Iirmeà 43

Ie nigadoñe ty saontsi’Iirmeà am’ondaty iabio, ze hene tsara’Iehovà Andrianañahare’iareoo, i namantoha’Iehovà Andrianañahare’iareo aze ho am’iareoy, i tsara iaby rezay; le hoe ty asa’i Azaria ana’i Hosaia naho Iohanane ana’i Karea, vaho ondaty mirengevoke iabio, Mandañitse irehe! tsy nirahe’Iehovà Andrianañaharentika irehe hanao ty hoe, Ko mañavelo mb’e Mitsraime mb’eo hañialo añe, fe sinigi’i Baroke ana’i Neria ama’ay irehe, hanese anay am-pità’o nte-Kasdio, hañohofa’iareo loza vaho hinday anay an-drohy mb’e Bavele añe. Le tsy hinao’Iohanane ana’i Karea naho o mpifehen-dahin-defoñe iabio, naho ze hene ondaty ty fiarañanaña’Iehovà, ty himoneña’iereo an-tane Iehodà ao. Fe rinambe’Iohanane ana’i Karea naho o mpifehen-dahin-defoñe iabio ze fonga sehanga’Iehodà nimpoly boak’amo fifelehañe iaby nandroahañe iareoo hañialo an-tane’Iehodà ao; ondatio, o rakembao, o ajajao naho o anak’ampelam-panjakao, vaho ze hene ondaty napo’i Nebozaradane mpifehe mpigaritsey amy Gedalia ana’i Ahikame ana’i Safane ao, naho Iirmeà mpitoky, vaho i Baroke ana’i Neria; le niloak’an-tane Mitsraime ao, amy t’ie tsy nañaoñe ty fiarañanaña’Iehovà y, vaho nivotrake e Takpanese eo. Aa le niheo am’Iirmeà e Takpanese ao ty tsara’Iehovà nanao ty hoe: Andrambeso vato jabajaba am-pità’o vaho akafiro am-po’ty lietse an-dalam-bein’anjomba’i Parò e Takpanese ao, ampahaisaha’ondati’Iehodào eo; vaho ano ty hoe am’iereo: Hoe t’Iehovà’i Màroy, t’i Andrianañahare’Israele: Inao! hampañitrifeko i Nebokadnetsare mpanjaka’i Bavele mpitorokoy, naho hapoko amy vato nakafiko rey eo ty fiambesa’e vaho halama’e am’iereo i lambam-pañalofa’ey. Homb’atoy re handafa ty tane Mitsraime; ho zamaneñe ze ho am-pikoromahañe, ho rohizeñe ze ho am-pandrohizañe, vaho ho lafàm-pibara ze ho am-pibara. Le hamiañ’afo añ’anjomban-drahare’i Mitsraime ao iraho le ho forototoe’e irezay, naho hasese’e mb’an-drohy añe iereo, naho ho valoñe’e ty tane Mitsraime manahake ty amaloña’ty mpiarake ty saro’e, vaho hiakatse am-panintsiñañe. Ho rotsahe’e ka o vatolahi’i Betsemese an-tane Mitsraimeo; vaho ho hotomomohe’e añ’afo o akiban-drahare’i Mitsraimeo.

ニュースレターを購読する

Église Locale をインストール