Tolom-Piràhe’e 7

Hoe i talèm-pisoroñey: To v’zao? Hoe t’i Stefana: Ry longo, naho ry aba, Inao! Ie mbe te Mesopotamia añe taolo’te nimoneñe e Haraña t’i Abraàme raen-tikañe le niheo ama’e t’i Andrianañahare Rengèñey, le nanoa’e ty hoe: Misitaha an-tane’o naho an-drolongo’o, mimoaha an-tane hatoroko azo. Aa le niakats’i tane Kaldea añe re nivotrake e Harane. Ie añe, naho fa vilasy ty rae’e, le nampiavote’e homb’an-tane fimoneña’areo atoy henaneo. Fe tsy nimea’e lova ama’e, ndra ty tane handiam-pandia’e, ie mbetsiterake, le nampitama’e te hatolots’aze naho amo tarira’e hanonjohy azeo ho fanañañe izay. Hoe ty nitsaran’Añahare, t’ie: Ho renetane an-tanen’ambahiny o tarira’eo, naho hondevozeñe, vaho ho volevolèñe efa-jato taoñe. Fe ho zakaeko ze tane mañondevo iareo, hoe t’i Andrianañahare, ie añe, le hiavotse iereo, hitoroñe ahy ami’ty toetse toy. Le natolo’e aze ty fañinam-pisavarañe naho nisamake Isaka re le nisavare’e ami’ty andro fahavalo, naho nisamake Iakobe t’Isaka vaho i androanavy folo ro’amby rey t’Iakobe. Ie nikirañe Iosefe i androanavy rey, le naleta’iereo ho ondevo Egipte añe. Fe tama’e t’i Andrianañahare nandrombak’aze amy ze fonga haoreañe naho tinolo’e hihitse naho fañisohañe añatrefa’i Farao mpanjaka’i Egipte le nanoe’e mpamandroñe hifehe i Egipte vaho o añ’anjomba’e iabio. Nandramban-tane Egipte naho Kanana amy zao ty san-kasalikoañe vaho ty hasotriam-bey le tsy nahaoniñe mahakama o roaentikañeo. Ie jinanji’Iakobe te aman-tsako ty Egipte, le nampihitrife’e mb’eo o roaentikañeo amy valoha’ey. Ie amy faha roey le nampahafohim-batañ’amo rahalahi’eo t’Iosefe vaho nampandrendreheñe i Farao o longo’Iosefeo. Aa le nampisangitrife’Iosefe t’Iakobe rae’e naho o longo’eo, i fitom-polo-lime amby rey. Le nañavelo mb’e Egipte mb’eo t’Iakobe vaho nihomake, ie naho o roaentikañeo, le nasese mb’e Sekema añe, ie nirohoteñe amy lonake vinili’i Abraàme drala amo ana’i Hamora nte Sekemaio. Aa naho fa an-titotse ty andro nampitaman’Añahare i nifantà’e amy Abraàmey, le nitombo naho nangetseketseke Egipte añe ondatio. Loneak’amy zao ty mpanjaka hifehe i Egipte tsy nahafohiñe Iosefe. Ie ty nañaramamo ondatin-tikañeo am-pamañahiañe naho famorekekeañe, naho nampiboake o ajajamena’iareoo tsy hahatam-beloñe. Toly henane zay t’i Mosè, le nisoa vintañe am-pivazohoan’Añahare, vaho nitaiàñe telo volañe an-trañon-drae’e ao. Aa ie niotañe, rinambe’ty anak’ampela’i Farao naho nibeize’e ho ana’e, le naòke amy ze hene hilala’o nte Egipteo t’i Mosè vaho ni-fanalolahy an-tsara naho fitoloñañe. Ie fa ho efa-polo taoñe t’i Mosè, le niheo añ’arofo’e ty hitilike o longo’e ana’Israeleo. Ie nioni’e te nisamporeraheñe tsy aman-tali’e ty raike, le nañolots’aze, namale fate i niforekekeñey vaho nañoho-doza amy nte-Egiptey. Natao’e ho rendre’o longo’eo ty fandrombahan’Añahare am-pità’e, f’ie tsy nahafohiñe. Ie niloakandro, niheo am’iereo mb’eo re nanjo ty nifandrapak’aly, le nimanea’e fifampilongoañe ami’ty hoe: O lahireo, mpiroahalahy nahareoo; Akore te mifampijoy? Fe nanafasiotse aze i namofoke i rañe’eiy, nanao ty hoe: Ia ty nañory azo ho mpifehe naho mpizaka anay? Hamono ahy v’iheo, hambañe amy nanoa’o i nte Egipte omaley? Ty amy entañe zay, nitriban-day t’i Mosè naho nirenetane e Midiana añe vaho nisamak’anadahy roe. Ie nimodo ty efa-polo taoñe, le nisodehañe ama’e an-dratraratram-bohi-Sinaiy añe ty anjeli’Iehovà ami’ty lel’afo an-drongoñe. Ie nioni’i Mosè zay le hinarahara’e i nizoeñey; le nañarivoa’e hahaisake vaho nivovo ama’e ty fiarañanaña’Iehovà nanao ty hoe: Izaho o Andrianañaharen-droae’areoo, t’i