Sabo 73

Toe soaen’Añahare t’Israele naho o malio añ’arofoo. Aa naho izaho, didý tsy ho nipolatitse o tombokoo; ho nidorasitse o liakoo. Ie nitsikirike o mpievoñevoñeo, naho nitreako ty havokara’o lo-tserekeo, Ie tsy manaintaiñe te mihomake, jangañe ka ty sandri’iareo. Tsy ampoheke manahake ondatio; mbore tsy tokoen-draha manahake ondaty ila’eo. Aa le miravake fiebotseborañe am-bozo’eo; manaroñ’iareo hoe sikiñe o hasiahañe mandoviakeo. Mampibotiritse o fihaino’eo ty solike, etsake naho tampe-draha-irieñe ty tro’e. Manivetive iereo, mikinia famorekekeañ’an-karatiañe. Fa najado’iareo hiatreatre o likerañeo o falie’iareoo, mikariokariok’an-tane atoy o famele’iareoo. Aa le mimpoly atoy ondati’eo, naho genohe’iereo i rano era’ey. Le hoe iereo: Aia te haharofoanan’Añahare? mahilala hao i Andindimoneñey? Inay ie, o lo-tserekeo— ie mierañerañe manombo vara avao. Toe tsy vente’e ty nañalioveko ty troko; naho nanasa tañañe an-kalio-tahiñe. Nalovilovy lomoñandro iraho; vaho nililoveñe boa-maraiñe. Lehe ataoko te, zao ty ho volañeko; hete! tsy ho nahity amo tariran’ana’oo. Fa ie nitsakoreako, haharendreke o raha zao, le nihamokorañe o masokoo, Ampara’te niziliheko an-toen’Añahare miavake ao; vaho nahaisake ty figadoña’iareo. Toe apo’o an-tane malama iereo; ampikorovohe’o mb’an-karotsahañe ao. Hoke! akore ty fiantoa’iareo anianike, Fa binotsa’ty firevendreveñañe. Hoe nofy t’ie tsekake; ry Talè, ie mivañon-dRehe le ho heje’o vintañ’iareo. Fa nikokentrekokentreñe ty troko naho niteveke ty an-tsapavoako ao, Akore ty hanèko naho ty habahimoako, hoe biby añatrefa’o eo. Fe mpiama’o nainai’e iraho; rinambe’o ty tañako havana, Hiaoloa’o ami’ty fanoroa’o, vaho ho rambese’o mb’añ’engeñe mb’eo. Ia ro ahiko an-dikerañe ao, naho tsy Ihe? le tsy amam-pisalalàko an-tane atoy naho tsy Ihe. Milesa ty nofoko naho o ovakoo, fa i Andrianañahare ro haozaran- troko naho ty anjarako nainai’e. Toe hihomake ze lavits’Azo; songa aitoa’o ze miamboho ama’o hañarapiloa’e. Fe soa ho ahy ty fañarineako aman’Añahare, fipalirako t’i Iehovà Talè, hataliliko iaby o tolon-draha’oo.

Tilaa uutiskirjeemme

Asenna Église Locale