Avotse 7

Hoe t’Iehovà amy Mosè, Hehe t’ie najadoko ho fanalolahy amy Parò, vaho ho mpitoki’o t’i Aharone rahalahi’o. Hene isaontsio ze taroñeko ama’o, le i Aharone rahalahi’o ty hisaontsy amy Parò hampiavote’e an-tane’e o ana’Israeleo. Fe ho gàñeko hey ty arofo’i Parò hampitomboako an-tane Mitsraime ao o vilokoo naho o halatsàko. Toe tsy hañaoñe anahareo t’i Parò, le hapaoko amy Mitsraime ty tañako vaho hampiavoteko an-tane Mitsraime an-jaka ra’elahy o valobohòkoo, ondatikoo, o ana’Israeleo. Ho fohi’o nte-Mitsraimeo te Izaho Iehovà, naho ahitiko amy Mitsraime ty sirako hampiavoteko boak’am’iereo ao o ana’Israeleo. Aa le nanoe’i Mosè naho i Aharone; ze nandilia’Iehovà iareo ty nanoe’iereo. Ni-valom-polo taoñe t’i Mosè naho aman-taoñe valom-polo-telo’amby t’i Aharone t’ie nisaontsy amy Parò. Hoe ty tsara’Iehovà amy Mosè naho i Aharone, Ie anoa’i Parò ty hoe, Ampiboaho raha tsitantane, le hoe ty ho asa’o amy Aharone, Rambeso ty kobai’o vaho afetsaho añatrefa’i Parò hinjarea’e fañaneñe. Aa le nimb’amy Parò mb’eo t’i Mosè naho i Aharone, le nanoe’iereo i nandilia’Iehovà y; nafetsa’i Aharone añatrefa’i Parò naho aolo’o mpitoro’eo i kobai’ey vaho ninjare bajy. Kinai’i Parò amy zao ondaty mahihitseo naho o mpamorekeo vaho nitoloñe an-tsahàtse o ambiasa’i Mitsraimeo. Songa nañifi-kobaiñe ambane eo vaho ninjare mereñe, le sindre natele’ty kobai’i Aharone o kobai’iareoo. Fe nihagàñe avao ty arofo’i Parò, tsy hinao’e iareo, amy nitsarae’Iehovà y. Le hoe t’Iehovà amy Mosè, gañe ty arofo’i Parò; ie mifoneñe tsy hampienga ondatio. Aa le akia, mb’amy Parò mb’eo maraindray t’ie miavotse mb’an-drano mb’eo, le tintino am-pità’o i kobaiñe nampanjarieñe fañaneñey, le isaontsio ty hoe, Nañirak’ahy homb’ama’o mb’etoa t’Iehovà, Andrianañahare’o nte-Evreo hinday o entañe zao: Apoho hañavelo ondatikoo, hitoroñe ahy am-patrambey añe. Inao t’ie mbe tsy nañaoñe pake henane. Aa hoe ty nitsarae’Iehovà, Zao ty hahafohina’o te izaho Iehovà. Inao, havangoko amo rano amy sàkaio ty kobaiñe an-tañako toy, hiova’e ho lio. Ho mate ze fiañe amo sàkao le hitrotròtse i sàkay vaho hampangorý o nte-Mitsraimeo ty hinon-drano amy sàkay. Aa hoe t’Iehovà amy Mosè, Saontsio t’i Aharone, Rambeso o kobai’oo le ahitio ambone’o rano’i Mitsraimeo ty fità’o, ambone’o saka’eo naho o talaha’eo naho o sihana’eo vaho ze hene kiantara-antaran-drano’e, hiova’e ho lio, le lio avao ty hanitsike ty tane Mitsraime, ndra an-tsajoa hatae ndra am-bato. Nanoe’i Mosè naho i Aharone hambañe amy nandilia’Iehovà y. Naonjo’e am-pahaisaha’i Parò naho o mpitoro’eo i kobai’ey vaho trinàbo’e ty rano amy sakay, le niova ho lio ze hene rano amy sakay; nimate o fiañe amy sakaio, le nañantifofotse i sakay naho tsy nahay nikama ty rano’i sàkay o nte-Mitsraimeo fa nitsitsike lio ty tane Mitsraime. Fe tsinikombe’o ambiasa’i Mitsraimeo an-tsahàtse, le nihagàñe ty arofo’i Parò naho nihiritsirita’e, amy nitsarae’Iehovà y. Te mone nitolike t’i Parò, nimoak’añ’anjomba’e ao, tsy nihaoñe’ty arofo’e i raha zay. Aa le fonga nihaly vovoñe añ’olo’i sàkay o nte-Mitsraimeo, fa tsy nimete nòmeñe ty rano’i sàkay. Ie nimodo ty fito andro le nipaoha’Iehovà i sàkay, le nitsara amy Mosè t’Iehovà, Akia miheova mb’amy Parò mb’eo vaho ano ty hoe ama’e, Hoe ty tsinara’Iehovà: Ampiavoto ondatikoo, hitoroñe ahiko. Aa ie mitoky, tsy hampienga, le inao, ho tsitsifeko sahoñe o tane’oo. Hifamorohotse amy Nailey o sahoñeo. Hiakatse boak’ao hizilik’añ’anjomba’o ao naho an-traño firota’o ao naho am-pandrea’o ao naho añ’anjomba’o mpitoro’oo naho amo ondati’oo naho amo fanokona’oo vaho amo finga fitroboan-kobao. Hanganik’ama’o naho am’ondati’oo vaho amo mpitoro’oo o sahoñeo.

Subscribe to our newsletter

Install Église Locale