Iekezkèle 47

Nendese’e nibalike mb’am-piziliha’i kivohoy mb’eo iraho; le ingo te nikararàke boak’ambanen-tokona’i kivohoy ty rano, maniñanam-beo, amy te miatrek’atiñanañe i kivohoy; naho nidoandoañe boak’atimo’i kitreliy i ranoy, ambane’ty rindry atimo’i kivohoy. Aa le nampiakare’e mb’amy lalambey avaratsey iraho, naho niaoloa’e niary mb’amy lalambey alafe’e miatrek’atiñanañey; vaho ingo i rano nitsiritsioke boak’añ’ila’e atimoy. Nionjoñe mb’atiñanañe mb’eo indatiy reketse taly am-pità’e, nanjehe kiho arivo naho niaolo ahy nitsake i ranoy; an-tsokose eo ty halale’o ranoo. Nanjehe kiho arivo indraike re, naho niaolo ahy nitsake i ranoy; añ’ongotse eo i ranoy. Mbore nanjehe kiho arivo vaho niaolo ahy nitsake i ranoy; ambania eo i ranoy. Nanjehe kiho arivo indraike re, le nisorotombake tsy nahafitsahako, fa nionjoñe i ranoy; rano mañeva lañoeñe, fa saka tsy lefe soroheñe. Le hoe re tamako: O ana’ondatio, isa’o hao? Vaho nampibalihe’e mb’añ’olo’i sakay mb’eo iraho. Aa naho nampibaliheñe, le hehe te hatae maro ty añ’olo’i oñey etoy naho eroy. Le hoe re amako, Mikararake mb’an-tane atiñanañe añe o rano retoa, aa ie mizotso mb’amy Arabà mb’eo naho mandoak’an-driak’añe, amy riake mitrotròtsey ao, le ho jangañe i ranoy. Ie amy zay, ho veloñe ze fifamorohotañe ndra aia’aia andenà’o rano retìañe; fiañe vasiañeñe ty ho ao, fa ty fañamelañañe ze he’e ty ikararaha’o rano retoam-b’etoy; vaho ho hene veloñe ze takare’ty oñe toy. Ie amy zay, hijohañe añ’olo’e eo o mpamintañeo; boak’Engedy pak’Eneglaime ty ho famelaran-karato; naho ho maro karazañe manahake o fiañe an-driake beio, ami’ty fitozantoza’e. Fe tsy ho melañe ka o tane’e mangitsakitsakeo naho o motsemotse’eo, fa ho famokaran-tsira. Hitiry añ’olo’i oñey etoy naho añ’olo’e eroy ze hene hatae mete kamaeñe, tsy hiheatse o rave’eo, naho tsy hihintsañe o voa’eo; ho añom-boa boa-bolañe amy te boak’an-toetse miavake ao o rano’eo; ho fikamañe o voa’eo, naho ho aoly o rave’eo. Hoe ty nafè’Iehovà Talè: Zao ty ho efe-efe’o tane ho zarae’areo amo fifokoa folo-ro’ambi’Israeleo ho lova’e amy taneio; roe ty ho anjara’Iosefe. Le ho lovà’areo, ty raike naho ty ila’e, ty amy nañonjonako haokey t’ie tsy mete tsy hatoloko an-droae’areo; aa le mitsatok’ama’areo ty tane toy ho lova. Itoy ty ho efe’i taney: mañavaratse boak’amy riake jabajabay, miary e Ketlone, pak’ami’ty fimoahañe e Tsedade, i Kamate, i Berotate, i Sibraime (añ’ila’i Damesèke naho añ’ila’i Kamate eo); vaho i Katsarehatikone añ’olo’i Kavrane añe. Ty efe’e boak’amy riakey ty hifototse e Katsarenone le mb’añ’efe’i Damesèke; le avaratase, mañavaratse ty efe-tane’i Kamate, izay ty ho ila’e avaratse. Le ty efe’e atiñanañe, añivo’i Kavrane naho i Damesèke naho i Gilade naho an-tane Israele mañolotse Iordaney; miranga boak’an-driak’atiñanañe pake Tamare; izay ty ho efe’e atiñanañe. Le ty efe’e atimo: boak’e Tamare pak’an-tane manginakina’i Meribà e Kadese mañolotse i torahañe mb’an-driake jabajabay mb’eo; izay ty efe’e atimo. Ty efe’e ahandrefañe: le i riake jabajabay ty ho efe’e ampara’te tandrife i jebam-bohi’i Kamatey. Izay ty ho efe’e ahandrefa. Ifanjarao ama’areo i taney, amo fifokoa’Israeleo. An-tsapake ty anjarañe aze, ho lova’areo naho a o renetane mañialo ama’areoo, o fa nahatoly anak’ama’areoo, le volilio ho nte-Israele, hiharo lova ama’areo amo fifokoa’Israeleo. Ho tolora’areo lova amy fifokoañe añialoa’ey o rene-taneo, hoe t’Iehovà Talè.

Subskrybuj nasz newsletter

Zainstaluj Église Locale