Iirmeà 35

Ty tsara’Iehovà niheo am’Iirmeà tañ’andro’Iehoiakime ana’Iosia, mpanjaka’Iehodà, manao ty hoe: Akia mb’añ’anjomba’o nte-Rekao mb’eo naho isaontsio, vaho endeso mb’añ’anjomba’Iehovà ao, añ’efe’e raik’ao, vaho anjotsò divay hikama’iareo. Aa le nendeseko t’Iaazanià ana’Iirmeà, ana’i Habazinia, naho o roahalahi’eo rekets’o ana’e iabio, vaho ty haampon’anjomba’o nte-Rekao. Le nampihovaeko añ’anjomba’Iehovà ao, añ’efe’o ana’i Kanàne ana’Igdalia ondatin’Añahareo, marine’ty efe’o roandriañeo, ambone’ty efe’i Maaseià, ana’i Salome, mpiamben-dalañe; naho nazotsoko aolo’o anak’anjomba’i Rekàbeo ty korobo naho fitiheke, vaho nanoeko ty hoe: Mikamà divay. Fa hoe ty lie’iereo, Tsy hikama divay zahay ty amy nafè’Ionadabe ana’i Rekabe rae’ay ama’aiy, ty hoe: Tsy hikama divay nahareo, inahareo naho o ana’areo kitro katrokeo; vaho ko mañoreñe anjomba ndra mitongy tabiry, ko mambole vahe, naho ko atao hanañañe izay; fa himoneñe an-kibohotse amo fonga andro hiaiña’areoo, soa t’ie hitoboke andro maro an-tanem-pañialoa’areo ao. Le nihaoñe’ay ty fiarañanaña’Ionadabe ana’i Rekabe rae’ay amo nafe’e anay iabio, te tsy hinon-divay amo hene andro’aio izahay naho o vali’aio, naho o ana’aio, vaho o anak’ampela’aio. Aa le tsy namboatse anjomba himoneña’ay zahay, tsy aman-tanem-bahe ndra teteke ndra tabiry; f’ie mpitobok’an-kibohotse ao, naho mañaoñe vaho mitoloñe o nafe’Ionadabe rae’aio. Aa ie nionjoñe haname an-tane atoy t’i Nebokadnetsare mpanjaka’i Bavele, le hoe zahay: Antao hionjoñe mb’e Ierosalaime ao, aolo’o lahindefon-te-Kasdio naho aolo’o nte-Arameo; aa le mimoneñe e Ierosalaime atoan-jahay. Aa le hoe ty tsara’Iehovà niheo am’Iirmeà: Hoe ty nafè’Iehovà’i Màroy, i Andrianañahare’Israeley: Akia mb’am’ondati’Iehodao naho o mpimone’Ierosalaimeo, le ano ty hoe: Tsy hitsendreñe hilala hao nahareo hañaoñe o volakoo? hoe t’Iehovà. Ty nafè’Ionadabe ana’i Rekabe, amo ana’eo, ty tsy hikama divay, le fa ambenañe, vaho tsy ikama’iareo pake henane, amy t’ie mañoñe ty fetsen-drae’iareo; fe nitaroñeko mañampitso am-pitaroñañe nahareo fe tsy nijanjiñe ahy. Le niraheko ama’areo ka o mpitoky mpitoroko iabio, nampihitrifeko handro nanao ty hoe: Songa mimpolia amo sata’rati’eo ondatio, naho ahitio o fitoloña’areoo, naho ko mañorin-drahare ila’e ho toroñeñe, soa te himoneña’areo ty tane natoloko ama’areo naho aman-droae’areo toy; f’ie tsy nanokilan-dravembia, tsy nañaoñ’ahy. Toe nihenefe’o ana’Ionadabe ana’i Rekabe ty fetse nafen-drae’iareo ama’e, fe tsy nañaoñe ahy ondaty retoañe; aa le hoe t’Iehovà, i Andrianañahare’i màroiy, i Andrianañahare’Israeley: Ingo te hafetsako am’Iehodà naho amo mpimone’Ierosalaimeo ze fonga hekoheko tsineiko am’iereo; amy t’ie nivolañeko, f’ie tsy nijanjiñe, kinoiko fe tsy nanoiñe. Le hoe t’Iirmeà amy anjomba’o nte Rekabeo: Hoe t’Iehovà’i Màroy, i Andrianañahare’Israeley: Amy te nihaoñe’areo ty saontsin-drae’areo Ionadabe, vaho nambena’areo o fañè’e iabio, vaho nanoe’areo ze hene nandilia’e; le hoe t’Iehovà’i Màroy, i Andrianañahare’Israeley: Tsy haitoañe am’Ionadabe, ana’i Rekabe, ty lahilahy hijohañe añatrefako nainai’e donia.

ニュースレターを購読する

Église Locale をインストール