Soroñe 7

Intoy ty fetse o engan-dilatseo, ie miava-do’e; amy fandentañe o hisoroñañeoy ty fandentañe ty engan-dilatse; le hadasi’e añariari’i kitreliy ty lio. Ty hengae’e, le ty safo’e iaby: i hofa’e vondrakey naho ze safo’e mañohoñe o ova’eo, naho ty voa roe mitraok’amo safo’e an-demeo, vaho hafaha’e rekets’i voa rey i kambinatey; le hengae’i mpisoroñey an-katoeñe amy kitreliy, hisoroñañe am’Iehovà, soron-dilatse izay. Ho fikamà’ze hene lahilahy amo mpisoroñeo; ho kamaeñe amy toe-miavakey ao; ie miava-do’e. Tsy mifañova amy engan-kakeoy ty engan-dilatse; fetse raike ty a’i roroey; a i mpisoroñe nanao fijebañañe ama’ey izay. Ty mpisoroñe mañenga ty fisoroña’ondaty, le a i mpisoroñey ty holi’i nisoroñañey. Le ze hene enga-mahakama atoñak’an-toñak’ao naho ze hene endazeñe am-balàñe ndra an-kapeke, le a i mpisoroñe mañenga azey. Ze enga-mahakama ila’e, ke linaro menake ke maike, le ho zaraeñe mira amo ana’i Aharoneo. Intoy ty fetsem-pisoroñañe o engam-pañanintsiñe banabanaeñe am’Iehovà o: naho engae’e ho fañandriañañe, le hatrao’e amy engam-pañandriañañey ty mofo po-dalivay linaro menake naho mofo pisake po-dalivay nihosorañe menake, ndra mofo ami’ty mona nigoñahe’ty menake. Le vonga-mofo aman-dalivay ty ho banabanae’e miharo amy engam-pañanintsiñe ho fañandriañañey. Boak’amy ze hengae’e iaby sindre andivà’e raike ho banabanae’e am’Iehovà. A i mpisoroñe nametsake ty lio’i engam-pañanintsiñey amy kitreliiy izay. Ho kamaeñe amy andro añengañ’azey ty hena’i soron-kanintsiñe ho fañandriañañey; tsy ho sisàñe ami’ty loak’andro. Fe naho engam-panta he engan-tsatrin’arofo i soroñey le ho kamaeñe amy andro nisoroñañe azey, mbore mete kamaeñe ami’ty loak’andro ze nisisa; fe horoañe añ’afo ami’ty andro fahatelo ze tsy ri’e amy hena’i soroñey. Aa naho eo ty hena nisoroñañe amy engam-pañanintsiñey ze kamaeñe amy andro fahateloy, tsy ho no’e, vaho tsy ho volilieñe ama’e; toe tiva izay; le ho vavè’ze ondaty mikama ama’ey i tahi’ey. Tsy ho kamaeñe ze nofotse nioza ami’ty raha tsy malio, fa ho forototoeñe añ’afo. Fa naho o nofotseo, ho kamae’ze malio. Fe haitoeñe am’ondati’eo t’indaty mikama amy hena engam-pañanintsi’Iehovà y ie ama’e ty tsy falio’e. Ze ondaty mitsapa raha maloto: ke haleora’ondaty, ke biby maloto, ke inoñ’inoñe amo raha mampangorìñeo, naho ikama’e ty hena’i engam-pañanintsi’ Iehovà y, le haitoañe am’ondati’eo indatiy. Le hoe ty nitsarae’Iehovà amy Mosè: Misaontsia amo ana’Israeleo ty hoe: Tsy ho kamae’areo ty safon’añombe ndra añondry ndra ose. Le ty amo safom-biby mate bobokeo ndra t’ie nirimitem-biby le azo anoan-draha, fe tsy ho kamae’areo. Ze ondaty mikama ty safom-biby, amo fañenga’ondaty ho soroñañe am’Iehovà ro haitoañe am’ondati’eo. Tsy ho kamae’areo ty liom-boroñe ndra biby, ndra aia’aia amo fitobea’areoo. Ze ondaty mihinan-dio, le haitoañe am’ondati’eo indatiy. Hoe ty nitsara’Iehovà amy Mosè, Misaontsia amo ana’Israeleo ty hoe: Ty minday ty isoroña’e ho engam-pañanintsiñe am’Iehovà, le amy engam-pañanintsi’ey ty ho banabanae’e am’Iehovà. O fità’eo ty hanese ze hisoroña’e am’Iehovà. Hasese’e ty safo’e rekets’i tratra’ey le hahelahela’e i tratra’ey ho engan-kelahela añatrefa’Iehovà. Le hisoroña’i mpisoroñey ho hatoeñe amy kitreliy ty safo’e fa a i Aharone naho o ana’eo i tratra’ey. Le hanoe’o engan-kelahela amy mpisoroñey ty tso’e havàna boak’amo engam-pañanintsiñe fisoroña’areoo. Anjara ty ana’i Aharone mañenga ty lio’i engam-pañanintsiñey naho o safo’ey i tso’e. Fa rinambeko amo engam-pañanintsi’o ana’Israeleoo ty tratran-kelahela naho ty tsom-pañè vaho natoloko amy Aharone mpisoroñe naho amo ana’eo ho anjara’iareo boak’amo ana’Israeleo nainai’e donia. Amy andro naneseañe iareo hitoroñe Iehovà ho mpisoroñey, ty nañambahañe i anjara zay ho a i Aharone naho ho a o ana’eo amo fisoroñañe am’Iehovà o; inay i nandilia’Iehovà te hatolo’o ana’Israeleo am’iareo amy andro nañorizañe iareoiy ho fañè tsy modo amo tarira’iareo mifandimbe nainai’eo. Izay ty fetse’o soroñeo, naho o enga-mahakamao, o engan-kakeoo, o engan-dilatseo, o engam-pañorizañeo, vaho o engam-pañanintsiñe nandilia’Iehovà amy Mosè am-bohi-Sinay amy andro linili’e o ana’Israeleo ty hanese enga am’ Iehovà am-patrambey Sinaiio.

뉴스레터 구독

Église Locale 설치