amy vatay; f’ie tsy niisak’alafe’e, le mbe ao pak’androany. Tsy ino ty amy vatay naho tsy i takelam-bato roe napo’i Mosè ao e Korebe añe rey, amy nifañina’Iehovà amo ana’Israeleo, ie vaho niavotse boake Mitsraime añe. Ie niakatse boak’amy toetse masiñey o mpisoroñeo—naho fa nañefe-batañe iaby o mpisoroñeo vaho tsy nitam-pirimboñañe; le nijohañe atiñana’i kitreliy ze hene nte-Levy mpisabo: i Asafe, i Hemane, Iedotone naho o ana’eo vaho o rahalahi’eo nisaroñe leny foty, am-pikantsañañe naho jejo-bory naho marovany, nitraok’ami’ty mpisoroñe zato-tsi-roapolo nampipopò trompetra. Aa ie niharo ho raike o mpitioke trompetrao naho o mpisaboo, ie nirihoñe am-pipoña-peo raike nandrenge naho nañandriañe Iehovà naho nañonjom-peo an-trompetra naho fikantsañañe vaho fitititihañe nijejo Iehovà ami’ty hoe: Ie ty soa, nainai’e ty fiferenaiña’e; le nilifore’ty rahoñe i kivohoy, i anjomba’Iehovà y vaho tsy nahafijohañe hitoroñe ao o mpisoroñeo ty amy rahoñey, fa nañàmpo i kivohon’Añaharey ty enge’Iehovà.

Iscriviti alla nostra newsletter

Installa Église Locale