Iesaià 22

Ty nibangoeñe i Vavatanem- Pahaoniñañey: Ino ty maniloke azo henaneo gea, t’ie miañambone mb’an-tafo mb’eo iaby! Atsa-koràke irehe, Ty rova mivalitsikotake, ty positse mirebeke tia! Toe tsy zinamam-pibara o nibaibay ama’areoo, tsy nitsingoro an-kotakotake! Fonga nitrao-pivoratsake ty mpifehe’areo, f’ie tsinepake tsy am-pale, hene miharo-rohy ze nitendreke ndra te niherereake añe. Aa le hoe iraho, Aviho amako o fihaino’oo; apoho hangololoike ty tañy; ko imanea’o hohò, ty amy fandrotsahañe i anak’ampela’ondatikooy. Fa ho andron-kankàñe, fandialiañe naho ampoheke, am-bavatanem-Pahoniñañe ao boak’amy Talè Iehovà’i Màroy; ty fandrotsahan-kijoly, vaho ty fikaikaihañe o vohitseo. Nitintiñe i trañon’ana-paley t’i Elame reketse sarete naho ondaty naho mpiningi-tsoavala, vaho nañafake i sarom-pikalan- defoñey t’i Kire. Ho tondroke te ho tsitsike sarete o vavatane’areo fanjàkao, vaho hilahatse an-dalam-bey eo o mpiningi-tsoavalao. Hinalo’e ty saro’Iehodà. Nitolihe’o amy andro zay o fialiañe añ’anjomban’alao; Nisamba’areo o jeba’e an-drova’i Davideo t’ie maro; vaho nitoha rano añ’antara ambane ey nahareo. Nivolilie’areo o anjomba’Ierosalaimeo, vaho nakoroma’areo ty anjomba ila’e hanosohañe i kijoliy. Nandranjia’areo talaha añivo’i kijoly roe rey hitañe ty rano’i antara antetsey—fe tsy niatoa’areo i namboats’azey, tsy nihaoñe’areo i nisafiry aze haehaey. Amy andro zay nikoike fangololoihañe, naho fandalàñe, t’i Talè, Iehovà’i Màroy, naho fampikovohan-doha, vaho fisikinan-gony; Te mone: rebeke naho hafaleañe, tombok’añombe naho fandentàñ’añondry, fikamàn-kena naho finoman-divay: Antao hikama naho hinoñe, ke ho mate maray! Aa le naboa’Iehovà’i Màroy an-tsofiko ao ty hoe: Toe tsy ho jebaña’o i hakeo zay ampara’t’ie mihomake, hoe t’i Talè, Iehovà’i Màroy. Hoe t’i Talè, Iehovà’i Màroy: Akia mb’amy mpamandroñey, mb’amy Sebnà, mpifehe’i trañoy mb’eo: Ino ty zo’o atoy? Ia o azo atoio, te nihalia’o kibory etoa ho am-bata’o, ie andavaha’o lonake an-kaboañe ey, naho kaokaohe’o ho azo ty fimoneña’o an-damilamy ao? Inao! havokovoko’Iehovà am-pivokovokoam-panalolahy añe irehe; eka ho gore’e an-jitse, havarimbari’e vaho havoeboe’e hoe labole mb’an-tane miratraratra añe; añe ty hihomaha’o, ho añe ka o sareten’enge’oo, ty hasalarañ’anjomban- talè’o tia. Ho roaheko irehe tsy ho an-toe’o, le hafotsako ho ambanen-tsaranga’o ao. Ho tondroke amy andro zay te ho kanjieko t’i Eliakime ana’i Hilkià, mpitoroko. Le haombeako ty sarimbo’o, hadiako ama’e ty sadia’o, vaho hapoko am-pità’e eo i nifelehe’oy; ie ty ho rae’o mpimone’Ierosalaimeo, naho i anjomba’Iehodày. Hanoeko an-tsoro’eo i lahin-dakilèn’anjomba’i Davidey; ie manokake, tsy eo ty handrindry; ie mandrindriñe tsy eo ty hanokake. Haoreko hoe fàntake an-toe’e mafe eo; ie ty ho fiambesam-bolonahetse añ’anjomban-drae’e ao. Le hasampe’iareo ama’e iaby ty engen-anjomban-drae’e, o tariratseo naho o tamingañeo, ze fonga anam-pitiheke naho ze hene fitovy naho o sajoao. Amy andro añe zay, hoe t’Iehovà’i Màroy, le hitrànkañe i fantake nazitse an-toe’e mafey, hipoñake le hideboñe, vaho hipitsoke ama’e o kilankañe tama’eo; fa nitsara t’Iehovà.

뉴스레터 구독

Église Locale 설치