Nekemia 10

Aa ty amy tsaraeñe rezay, le nampijadoñe fañina zahay naho vinoli-fitombo’o roandria’aio naho o nte-Levi’aio vaho o mpisoro’aio. Irezao o namoli-fitombok’azeo: i Nekemià Tirsatà, ana’i Kakalià naho i Tsidekià, i Seraià, i Azarià, Ieremià; i Pasore, i Amarià, i Malkiià, i Katose, i Sebanià, i Maloke; i Karime, i Meremote, i Obadià; i Daniele, i Ginetone, i Baroke; i Mesolame, Abiià, i Miiamine; i Ma’azià, i Bilgay, i Semaià. Ie hene pisoroñe. Le o nte-Levio: Iehosoa ana’i Azanià, i Binoy amo ana’i Kenadadeo, i Kadmiele; naho o rahalahi’iareoo: i Sebanià, i Hodià, i Kelita, i Pelaià, i Kanàne; i Mikà, i Rekobe, i Kasabià, i Zakore, i Serebià, i Sebanià; i Hodià, i Baný, i Beninò. Ty mpiaolo’ondatio: i Parose, i Pakate-moabe, i Elame, i Zatò, i Baný; i Boný, i Azgade, i Bebaý; i Adoniià, i Bigvay, i Adine; i Atere, i Kizekià, i Azore; i Kodià, i Kasome, i Betsay; i Karife, i Anatote, i Nebay, i Magpiase, i Mesolame, i Kezire; i Mesezabele, i Tsadoke, Iadoà; i Pelatià, i Kanàne, i Ananià; i Hoseà, i Kananià, i Kas’sobe; i Halokese, i Pilhà, i Sobeke; i Rekome, i Kasabnà, i Maaseia; naho i Akià, i Kanàne, i Anane; i Maloke, i Karime, i Baanà. Le ty ila’ondatio, o mpisoroñeo, o nte-Levio, o mpañambeñeo, o mpisaboo, o mpitoroñ’anjombao naho o hene ondaty niavak’am’ondati’i taneio ty amy Han’Añaharey, o vali’eo, o ana-dahi’eo naho o anak’ampela’eo, ze nahilala naho naharendreke; ro nirekets’amo longo’eo, amo roandria’iareoo, le nifanta naho nititike, t’ie hañavelo amy Han’Añahare nitolorañe añamy Mosè mpitoron’Añaharey, ty hiambeñe naho hanao ze hene lili’Iehovà Talèn-tikañe naho o fepè’eo naho o fañè’eo; naho tsy hatolotse am’ondati’i taneio o anak’ampelan-tikañeo ndra o anadahin-tikañeo; le ie minday kilankañe ndra mahakama haletak’ami’ty andro Sabotse ondati’i taneio, tsy hiviliañan-tika ami’ty Sabata ndra amo andro miavake ila’eo; naho hapòn-tika i tetekey ami’ty taom-pahafito vaho ze fampañavahan-tsongo am-pitan’iaia. Nanao fañè ka zahay songa hanolotse ty faha-telon-tsekele boa-taoñe ho ami’ty fitoroñañe i anjomban’Añaharentikañey; ho amy mofo-piatrekey naho amo enga-mahakama mitoitoio naho amo engan-koroañe nainai’eo, amo Sabotse o naho amo pea-bolañeo naho amo andro namantañañeo le ho amo raha miavakeo naho o engan-kakeo hijebañañe Israeleo vaho ho amo hene fitoloñañe añ’anjomban’Añahareo. Le nanoeñe an-kitsapake o mpisoroñeo, o nte-Levio, ondatio, ho ami’ty fanoloran-katae, hampizilihañe aze añ’anjomban’Añaharen-tikañe ao, ty amo anjomban-droaen-tikañeo, amo andro tinendre boa-taoñeo, harehetse amy kitreli’Iehovà Andrianañaharen-tikañey, ie nipaterañe amy Hake ao; naho ty faneseantika o loha-voan-tanen-tikañeo vaho ty loha-voa’ze volon-katae iaby, boa-taom-boa-taoñe, mb’añ’anjomba’Iehovà; naho ty tañoloñoloñan’ana-dahin-tikañe naho o terake valoha’e amo añomben-tikañeoo, ty amy nipaterañe amy Hake ao naho ty valohan-terak’amo mpirai-trokeo naho o mpirai-liao, haneseañe aze mb’añ’anjomban’Añaharentika, mb’amo mpisoroñe mitoroñe añ’anjomban’Añaharentikañeo naho ty haneseañe ty valohan-koba naho o engaeñeo; naho ty voa’ze hene karazan-katae, ty divay naho menake, mb’amo mpisoroñeo, mb’amo efets’efen’anjomban’Añaharen-tikañeo vaho mb’amo nte-Levio ty faha-folom-boka’o tete’aio, amy te mandrambe ty faha-folo amo teten-tika an-drovan-tikañe iabio o nte-Levio. Le hitraok’amo nte-Levio o mpisoroñe ana’i Aharoneo, ie mandrambe ty faha-folo’iareo o nte-Levio; le hendese’o nte-Levio mb’añ’anjomban’Añaharen-tikañe mb’amo efets’efen-trañom-pañajañeo ty am-pahafolo’i fahafoloy. Aa le hendese’o ana’Israeleo naho o nte-Levio i enga ahelahelay, i ampembay, i divaiy naho i menakey, mb’amo efets-efem-pañajan-karao’i toetse miavakey naho mb’amo mpisoroñe mifanehakeo naho amo mpañambeñeo vaho amo mpisaboo vaho tsy haforintsentika ty anjomban’Añaharentika.

S'abonner à notre newsletter

Installer Église Locale