Sabo 92

Sabo 92

Soa ty mañandriañe Iehovà, ty misabo vaho mibango o tahina’oo ry Andindimoneñey, ty hitalily ty fiferenaiña’o boa’maraiñe; naho ty figahiña’o an-kaleñe, ami’ty marovany folo-taly, naho ami’ty mandalina, vaho ami’ty fandrimotam-peon-jejo-bory. Amy te Ihe ry Iehovà ro mahaehak’ahy amo fitoloña’oo, irebehako o tolom-pità’oo. Akore ty hajabahina’o tolon-draha’oo ry Iehovà, toe miheotse o fivetsevetse’oo! Tsy aman-kilala t’indaty mineñe, tsy maharendreke zao ty dagola: t’ie mitiry hoe ahetse o lo-tserekeo, naho fonga miraorao o tsy vokatseo, f’ie hafàtse ho rotsaheñe kitro katroke. Fa Ihe ry Iehovà ro an-digiligy eñe nainai’e donia. Heheke o rafelahi’oo ry Iehovà; Ingo te hikoromake o malaiñ’Azoo; Fonga hibaibay ze mpanao raty. Fa naonjo’o ty tsifako manahake ty an-drimo, fa hinosotse solike vao iraho. Le hahatrea ty fisalalako amo rafelahikoo’o masokoo vaho ho tsanoñen-tsofiko ty fañiriako amo tsereheñe mivoalatse amakoo. Handrevake hoe satrañe o vantañeo, manahake ty fitiria’o akao e Libanoneo ty hitomboa’e; Tinongy añ’anjomba’Iehovà ao, hitroñe an’kiririsan’Añahare eo. Mbe hiregorego iereo te antetse, ho lifo-dranoke naho hirimboñe, hitaroñe te vañoñe t’Iehovà, lamilamiko, tsy ama’e ty tsy to.

Iscriviti alla nostra newsletter

Installa Église Locale