Foto’e 4

Nandrèndreke i Haova, vali’e t’i Dame, le nivesatse naho nisamake i Kàine vaho nanao ty hoe: Nahazoako lahilahy t’Iehovà. Nisamake indraike re, le i Hèbele zai’e. Nimpihare añondry t’i Hèbele le nimpiava tane t’i Kàine. Ie te indraike, nibanabana ty lengom-boñe’i taney am’Iehovà t’i Kàine, le ninday ty valohan’ana’o hare’eo naho ty sabora’e t’i Hèbele. Aa le nitoliha’Iehovà t’i Hèbele naho i banabana’ey, fe tsy hinao’e t’i Kàine naho i enga’ey. Niforoforo ami’ty habose’e amy zao t’i Kàine vaho nilonjom-bintañe Inoñe ty iviñera’o hoe t’Iehovà amy Kàine vaho ino ty mahalonjets’azo? Tsy hiampokòfañe hao irehe naho toloñe’o ty hiti’e? Aa naho tsy soa ty anoe’o le mangonònoke anjili-dalañe ao ty hakeo milelalela te hahazo azo, f’ie feheo. Nifanaontsy amy Hèbele rahalahi’e t’i Kàine, aa ie nimb’an-teteke mb’eo, niambotraha’i Kàine t’i Hèbele naho nañohofa’e loza. Aa le hoe t’Iehovà amy Kàine, Aia t’i Hèbele rahalahi’o? Tsy fantako, hoe re, mpiambeñ’an-drahalahiko hao iraho? Hoe re: Ino o nanoe’oo? Inao! mitoreo amako boak’an-tane ao ty feon-dion-drahalahi’o; le fa nafà’i taney irehe henane zao, ie nanoka-bava handrambe an-taña’o i lion-drahalahi’oy. Aa ie miava tane henane zao le tsy hafoe’e ama’o ty haozara’e; ie ho mpirererere naho mpitralantralañe an-tane atoy. Hoe t’i Kàine am’Iehovà, Tsy leoko babeñe o fandilovañe ahio; anindroany irehe nanao soik’ahy amo tarehe’ty tane toio, naho hampietaheñe amy lahara’oy iraho, le ho mpiriorio naho mpirererere an-tane atoy, vaho songa hañoho-doza amako ze mifanojeha amako. Le hoe t’Iehovà ama’e, Aiy! ho valeñe im-pito ze mamono i Kàine; vaho namiloñe i Kàine t’i Andrianañahare tsy ho vonoe’ze hifanalaka ama’e. Aa le nienga boak’añatrefa’Iehovà t’i Kàine, noly an-tane Rererere, atiñana’i Edene añe. Nifohi’i Kàine ty vali’e, le niareñe, nisamake i Kanòke; ie nañoren-drova vaho nitokave’e ami’ty añara’i Kanoke ana’e. Nisamake Irade t’i Kanoke; le nisamak’i Mehojaèle t’Irade le nisamak’i Metosaele t’i Mehojaèle vaho nisamake i Lemeke t’i Metosaele. Nampirafe roe t’i Lemeke; le natao ty hoe Adae ty raike naho i Zilae ty raike. Nisamake Iabale t’i Adae; ie ty raem-pimoneñe an-kibohotse naho mpihare. Natao Iobale ty rahalahi’e, ie ty rae’o mpititike kararàke naho solio. Nisamake i Tobale-kaine t’i Zilae, ie ty nitsene ze hene haraotse torisìke naho viñe. I Naamae ty rahavave’i Tobale-kaine. Hoe t’i Lemek’amo vali’eo: Tsanoño ty feoko ry Adae naho Zilae; Ry vali’i Lemekeo: mitsendreña o entakoo: Vinonoko t’indaty nandratse ahy, naho ty ajalahy nandafa ahiko. Aa naho i Kàine ro valeañe im-pito, Le toe impitompolo fito amby ka t’i Lemeke. Nifohi’i Dame indraike i vali’ey, le nisamak’ana-dahy vaho natao’e Sete ty añara’e, fa hoe i rakembay: Fa nanendre anake ho ahy t’i Andrianañahare handimbe i Hèbele vinono’i Kàine. Nahatoly anake ka t’i Sete, le natao’e Enose ty añara’e. Nifototse amy zay te nikanjy ty tahina’Iehovà ondatio. izay ty takelam-piantoño’i Dame.

Prenumerera på vårt nyhetsbrev

Installera Église Locale