Tolom-Piràhe’e 3

Nindre nionjomb’añ’anjomban’Añahare mb’eo amy ora fitalahoañe amy siveiy t’i Petera naho i Jaona. Le teo ty lahilahy nitakoneñe, nikepeke boak’ami’ty nahatoly aze, ie natobòke boak’andro an-dalam-bei’i anjomban’Añaharey atao ty hoe Fanjàka eo, nihalaly falalàñe amo mizilik’añ’anjomban’Añahareo. Ie nahaoniñe te hizilik’amy anjombay t’i Petera naho i Jaona, le nihalalia’e falalàñe. Fe nitalahare’i Petera naho i Jaona, nanao ty hoe ama’e: Mivazohoa mb’etoa. Le nihaoñe’e fa nitama raha. Le hoe t’i Petera: Tsy amam-bolafoty ndra volamena iraho, fe homeiko azo ze amako: Ami’ty tahina’Iesoà nte Nazareta Norizañey, Midraidraita! le rinambe’e ty fitàn-kavana’e naho nongaha’e vaho nihafatratse amy zao o fandia’e naho fange’eo. Le nitsamboan-dre naho nitrahañe vaho nitsontike le niharo fizilik’am’iereo mb’añ’anjomban’Añahare ao, mbore nijohañe mbore nitambòtrake vaho nibango an’Andrianañahare. Naho nioni’i lahialeñey t’ie nitrantràñe, nisabo an’Andrianañahare, naho naharendreke i nikonenake nihalaly falalàñe an-dalam-bey Fanjàka’i anjomban’Añahareiy, le niveren-draha naho nilatsa amy nanoañey. Nireketse amy Petera naho i Jaona i nikepeke nampijangañeñey, le nilay mb’am’iereo amy kiririsa atao: A i Solomonay mb’eo ze hene ondaty, fa lifo-kavereñañe. Ie nirendre’i Petera, le nilañona’e ty hoe am’ondatio: Ry nte Israeleo, ino ty ilatsà’areo o raha zao? ino ty isambà’areo anay hoe te zahay, ami’ty haozara’ay naho ami’ty havañona’ay, ro nampanjotike t’indaty toy? I Andrianañahare’i Abraàme naho Isaka vaho Iakobe, i Andrianañaharen-droaentikañey, ro mandrenge Iesoà mpitoro’e nasese naho nifarie’areo añatrefa’i Pilato, ie fa nisafiry ty hamotsotse aze. Tineti’areo i Masiñe naho Vañoñey naho nihalaly te hahàñe ama’areo ty mpamono, vaho vinono’areo i Rañandrian-kaveloñey, f’ie natroan’Añahare an-kavilasy; valolombeloñe zahay. Ty fatokisa’e amy tahina’ey ty nampaozare’i tahina’ey ondaty isa’areo naho fohi’areoo; eka, ty fatokisañe ama’e ty naha-arimoen-kajanganañ’aze añatrefa’areo iaby. Ie amy zao, ry longo, fantako te namoea’areo i nanoe’areoy—hambañe amy nanoe’o bei’areoo. F’ie ty nañenefan’Añahare o nitaroñe’e am-palie’ze fonga mpitoky haehaeo, te tsi-mahay tsy hijale i Noriza’ey. Misolohoa arè, mipolia, soa te ho faoheñe o tahi’areoo, naho hitotsake boak’am-piatrefa’Iehovà ty san-kanintsiñe, vaho hirahe’e t’Iesoà, i Norizañe tinendre ho anahareoy, ze tsi-mete tsy ho tanañe an-dikerañe ao hey ampara’ty sam-pañavaoañe ze he’e tsinaran’Añahare am-palie’ze hene mpitoky masiñe boak’am-pifotora’ty voatse toy. Fa hoe t’i Mosè: Mpitoky hambañ’amako ty hatroa’Iehovà Andrianañahare boak’amo longo’areoo; janjiño ze hene ho saontsie’e ama’areo. Le hifetsake te haitoañe am’ondati’eo ze tsy mañaoñe i Mpitokiy. Eka, songa nitoky o andro zao ze mpitoky nisaontsy mifototse amy Samoela vaho o nanonjohio. Inahareo ro tarira’o mpitokio naho mpiamy fañina nanoen’Añahare aman-droaentikañey, Ie nanao ty hoe amy Abraàme: I tiri’oy ro hitahiañe ze kila foko’ty tane toy. Ie natroan’Añahare ty mpitoro’e Iesoà le nahitri’e ama’areo hey hampanintsiña’e, amy nampiambohoe’e anahareo o sata tsivokatseo.

Misoratra ao amin'ny gazety anay

Apetraho ny Église Locale