Andrianañahare’i Abraàme, naho Isaka vaho Iakobe. Aa le ninevenevetse t’i Mosè tsy nahavany niisake. Le hoe t’Iehovà tama’e: Afaho o hana am-pandia’oo fa masiñe o toetse ijohaña’oo. Toe niisako ty falovilovia’ondatiko e Egipt’aoo, naho tsinanoko ty toreo’iareo vaho nizotso hañaha iareo. Antao arè, fa hahitriko mb’e Egipte mb’eo irehe. Fe kiniho’iareo ami’ty hoe t’i Mosè: Ia ty nañory azo ho mpifehe naho mpizaka anay? Ie ty nafanton’Añahare ampità’i anjely niboak’ama’e amy rongoñeiy ho mpifehe naho mpandrombake iareo. Indatiy ty nampiavotse iareo naho nanao halatsàñe naho viloñe tsi-tantane Egipte ao naho amy Riake Menay vaho am-patrambey ao efa-polo taoñe. Ie i Mosè nitaroñe amo nte-Israeleo ty hoe: Hampitroaren’Añahare ho anahareo ty mpitoky hambañe amako boak’amo longo’areoo. Ie ty nitraok’amy anjeliy amy fivori-bey am-patram-bey añey, niharo amy anjely nisaontsy ama’e am-bohi-Sinaiy vaho taman-droaentikañe; ie ty nandrambe o fetse veloñe nitaroña’e aman-tikañeo. Fe, nizeharen-droaentika naho nasiotsio’iareo, vaho nitolike mb’Egipte ty arofo’iareo le nanao ty hoe amy Arone: Andranjio ndrañahare hiaolo anay, f’i Mosè nañavotse anay añ’Egipte izay, amoea’ay ty nizò aze! Nitsene bania iereo henane zay naho nibanabana soroñe amy sarey, vaho nirebek’amy sata-pità’iareoy. Aa le niambohoan’Añahare naho nitolora’e ty hitoroñe i fifamorohotan-dindìñey, ie pinatetse amy bokem-pitokiy: O ry anjomba’Israeleo, nañenga biby linenta vaho soroñe amako efa-polo taoñe am-patram-bey añe v’inahareo? Te mone nitarazoe’areo ty kivoho’i Moloka, naho ty vasia’i Refane ndrañahare’areoy, o samposampon-draha namboare’areo ho fitalahoañeo. Aa le haseseko mb’an-kalo’i Bavele añe nahareo. Taman-droaen-tikañe an-dratraratra añe i kivohom-pitaroñañey, namboareñe do’e amy nisaontsie’e amy Mosèy te hamboare’e hamban-tsata amy niisa’ey. Le nampizilihe’o roae’ay nandrambe azeo izay mindre amy Josoa, ie tinava’iareo amo kilakila’ndaty nasiotsion’Añahare aolon-dahara’iareoo i Taney; ie izay ampara’i Davide; ie nanjò fañisohañe añatrefan’Añahare, le nihalaly ty hahaoniña’e toetse himoneñan’Añahare’Iakobe. Fe i Selomò ty nandranjy anjomba ho aze. Toe tsy miambesatse ami’ty nanoem-pitàñe t’i Andindimoneñe, amy tsara’i mpitokiy: Fitobohako i likerañey, fitongoàn-tomboko ty tane toy. anjomba manakore arè ty ho ranjie’areo ho ahiko? Hoe t’Iehovà. Ke, aia ty toetse hitofàko? Tsy ty tañako hao ty nanao ze he’e zao? Ry gan-katoke tsy sinavatse añ’arofo ndra an-dravembia. Zehare’areo nainai’e i Arofo Masiñey manahak’an-droae’areo avao. Ia amo mpitokio ty tsy nisamporerahen-droae’areo? Nañohofa’iareo loza o nitoky ty fitotsaha’i Vañoñeio, i nafote’areo naho vinono’areo anianiy; iereo fa nandrambe i Hake nafè’o anjelioy, f’ie tsy nambenañe. Ie jinanji’iereo i hoe zay, le niromotse añ’arofo vaho nampikodrì-nife. Ie ka, lifotse i Arofo Masiñey, niandrandra nitalake i likerañey vaho nahaisake ty engen’Añahare naho Iesoà nijohañe am-pitàn-kavanan’Añahare ey. Heheke, hoe re, Treako te misokake o likerañeo vaho mijohañe ampitàn-kavanan’Añahare eo i Ana’ondatiy. F’ie nipoña-koràke, nanentsen-dravembia vaho fonga nitrao-pañoridañe aze, le naronjeronje’iareo alafe’i rovay, naho nametsa-bato ama’e vaho napo’o valolombeloñeo an-tombo’ty dogalahy atao Saole eo o sarimbo’iareoo. Ie nitolom-pametsam-bato amy Stefana, le nikaihe’e ty hoe: Ry Iesoà Talè, rambeso ty troko. Ie tafatongaleke, le pinaza’e am-piarañanañañe ty hoe: O Talè, ko tiñea’o am’iareo ty hakeo toy. Ie nanao izay le nirotse.

Misoratra ao amin'ny gazety anay

Apetraho ny Église Locale