Sabo 19

Tseize’i likerañey ty engen’Añahare, misenge o tolom-pità’eo i lañelañey. Handro an-kandro t’ie midoan-tsaontsy, haleñ’an-kale te mitaron-kihitse. Tsy aman-dañonañe tsy aman-tsara, tsy janjiñeñe o fiarañanaña’eo. Fe manitsike ty tane toy o tali’iareoo, pak’añ’olo-ty voatse toy o talili’eo; napo’e ama’e ao ty kivoho’i àndroy. Manahak’i mpañenga miakatse i akiba’ey, mitreñe hoe fanalolahy miherereake an-day. Hirik’angadon-dikerañ’eñe i fionjona’ey naho ty fiaria’e pak’añ’olo’eo, vaho tsy eo ty mahafietake amy hatrovoha’ey. Ki’e t’i Hà’Iehovà, mañavao ty haveloñe; to ty taro’Iehovà, mampahihitse ty sotra; Mahity o fañè’Iehovà o, mampirebek’arofo; hiringiri’e ty fandilia’Iehovà, mpañazava fihaino; Malio ty fañeveñañe am’Iehovà, tsy mb’ia ho modo; vantañe o fizakà’Iehovà o hene mahity; Mahasinda te amo volamenao, eka ndra volamena maro hiringiri’e; vaho mamy te amo tantele naho papi’e miorikeo; mbore hatahatae’e i mpitoro’oy, ra’elahy ty tambe t’ie oriheñe. Ia ty mahatsikarake o hila’eo? Liovo amo hakeo mietakeo iraho. Afofio amo mpitoro’oo o fisengeañeo, tsy mone hamehe ahy. Halio tahiñe amy zao iraho, vaho ho hahañe ami’ty fiolañe losotse. Ho no’o añ’atrefa’o abey o fivolam-bavakoo, naho ty fitsakorean-troko ry Iehovà, lamilamiko naho mpijebam-piaiko.

Baiboly Tandroy

Copyright © 2023 Steve Lellelid Language: Tandroy (Malagasy, Tandroy-Mahafaly) DRAFT VERSION This translation is made available to you under the terms of the Creative Commons Attribution Share-Alike license 4 — CC-BY-SA-4.0 — CC-BY-SA-4.0

Subskrybuj nasz newsletter

Bądź na bieżąco z nowymi profilami, wydarzeniami i nowościami platformy.