Daniele 4

Ie nihendre añ’akibako ao avao, izaho Nebokadnetsare, vaho niraorao añ’anjombam-panjakako ao, le nañinofy ty nampirevendreveñ’ahy, vaho nitsobore ahy am-pandreako ao o ereñereñe naho aroñaroñe an-dohakoo. Aa le liniliko te songa hasese aoloko eo ze mahihi’i Bavele hampiboahañe amako ty fandrazaña’i nofiy. Nimoak’ao o ambiasao naho o mpañandroo naho o nte-Kasdìo naho o mpitokio vaho nataliliko am’iereo i nofiy; fe tsy natoro’iareo ahy i fandrazaña’ey. Ie an-tsehanga’e añe te niatrek’ahy t’i Daniele, i natao Beltesatsare ty añara’ey—i tahinan-draharekoy, fa ama’e ao ty Arofon’Añahare Masiñe; le añatrefa’e eo ty nitaliliako i nofiy. Ry Beltesatsare, tale’o mahihitseo; fa nirendreko te ama’o ao i Arofon’Añahare Masiñey, le tsy ao ty raha mietake mikafitse ama’o; atalilio o aroñaro’i nofy nitreakoy naho ty fandrazañañ’azeo. Inao o aroñaron-dohako tan-tihio: nahatrea hatae añivo’ty tane toy, an-tiotiotse eñe i lengo’ey. Nitombo i hataey le nihafatratse, naho nahatakatse andikerañe ey ty haabo’e, vaho pak’añ’olo’ty tane toy ty fahaisahañe aze. Fanjaka o rave’eo, niegoego o voa’eo, ama’e ao ty haneñe ho a ze kila raha; ambane an-talinjo’e ao ty nialofa’o bibin-kivokeo naho o ra’eo ty nimoneña’o voron-dikerañeo, le hene nifahàna’e ze atao nofotse. Nitreako amy aroñaron-dohako am-pandreakoy te ingo ty mpijilo miavake nizotso boak’andikerañe añe; nikoike ami’ty hoe; Firao o hataeo, birao o ra’eo, ahintsaño o rave’eo vaho aparatsaho o voa’eo; ampisitaho boak’ambane’e ao o bibio naho amo ra’eo o voroñeo; fe apoho an-tane eo i foto’ey naho o vaha’eo; bandio viñe naho torisìke le apoho añ’ahetse maindoñindon-kivok’ao; le ty zonon-dikerañe ty handèñ’aze; naho hitrao-pàhañe amo bibin-kivo’ty tane toio; ampiovaeñe tsy ho tro’ondaty ty arofo’e, ho tolorañe fom-biby; vaho ampiarieñe ambone’e ty taom-pito. Ami’ty saontsi’i mpijiloy ty ijadoña’i rahay naho i zakay ty amy saontsi’o miavakeo hahafohina’o veloñeo te mifelek’am-pifehea’ondatio t’i Andindimoneñe naho tolora’e amy ze satri’e, vaho oriza’e ambone ze mirek’am’ondatio. Izaho Nebokadnetsare ty nahatrea i nofy zay; aa le ihe Beltesatsare: taroño i fandrazaña’ey, fa ndra te leo raik’amo mahihitse amy fifeheakoio tsy nahafiboak’i fandrazaña’ey, le ihe ro mahalefe kanao ama’o ty Arofon’Añahare Masiñe. Nianjiñe eo avao t’i Daniele, i natao Beltesatsare ty tahina’ey; amy te nañembetse aze ora raike i naereñère’ey. Aa le nisaontsy ama’e i mpanjakay nanao ty hoe: O Beltesatsare, ko ampañaliheñ’azo i nofiy ndra i fandrazaña’ey. Aa le nanoiñe ami’ty hoe t’i Beltesatsare, Ry talèko, ee te ho an-drafelahi’o i nofiy, naho ho amo mpikinia azoo i fandrazaña’ey. I hatae nioni’o nitombo naho nihafatratsey, ie nahatakatse andikerañe eñe ty haabo’e, hahaisaha’ty tane toy iaby; i aman-draveñe fanjaka naho amam-boa nirokorokoy, tama’e ty hàne’ze he’e, nitobok’ambane’e ao o bibin-kivokeo, naho nimoneñe amo ra’eo o voron-dikerañeo: Ihe ‘nio, ry mpanjaka ro nitombo nihamaozatse, le nitoabotse nahatakatse antiotiots’eñe ty enge’o, vaho pak’añ’olo’ty tane toy