Iobe 1

Teo t’indaty an-tane Otse añe, Iobe ty tahina’e, ondaty vañoñe naho vantañe, mpañeveñe aman’Añahare, mpalain-karatiañe. Nisamake fito lahy re, telo ty anak’ampela’e. I vara’ey: fito arivo ty mpirai-lia’e naho telo arivo ty rameva’e; liman-jato ty katraka’e mpitrao-baoñe naho borìke liman-jato vaho nitozantozañe ty añ’anjomba’e ao. Ie t’indaty ni-lohà’ze hene nta-tiñanañe. Lili’i ana-dahi’e rey ty nanao takataka añ’anjomba’e, sindre ami’ty andro’e vaho nampañitrike naho nañambara amy rahavave’iareo telo rey ty hitrao-pikama naho rano ama’e. Aa ie nimodo ty san-tsabadida’iareo le nitokave’Iobe vaho nefera’e. Nañaleñalen-dre nañenga soroñe ty ami’ty ia’iareo iaby, fa hoe t’Iobe, Ke nandilatse o anakoo vaho niteratera an’Andrianañahare an-tro’e ao. Izay ty nilili’Iobe. Nitsatok’ami’ty andro niheova’o anak’Andrianañahareo añatrefa’Iehovà te nivotrak’am’iereo ka i mpañinjey. Le hoe t’Iehovà amy mpañinjey: Hirik’aia v’iheo? Le hoe ty natoi’i mpañinjey am’Iehovà, Nimbeo’mbeo an-tane ey iraho, nijelanjelañe ama’e. Aa hoe t’Iehovà amy mpañinjey: Hinarahara’o hao t’Iobe mpitoroko? Te tsitantane ty mañirinkiriñe aze; vañon-dre naho ondaty vantañe mpañeveñe aman’Añahare vaho malain-ty raty. Nanoiñe Iehovà ami’ty hoe i mpañinjey: Aa vaho an-tsi-vente’e hao ty añeveña’Iobe aman’Añahare? Tsy Ihe hao ty nañarikatok’aze am-pahetse, ie naho ty anjomba’e naho ze hene ama’e miariseho aze? Nitahie’o ty satam-pità’e vaho manitsike i taney ty vara’e. Ahitio ty fità’o henaneo, paoho o fanaña’e iabio, le toe ho teraterae’e añatrefan-dahara’o. Aa hoe t’Iehovà amy mpañinjey, Ingo, fa ambane fehe’o eo o fanaña’e iabio, fe adono tsy hahiti’o ama’e ty taña’o. Aa le nisitak’ami’ty fiatrefa’Iehovà i mpañinjey. Ie te indraik’andro, nanao takataka naho ninon-divay añ’anjomba’i zoke-lahi’ey i ana’e rey, le ingo ty nihitrike mb’am’Iobe mb’eo nanao ty hoe: Nitari-dasary o katrakao le nihinañe marine eo o borìkeo, le nañotroke mb’eo o nte-Sabeo naho tinonga’iereo. Zinama’iareo am-pibara o mpiarakeo vaho izaho avao ty nahabotitsike hivolañe ama’o! Ie mbe nitalily, avy ka ty raike nanao ty hoe: Nidoiñe boak’an-dikerañe ey ty afon’Añahare namorototo o lia raikeo naho o mpiarakeo vaho nimongoreñe, izaho avao ty nivoratsake hitalily ama’o. Ie mbe nisaontsy, nimb’eo ka ty raike nanao ty hoe: Nizara ho firimboñañe telo o nte-Kaldeao, le hinao’iareo o rameva iabio. Fonga binaibai’iareo ami’ty meso-lava o mpiarakeo le izaho avao ty nipoliotse hitaroñ’ama’o. Ie mbe nisaontsy, le nimb’eo ka ty raike ninday ty hoe: Nikama naho ninon-divay añ’anjomba’i zoke-lahi’eo o ana-dahi’o naho anak’ampela’oo, le ingo niavy ty tio-bey boak’am-patrambey añe, nikabokaboke i anjombay ami’ty hotso’e efatse naho nihotrak’am’ondaty tora’eo; fonga nihomake. Izaho avao ty nirombake hitalily ama’o. Niongak’amy zao t’Iobe nandriatse ty saro’e naho nañaratse ty añambone’e naho nibabok’an-tane eo nisoloho, vaho hoe re: Niboridan-draho te niboak’an-kovin-dreneko ao, le hijangeajangeañe ka t’ie himpoliako ao. Nanolotse t’Iehovà, vaho nañombotse t’Iehovà; bangoeñe ty tahina’Iehovà. Ie amy ze iaby, tsy nandilatse t’Iobe, tsy nanisý raha tsy mañeva aman’Andrianañahare.

Подписаться на нашу рассылку

Установить Église Locale