Iobe 35 — Baiboly Tandroy

Iobe 35

Le hoe ty natovo’i Eliho: Atao’o mahity hao i nanoe’o ty hoe, Izaho ro vantañe te aman’Añahare. Fa hoe irehe, Inoñe ty ho tombo’e ho azo? Ino ty ho tambeko mandikoatse te tsy nandilatse? Hanoiñe azo naho o rañe’o mindre ama’oo iraho. Mitalakesa mb’andikerañe ey vaho Mahaisaha; Heheke o rahoñeo, ambòne’o iereo. Ihe mandilatse, Mijoy aze hao? Ie bey hakeo, Inoñe ty anoe’o ama’e? Ie vantan-drehe, ino ty atolo’o aze, ke ino ty rambese’e am-pità’o? Ho ama’ondaty manahak’azo ty hatsivokara’o naho amo ana’ondatio ty havañona’o. O hamarom-pamorekekeañeo ty itoreova’iareo, ty sira maoza’i maroy ty ikaiha’iareo, fe tsy eo ty manao: Aia t’i Andrianamboatse ahy, i Mpañomey sabo an-kaleñey, i mañòke raha maro amantika te amo bibi’ty tane toioy, vaho ampahihire’e ambone’o voron-tiokeo? Eo ty mikaike, f’ie tsy manoiñe ty amy firengevoha’ondaty raty tserekeoy. Toe tsy janjin’Añahare ty raha kafoake; tsy haoñe’i El-Sadai, Antsake t’ie manao te tsy mahaoniñe aze; aolo’e eo ty enta’o, aa le liñiso; Ie henaneo, mbe tsy nitilihe’e an-kaviñera’e, tsy loho nihaoñe’e o fandilarañeo. Aa le evoñe ty aakam-palie’Iobe; ampitomboa’e lañonañe tsy aman-kilala.

Подписаться на нашу рассылку

Следите за новыми профилями, мероприятиями и обновлениями платформы.