ty fifehea’o. Le i nioni’i mpanjakaiy, ie nanao ty hoe ty mpijilo miavake nizotso boak’an-dikerañe ao: Firao o hataeo le mongoro; angao an-tane ao i foto’ey naho o vaha’eo, naho bandiem-by naho torisìke amo ahetse maindoñindoñe an-kivokeo naho apoho handeñ’aze i zonon-dikerañey ie hitraok’anjara amo bibin-kivokeo ampara’te niary ambone’e ty taom-pito. Inao ty famentabentarañ’aze ry mpanjaka: Nivotrak’amy talèko mpanjakay ty fizakà’i Andindimoneñey; t’ie ho roaheñe boak’am’ondatio; le hitraok’amo bibin-kivokeo ty fimoneña’o naho ho fahanañe amo ahen-kivokey manahake o añombeo, naho hampiandroeñe amy zonon-dikerañey, vaho taom-pito ty hiary ambone’o ampara’te fohi’o te mifelek’ambone’ty fifehea’ondatio t’i Andindimoneñe vaho atolo’e amy ze tea’e. Le ie nandiliañe te hengàñe an-tane ao i foto-katae’ey rekets’o vaha’eo, le mbe ho tanañe ho azo ty fifehea’o, hahafohina’o te i Likerañey ty mifeleke. Aa le iantofo o fanoroakoo, ry mpanjaka vaho apitsoho an-kavañonañe o tahi’oo, naho am-piferenaiñañe o rarakeo o hakeo’oo; izay ty mete hañalava o androm-pibodobodoa’oo. Fe nifetsak’amy Nebokadnetsare mpanjaka irezay. Ie nimodo ty volañe folo-ro’amby, naho nidraidraitse ambone’ty anjombam-panjakàm-pifehea’i Baveley, le hoe ty nisaontsie’i mpanjakay: Tsy itoy hao i Bavele ra’elahy naoreko ho anjombam-pifehea’ty haozaran-kafatrarako ho ami’ty engen-kajabahinako? Mbe tam-palie’i mpanjakay i saontsy zay te nivotrake boak’an-dindimoneñe ao ty fiarañanañañe nanao ty hoe: Ry Nebokadnetsare mpanjaka, inao ty fetse ama’o fa nieng’azo i fifeheañey, ie ho soireñe hienga ondatio, naho ho amo bibin-kivokeo ty fimoneña’o, le ho fahanañe ahetse manahake o añombeo, naho ho kotsae’ty zonon-dikerañe vaho taom-pito ty hiary ambone’o ampara’te fohi’o te mifelek’amo fifehea’ondatio t’i Andindimoneñe vaho tolora’e amy ze satri’e. Nihenek’amy Nebokadnetsare amy ora zay i rahay le nasitake am’ondatio re, naho nikama ahetse manahake o añombeo, naho nampandroe’i zonon-dikerañey ty fañova’e ampara’te nitiry ho volom-bantio o maroi’eo, vaho hoe hohom-boroñe o hoho’eo. Aa ie nimodo i fets’àndroy le izaho Nebokadnetsare ty nampiandra maso mb’an-dikerañe ey naho nampolieñe amako ty faharendrehako naho nandriañeko t’i Abo Tiañe naho nibangoeko vaho nirengèko i Veloñe nainai’ey, Fifeheañe tsy mbian-ko modo i fifehea’ey; vaho miranga ze hene sa i fifeleha’ey; le volilieñe ho tsy vente’e ze kila mpimone’ty tane toy, naho hene anoe’e ze satrie’e amy lahialen-dikerañey naho amo mpimone’ty tane-bey toio; vaho tsy eo ty hikalañe ty fità’e hanao ama’e ty hoe: Inoñ’o anoe’oo? Ie henane zay, nampoly amako ty hilalako, le nimpoly ami’ty havolonahem-pifeheako ao; nimpoly amako iaby ty engeko naho ty habaranjibaranji’e; nipay ahy o mpifehem-paritanekoo naho o androanavikoo; le nampoly amako ty fifeheako, vaho nampitoaboreñe amako ty engeñe. Ie amy zao, mibango naho mañonjoñe vaho mandrenge i Mpanjakan-dikerañey, izaho Nebokadnetsare, amy te hene to o fizakà’eo le hai’e ty mampirèke o mañavelo am-pirengevohañeo.

뉴스레터 구독

Église Locale 설치