Lioke 10

Ie modo izay, le nijoboñe ondaty fitompolo ila’e ka t’i Talè, vaho nirahe’e kiroe-kiroe hiaolo mb’amy ze hene rova naho tane homba’e. Le hoe re tam’iereo: Tombo ty vokatse fe tsy ampe ty mpandrofotse; aa le halalio i Talèm-bokatsey ty hañeke ho amy fanatahañey; Akia, iraheko hoe vik’añondry mitoam-parasy. Ko mitintin-koro ndra kontrañe ndra hana vaho ko mifañinoñe an-dalañe eo. Ze traño iziliha’areo, anò hey ty hoe: Hanitsiñe ty anjomba toy. Aa naho ao ty anan-kanintsiñe, le hitoetse ao i fañanintsi’areoy; fe naho tsy izay le himpolia’e. Mañialoa amy trañoy; mikama naho minoma amy ze azotso amy te mañeva ty rima’e ty mpanatake. Ko mitsatsàk’anjomba. Ze tanañe omba’areo, naho ampihovae’e: ikamao ze azotso’e. Jangaño ze marare, le anò ty hoe: Fa totok’anahareo i Fifehean’Añaharey. Ze rova anjoà’areo tsy mampihova, le miheovà mb’an-dàmoke mb’eo vaho anò ty hoe: Ndra ty lembo’ty rova’areo manditek’ama’ay ho piohe’ay hanjehazeha anahareo. Fe mahafohina te nitotoha’i Fifehean’Añaharey. Itaroñako te haivañe ty hifetsak’amy Sodoma amy andro zay ta ty hizò i rovay. Hankàñe ama’o, Korazina! Hankàñe ama’o Betsaida! Fa naho nanoeñe e Tirò naho e Sidona añe o raha jabajaba nitoloñeñe ama’areoo le ho nisoloho haehae vaho ho nitobok’an-gony naho lavenoke. Haivañe ho amy Tirò naho i Sidona amy zakay ta ty ama’areo. Ihe ka, ry Kapernaomy, haonjomb’andindìñe añe v’iheo? Te mone hatotse an-tsikeokeok’ao! Ze mijanjiñe anahareo mijanjiñe ahy, naho ze malaiñ’anahareo malaiñ’ahy, vaho ze malaiñ’ahy, malaiñe i Nañirak’ahiy. Nimpoly an-kaehake i fitom-polo rey, le hoe ty asa’iareo: O Rañandria, ndra o kokolampao miambane ama’ay ty amy tahina’oy. Le hoe t’Iesoà tam’iereo: Nitreako nidoindoiñe boak’andindìñey hoe helatse i mpañìnjey. Inao! fa tinoloko lily ambone’ty haozara’i rafelahiy nahareo handialia mereñe naho kalengo fa ndra inoñ’inoñe tsy hijoy. Aa ko irebeha’areo te itsolofìña’o kokolampao, fe mandià-taroba te pinatetse andindìñe ao o tahina’areoo. Ie amy ora izay, nilifon-kaehak’añ’arofo t’Iesoà nanao ty hoe: Mandrenge Azo iraho ry Aba, Talèn-dikerañe naho ty tane toy, te naeta’o amo mahihitseo naho amo mahilalao o raha zao vaho nampalangese’o amo anak-ajajao; Eka, Aba, zay ty ninò’o am-pivazohoa’o. Kila natolon-dRaeko ahy, le tsy eo ty mahafohiñe te ia i Anakey naho tsy t’i Rae, naho te ia t’i Rae lehe tsy i Anakey vaho ze ampahafohiñe’i Anakey. Nitolik’amo mpiama’eo avao le nanao ty hoe: Haha ty fihaino mahaisake o raha isa’areoo; Itaroñako te maro ty mpitoky naho ty mpanjaka nisalala hahaoniñe o oni’areoo fe tsy nahaoniñe, vaho hahajanjiñe o janji’areoo fe tsy nahajanjiñe. Teo te niongake ty mpahay lily nitsoke Iesoà ami’ty hoe: O Talè, ino ty hanoeko handovàko haveloñe nainai’e? Le hoe re tama’e, Ino ty pinatetse amy Hake ao? Akore ty vaki’o aze? Hoe ty natoi’e: Kokò t’Iehovà Andrianañahare’o an-kaampon’arofo’o, naho an-kaliforam-pañova’o naho amy ze hene haozara’o naho am-pitsakorea’o iaby, vaho ondatio mira ami’ty vata’o. Le hoe re tama’e: To i natoi’oy, anò, vaho ho veloñe. Aa ie te haniom-batañe, nanao ty hoe am’Iesoà: Ia v’indaty zay? Hoe ty natoi’Iesoà: Teo t’indaty nizotso boake Ierosaleme homb’e Hierikò mb’eo nizò malaso nañolits’o siki’eo, nitrabotrabok’aze vaho nampidoñ’aze fiai-drifi’e; tojo te nizotso mb’eo amy zao ty mpisoroñe; nizoe’e fe niriràña’e. Nanao izay ka t’i nte-Levy, ie pok’eo, nahaisake fe nanoe’e riom-paoke. Nivotrak’eo ka ty nte Samaria amy lia’ey, ie niisa’e le niferenaiña’e, nitotok’aze naho namoloñosa” e o fere’eo naho nañiliña’e solike vaho divay; le nampiningire’e amy borìke’ey, naho ninday aze mb’ami’ty anjomba fanjoàn’ambahiny mb’eo vaho natrahe’e. Ie maraindray, nañakatse bogady roe, le natolo’e amy tompon’anjombay ami’ty hoe: Itahao; ndra firefire ty lany mandikoatse zao le havahako ami’ty fimpoliko. Aa vaho ia amy telo rey ty atao’o nifampilongo amy nizo mpitavañey? Hoe ty natoi’e: I nilem-po ama’ey. Le hoe t’Iesoà tama’e: Akia, itsikombeo. Nañavelo iereo, le nizilik’an-tanañe ao t’Iesoà naho nampihova aze añ’anjomba ty rakemba atao Martae, niambesatse am-pandia’i Talè nitsendreñe o tsara’eo ty rahavave’e Marie. Fe niembetse’amy fitoroña’ey t’i Martae le niheo mb’amy Talè mb’eo nanao ty hoe: O Rañandria, tsy ahoa’o hao te nieng’ahy hikotepe irery ty rahavaveko? Ampañoloro ahy. Hoe ty natoi’Iesoà: O Martae, Martae, ihe tsotseke naho tsimboetse ami’ty raha maro, raha raike ty paiaeñe; nijoboñe ty soa t’i Marie, le tsy hasintak’ama’e izay.

Iscriviti alla nostra newsletter

Installa Église Locale