Tolom-Piràhe’e 4

Ie mbe nisaontsy am’ondatio, le nivotrak’am’iereo o mpisoroñeo naho ty beim-pigari’i anjomban’Añaharey naho o Tsadokeo, nitsimboetse te nañoke ondatio naho t’ie nitaroñe ty fivañonan-ko veloñe amy Iesoà. Nipao-pitañe ama’e iereo le najoñe am-pandrohizañ’ao ampara’ty loak’andro amy te nihaleñe. Fe maro amo nahajanjiñe i tsaraio ty niantoke; va’e lime arivo ty ia’indaty rezay. Ie amy loak’àndroy, nivory e Ierosaleme ao o mpifeleke naho roandriañe naho mpanoki-dili’iareoo naho i Anasy talèm-pisoroñe naho i Kaiafa naho i Jaona naho i Aleksandro vaho ze hene longo’i talèm-pisoroñey. Aa ie fa nadoke añivo eo, le hoe ty nañontaneañe: ami’ty lili’ia ndra ami’ty tahina’ia ty nanoe’areo o raha zao? Lifotse i Arofo Masiñey t’i Petera nanao ty hoe: O ry mpifehe naho roandria’ondatio: Naho ty hasoa nanoe’ay amy lahilahy nideme’e nijanganeñey ty añotsohotsoa’areo anay androany, le hampahafohine’ay ama’areo naho amo nte Israele iabio te i tahina’Iesoà nte Nazareta Norizañey, i naradorado’areo fe natroan’Añahare amy havilasiiy, ty ijohaña’t’indaty jangañe toy añatrefa’areo etoa, Ie i vato nadò’areo mpandrafitsey, naho fa vato-lahi’e henaneo. Le tsy aman’iaia ila’e ty fandrombahañe, amy te tsy nitolorañe tahinañe ila’e ambane’i likerañey ondatio, ze maharombak’antika. Ie nahaisake ty fahasibeha’i Petera naho i Jaona, naho nahaoniñe te ondaty tsy nianatse naho tsy nioke, le nilatsa vaho nahatiahy t’ie mpiam’Iesoà. Aa kanao niisake te nindre nijohañe am’iereo i lahilahy nijanganeñey, le tsy nahatìñe aze iereo, f’ie nanitak’iareo mb’alafem-pivory ao vaho nisafiry ty hoe: Hataon-tika akore i lahilahy rey? Ie midodea amo hene mpimoneñe e Ierosalemeo t’ie ro nanoañe raha tsitantane, tsy lefe-tika liereñe. Aa, tsy mone ho losotse ty fiboelea’e am’ondatio, antao hañatahata iareo tsy hivolañe i añarañey ama’ondaty ndra iaia. Le nikanjiañe vaho nililieñe t’ie tsy hivolañe naho tsy hañoke ami’ty tahina’Iesoà ka. Fe hoe ty natoi’i Petera naho i Jaona: Tsakoreo hera ho to am-pivazohoan’Añahare, t’ie hañaoñe anahareo ambone’i Andrianañahare? Amy te tsi-mahay tsy taroñe’ay o raha niisa’ay naho jinanji’aio. Aa ie nendahañe indraike, le navotsotse, fa tsy eo ty handafàñe iareo ty am’ondatio, ie hene nandrenge an’Andrianañahare ty amy nitafatendrekey. Nilosotse ty efa-polo taoñe i lahilahy nampiboahañe i vilom-pijangañañeiy. Ie nihaha le nimb’amo mpiama’iareoo mb’eo nitalily i nisaontsia’o mpisorom-beioy naho o roandriañeo. Ie nahajanjiñe, le nipoña-peo aman’Añahare nanao kapindre ty hoe: Ry Iehovà, Ihe ro Andrianamboatse i likerañey naho ty tane toy naho i riakey vaho ze he’e am’iereo ao, le nanoe’o am-palie’i Davide mpitoro’oy, ty hoe: Ino ty mampidabadoa o kilakila ‘ndatio naho ty ikaboha’ondatio raha kafoake? Miongake o mpanjaka’ty tane toio, vaho mifanontoñe o mpifelekeo hiatreke Iehovà naho i Noriza’ey.’ Toe ami’ty rova toy ty nifanontona’i Heroda naho i Pontio Pilato naho o kilakila ondatio mindre amo nte Israeleo, hañatreatre i Mpitoro’o masiñey, Iesoà Noriza’oy. Nanoe’iereo iaby ze sinafirim-pità’o naho nisatrien’arofo’o taolo hanoeñe. Aa ie henane zao, ry Iehovà, vazohò o hatahata’iareoo, le toloro fahasibehañe o mpitoro’oo hahafitaroña’iareo o tsara’oo, ie añitia’o fitàñe hampijangañe; vaho anoeñe an-tahina’Iesoà mpitoro’o masiñey ty viloñe naho raha tsi-tantane. Ie niloloke iereo, le niezeñezeñe i toetse nivoria’iereoy; le fonga nilifotse i Arofo Masiñey vaho nahasibeke nisaontsy ty tsaran’Añahare. Songa nitraok’arofo naho havelo i valobohòm-piantokey, le tsy eo ty nanao te aze o vara’eo fa kila nitraofañe. Tan-kafatraram-bey ty nitalilia’o Firàheñeo i fivañonam-belo’Iesoà Talèy, vaho am’iereo iaby ty hasoa mitoabotse. Tsy amam-pisotry iereo, fa ze aman-tane ndra anjomba ro nandeta naho ninday ty vili’i naletakey, le nibanabana’e am-pandia’o Firàheñeo vaho hene nitsahareñe am’ondatio songa ty amy paiañey. Teo t’i Josefe, nte-Levy boake Kiprosy, i natao’o Firàheñeo Barnabasiy, (ze midika: Anam-pañohòañe). Nanan-tane re, le naleta’e naho nendese’e i volay vaho nazotso’e am-pandia’o Firàheñeo.

Misoratra ao amin'ny gazety anay

Apetraho ny Église Locale