Bentatse 14

Le naheoko te indroy i Vik’añondriy mijohañe am-bohi’i Tsione ey, vaho ama’e i rai-hetse-tsi-efats’ale-tsi-efats’arivo minday i tahina’ey naho i tahinan-dRae’ey an-dahara’e rey. Le tsinanoko boak’andindìñe añe ty feo hoe fitroñan-drano maro, naho ty fivolan-kotroke mikorokodoiñe, vaho hoe feom-pititike mititike o marovani’iareoo ka i feo tsinanokoy; le nitakasie’iereo ty sabo vao añatrefa’i fiambesam-pifeheañey naho añatrefa’i raha veloñe efatse rey naho i androanavy rey, vaho tsy eo ty nahafianatse i saboy naho tsy i rai-hetse-tsi-efats’ale-tsi-efats’arivo vinili-aiñe an-tane atoy rey. Tsy nandeo-batañe ami’ty ampela irezay, fa hahiringiri’e. Mañorike i Vik’añondriy iereo ndra aia aia ty ombà’e, ie jinebañe am’ondatio ho loha-voa aman’Añahare naho ho amy Vik’añondriy. Ie tsy nahaoniñam-bande am-palie, vaho tsy aman-kila. Nitreako amy zao ty anjely tovo’e nitiliñe an-teñateñan-dikerañe eñe minday i talili-soa tsy modoy, hitsey amo mpimoneñe an-tane atoio naho amy ze kila fifeheañe naho foko naho fameleke vaho ondaty, le hoe re am-piarañanañañe mafe, Mañeveña aman’Añahare vaho toloro engeñe, amy te tsatoke ty oram-pizakà’e. Mitalahoa amy namboatse i likerañey naho ty tane toy naho i riakey vaho o rano midoandoañeoy. Nanonjohy i anjeliy ty faharoe, nanao ty hoe: Rotsake! Rotsake i Babolone foloaingitrokey, i nampinoñe o kilakila’ndatio ami’ty divain-kadraon-kakarapiloa’ey. Nanonjohy iareo ty anjely tovo’e, ty fahatelo, nipoña-peo ami’ty hoe: Ndra ia ia mitalaho amy bibiy naho amy sare’ey vaho mandrambe viloñe ke an-kandri’e he an-taña’e eo, le ie ka ty hinoñe ami’ty divaim-pifombon’Añahare an-keri’e do’e amy fitovin-kaviñera’ey vaho ho samporeraheñe añ’afo aman-tsolifara añatrefa’o anjely masiñeo naho aolo’i Vik’añondriy. Le hionjoñe nainai’e kitro katroke ty hatoe’i fampisoañañ’iareoy; tsy ho amam-pitofàñe ndra handro ndra haleñe o mitalaho amy bibiy naho amy sare’eio, vaho ze mandrambe i vilo’i añara’eiy. Inay ty hifeaha’o noro’e am-patokisa’Iesoào; ie mpañambeñe o lilin’Añahareo. Le tsinanoko boak’andindìñe ey ty fiarañanañañe nanao ty hoe: Sokiro: Haha ze vilasy mivetrak’amy Talè ao henane zao. Eka! hoe i Arofoy, hitofa amo fitoloña’eo iereo, amy te mañorike iareo o fitoloña’iareoo. Nañente iraho le indroke ty rahoñe foty, naho niambesatse amy rahoñey ty manahake i Ana’Ondatiy, añambone’e eo ty sabakam-bolonahetse volamena, vaho am-pità’e eo ty fanatahañe masioñe. Niavotse i kibohotsey ty anjely raike nikoike am-peo mafe amy niambesatse amy rahoñeiy, ty hoe: Mamatsiha amo fanataha’oo vaho manataha fa tondroke ty sam-panatahañe, amy t’ie matoe, veka’e ho tataheñe ty voka’ty tane toy. Aa le nafatsi’i niambesatse amy rahoñeiy mb’an-tane atoy i fanataha’ey le tinatake ty tane toy. Niavotse i kibohotse andindìñe eñey ty anjely tovo’e ninday fanatahañe masioñe ka. Niakatse boak’amy kitreliy ka ty anjely nanan-dily ami’ty afo, le kinanji’e am-piarañanañañe mafe i amam-panatahañe masioñey, ty hoe: Mamatsiha amo fanataha’o masioñeo vaho atontono o voaloboke mirokoroko am-bahe’ty tane toio, fa ginoke o valobo’eo. Aa le navio’i anjeliy mb’an-tane atoy i fanataha’ey le natonto’e o am-bahe’ty tane toio vaho nafetsa’e amy fipiritan-divain-kaviñeran’Añahare jabajabay. Le linialia alafen-drova ao i fipiritan-divaiy vaho nidoandoañe boak’amy fipiritan-divaiy ty lio nahafionjoñe pak’an-daboridi’o soavalao sikal’ami’ty arivo-tsi-enen-jato stadione añe.

S'abonner à notre newsletter

Installer Église Locale